Tar la dumonda 1: Actualmain n'èn avant maun nagins indizis per contracts collectivs cun clausulas areguard in'eventuala obligaziun da vaccinaziun. Cunvegnas u prescripziuns correspundentas en contracts individuals da lavur èn da princip imaginablas, èn dentant ordvart raras en la pratica. Schebain talas clausulas èn admissiblas, è ina dumonda dal dretg privat che stuess la finala vegnir giuditgada d'ina dretgira civila. Las basas legalas respectivas èn cuntegnidas en spezial en il Dretg d'obligaziuns.
Tar la dumonda 2: Che interpresas cusseglian a lur collavuraturas e collavuraturs – sa basond sin las recumandaziuns scientificamain fundadas dal Cussegl federal resp. da l'Uffizi federal da sanadad publica – da sa laschar vaccinar cunter COVID, para evident a la Regenza. Ella n'ha dentant naginas enconuschientschas u infurmaziuns che interpresas fetschian quai en spezial cun ina tscherta identitad. Entaifer l'administraziun chantunala n'exista nagina pressiun correspundenta.
Tar la dumonda 3: A l'Uffizi per industria, mastergn e lavur (UCIML) n'èn enconuschents nagins cas da disditgas en connex cun dumondas da vaccinaziun. Percunter èsi capità en paucs cas singuls che relaziuns da lavur èn vegnidas schliadas pervia da differenzas en il sectur d'autras mesiras da protecziun cunter COVID-19 (p.ex. inobservanza da concepts da protecziun prescrits u da l'obligatori da mascrinas). A l'intermediaziun regiunala da lavur (CIL) è enconuschent in cas singul, nua ch'ina persuna che tschertgava ina plazza n'è betg vegnida engaschada, perquai ch'ella n'era betg vaccinada. Perquai ch'i n'exista nagina obligaziun da vaccinaziun, n'ha quest nunengaschament dentant gì naginas consequenzas da vart da l'assicuranza cunter la dischoccupaziun. Tut las prescripziuns dal SECO en quest sectur sa mussan ultra da quai sco modestas.
Tar la dumonda 4: Perquai che cas correspundents èn fitg rars e perquai ch'ils instruments dal sectur da la protecziun da las lavurantas e dals lavurants funcziunan (cf. er resposta a la dumonda 5 qua sutvart), na vesa la Regenza nagin basegn d'agir supplementar. Dal rest valan ils instruments da protecziun dal dretg da lavur resp. las regulaziuns da protecziun da la legislaziun da lavur e dal dretg privat er per quests cas.
Tar la dumonda 5: Sco menziunà ston dumondas dal dretg privat la finala vegnir decididas d'ina dretgira civila. En cas che las obligaziuns da las patrunas e dals patruns da proteger la sanadad u l'integritad persunala da las lavurantas e dals lavurants vegnissan periclitadas tras mesiras e tras pretensiuns inadmissiblas a la plazza da lavur, dessi ultra da quai la pussaivladad da sa drizzar a l'Inspecturat chantunal da lavur tar il UCIML.
16 da favrer 2022