Navigation

Inhaltsbereich

Dumonda Fasani-Horath concernent mascrinas

Sessiun: 08.12.2021

Dapi ch'i vegnan puspè annunziadas dapli erupziuns da corona en il chantun Grischun – e quai en ina correlaziun temporala cun l'occurrenza gronda «Big Air» a Cuira cun 30 000 persunas – ston ils uffants davent da la 3. classa purtar mascrinas en las zonas da ristga dal chantun.

Blers geniturs èn cunter questa mesira. Il bainesser dals uffants è restrenschì fermamain. Ils uffants na survegnan betg aria, els na pon betg trair bain il flad, q.v.d. els inhaleschan ina procentuala da dioxid carbonic bler memia gronda, èn restrenschids fermamain en lur natiralezza, els na pon betg leger e discurrer da maniera normala e na chapeschan betg bain la persuna d'instrucziun. Els na pon betg giugar endretg, il nas ed ils egls piztgan. Sch'els han ina mancanza d'oxigen, tiran els la mascrina sut il nas, ma la persuna d'instrucziun als di ch'els stoppian puspè metter si correctamain la mascrina. In mattet m'ha raquintà ch'el na survegniva betg pli aria ed haja perquai tratg la mascrina sut il nas. Sin quai haja in'autra mattetta ditg: «Pervia da tai survegnin nus ussa corona». Indirectamain als vegni dà da crair che quai ch'els expiran pudess esser privlus. Tge duain ils uffants pensar e sentir en tals cas? Jau pens ch'i vegn savens sutvalità a tge stress psichic e fisic che noss uffants èn exponids, e las consequenzas sa mussan eventualmain pir bler pli tard.

Mesiras vegnan ordinadas, senza ch'in studi fidabel mussass ch'ils uffants èn purtaders signifitgants da la malsogna e ch'il diever da mascrinas ha – per ils uffants – in niz signifitgant da proteger sasezs ed auters.

Mesiras vegnan ordinadas senza analisar il material da las mascrinas sin cumponentas nuschaivlas, bain savend ch'ellas cunte­gnan oxid da titan, microplastic e particlas finas. I vegn ordinà da purtar ina mascrina senza laschar calcular la resistenza dal flad areguard ils pulmuns pli pitschens dals uffants, senza considerar il fatg che la concentraziun da CO2 è gia auta en las stanzas da scola e senza scolar las persunas d'instrucziun, per ch'ellas possian identifitgar ina ipoxia tar lur scolaras e scolars.

Ord vista giuridica sto vegnir resguardà il suandant:

L'obligatori da mascrinas per uffants cuntrafa a l'art. 4 al. 2 lit. b e c en cumbinaziun cun l'art. 40 al. 3 da la Lescha d'epidemias ed a l'art. 36 al. 1 en cumbinaziun cun l'art. 10 al. 1 e l'art. 11 al. 2 da la Constituziun federala.

Quest art. 40 da la Lescha d'epidemias (sco mesira pli miaivla da la serrada da scolas) n'è absolutamain nagina basa giuridica adattada per sfurzar tut ils uffants sauns en tut il chantun da purtar ina mascrina.

Ultra da quai stoi vegnir refusà cleramain che la scola introduceschia – cun quest plan da mesiras – in sistem che sa basa sin ina presumziun generala d'ina malsogna e ch'in scolar saun po evitar questa presumziun mo cun purtar regularmain ina mascrina e cun laschar far controllas regularas.

A questa logica manca mintga basa giuridica, ella violescha la dignitad umana (art. 7 da la Constituziun federala) e cuntegna schizunt il privel d'avair a lunga vista in effect traumatisant per ils uffants («Sun jau anc saun u sun jau gia in privel?»). I dat er differents studis (guardar tranter auter studis da corona tar uffants en Germania, Co-Ki.de) che mussan cleramain ch'i n'è betg saun per ils uffants da purtar mascrinas.

Dumondas vegnan evocadas, perquai ch'il chantun prenda la Lescha federala d'epidemias e la Constituziun federala sco basas giuridicas per:

  • pronunziar in obligatori da mascrinas per tut ils uffants en tut il chantun davent da la 3. classa,
  • ordinar automaticamain presumziuns da malsognas ed ordinar quarantinas per scolars che s'opponan a talas mesiras e
  • retrair il dretg d'ir a scola dals scolars numnads en l'alinea 2.

Cun il giavisch che la mesira da l'obligatori da mascrinas vegnia giuditgada da nov, tschentain nus las suandantas dumondas:

  1. Tge sforzs èn vegnids fatgs a la tschertga da pussaivladads alternativas che mantegnan la dignitad dals uffants, per reducir ina derasaziun da las infecziuns en las scolas? Per plaschair enumerar ils resultats.
  2. Tgenins èn ils studis che observan ina derasaziun da las infecziuns en las scolas?
  3. Tge studis mussan in effect signifitgant da las mascrinas tar ils uffants da scola? (Per plaschair inditgar il studi cun la funtauna ed il num.)
  4. Tge studis cumprovan ch'i na fa nagin donn als uffants da purtar ina mascrina? (Per plaschair inditgar il studi cun il num e la funtauna.)
  5. Co vegn registrà sistematicamain il CO2 en las classas da scola e la concentraziun da CO2 davos las mascrinas, co vegn fatg il monitoring da questas registraziuns e co guarda ora il protocol, sche las valurs vegnan surpassadas?
  6. Co vegn actualmain impedida ina discriminaziun ed ina stigmatisaziun psicologica d'uffants cun ina dispensaziun da purtar ina mascrina e co vegni prendì posiziun envers geniturs che adempleschan lur obligaziun da tgira e na vulan betg metter si ina mascrina a lur uffants?
  7. Co vegnan scoladas las persunas d'instrucziun, per ch'ellas possian identifitgar ils privels che resultan cun purtar ina mascrina e per ch'ellas possian uschia preservar lur scolars d'ina ipoxia?

Cuira, ils 8 da december 2021

Fasani-Horath

Resposta da la regenza

Tar la dumonda 1: L'obligatori da mascrinas en las scolas popularas per franar la derasaziun da las infecziuns resta adina en vigur mo uschè ditg, sco quai ch'igl è necessari ord vista epidemiologica. Daspera vegnan applitgadas autras mesiras, sco tegnair distanza, l'igiena e dar aria. La finala ha la Regenza dentant gì duas opziuns: mantegnair l'instrucziun da preschientscha tras l'introducziun da l'obligatori da ma­scrinas u midar a l'instrucziun a distanza. En l'interess dal bainstar da l'uffant e per pussibilitar als uffants da scola (ed a las persunas responsablas per lur educaziun) in decurs normal dal di è l'instrucziun da preschientscha, incl. l'obligatori da mascrinas, sa mussada sco med il pli adequat.

Tar la dumonda 2: «SARS-CoV-2 infection and transmission in school settings during the second COVID-19 wave: a cross-sectional study, Berlin, Germany, November 2020» (nih.gov) e «SARS-CoV-2 infections in children following the full re-opening of schools and the impact of national lockdown: Prospective, national observational cohort surveillance, July-December 2020, England» (nih.gov).

Tar la dumonda 3: «Effectiveness of Face Masks in Preventing Airborne Trans­mis­sion of SARS-CoV-2» (nih.gov) ed «Efficacy of face mask in preventing respiratory virus transmission: A systematic review and meta-analysis» (nih.gov).

Tar la dumonda 4: «Facemask use by children during infectious disease outbreaks» (nih.gov) e «Face Masks in Young Children During the COVID-19 Pandemic: Pa­rents' and Pediatricians' Point of View» (frontiersin.org).

Tar la dumonda 5: Las valurs da CO2 en tut las classas da scola e las valurs da CO2 davos las mascrinas na vegnan betg registradas sistematicamain. En las scolas che utiliseschan sensurs da CO2 en il rom dal project da pilot dal chantun Grischun ve­gnan las valurs da CO2 registradas cuntinuadamain sin via electronica. Sche las va­lurs da toleranza vegnan surpassadas, vegnan avertas las fanestras durant in­tginas minutas (per dar curtamain ed intensivamain aria).

Tar la dumonda 6: Uffants e giuvenils che han preschentà ina dispensaziun medicala valaivla da purtar mascrinas, èn sa participads a l'instrucziun sco usità. Sco tut ils auters uffants e giuvenils han er els stuì observar las ulteriuras prescripziuns dals concepts da protecziun. I tutga a l'agir professiunal da mintga persuna d'instrucziun da reagir en moda adequata e deescalanta sin eventualas situaziuns insupportablas, sco stigmatisaziuns e discriminaziuns psicologicas. Las scolas ston observar las pre­scripziuns da la Lescha davart las scolas popularas dal chantun Grischun (Lescha da scola; DG 421.000). Latiers tutgi er da mantegnair la prontezza da discurrer cun ils geniturs.

Tar la dumonda 7: Las persunas d'instrucziun possedan almain in certificat d'emprim agid. Ellas han ina cunresponsabladad per la protecziun e per l'adempliment da las obligaziuns da provediment legalas. Ellas vegnan scoladas uschia, ch'ellas surve­gnan ina survista generala dal stadi da sanadad actual da lur scolaras e scolars e ch'ellas pon reagir adequatamain en cas da basegn. Las persunas d'instrucziun eran supplitgadas da dar pli savens ed intensivamain aria a las stanzas da scola. Ultra da quai eran ellas libras da ritmisar lur instrucziun uschia, ch'ils uffants pudevan vegnir tramess tranteren a l'aria frestga.

24 da favrer 2022