Il problem dal traffic da guntgida tras ils vitgs è incontestà e po vegnir reducì a media vista en emprima lingia tras mesiras directivas e da dosadi (gestiun dal traffic). En il Plan directiv chantunal Traffic (PDChant-T) revedì èsi perquai definì ch'il chantun disponia d'ina gestiun dal traffic. Il PDChant-T revedì è vegnì concludì da la Regenza ils 29 da zercladur 2021. La Confederaziun n'ha dentant betg anc approvà la revisiun.

Tar il punct 1: Soluziuns pon vegnir elavuradas e realisadas mo cuminaivlamain. Cooperar al process da chattar soluziuns persistentas ston l'Uffizi federal da vias (UVIAS), il chantun Grischun (Uffizi per il svilup dal territori [UST], Uffizi d'energia e da traffic [UEnTr], Uffizi da construcziun bassa [UCB], Polizia chantunala) sco er las regiuns, las destinaziuns turisticas e las vischnancas. Per elavurar mesiras immedia­tas pussaivlas è perquai vegnida nominada ina gruppa da lavur cun represchentan­tas e represchentants dal UEnTr, dal UST, dal UCB, da la Polizia chantunala, dal UVIAS, da las regiuns e da las vischnancas. Cun questas mesiras duai il traffic da transit vegnir chanalisà sin la rait da vias surordinada (A13). Parallelamain vegn ela­vurà in studi preliminar per in concept per la gestiun dal traffic en l'entir chantun. Per tschertas dumondas vegn involvì er il chantun Son Gagl. Il concept per la gestiun dal traffic duai esser consolidà fin la fin da l'onn 2024. A partir da l'onn 2025 duain las mesiras pudair vegnir realisadas.

Tar il punct 2: En il rom d'ina emprova da pilot han il UVIAS sco er la Polizia chan­tunala ed il UCB dà liber la via da transit tras las vischnancas da Panaduz e da Razén sur Pasca 2022 mo a las abitantas ed als abitants, als servetschs d'apport sco er al traffic public. L'emprova da pilot sto ussa vegnir evaluada. L'evaluaziun vegn a mussar mesiras realisablas pussaivlas per las vischnancas per lung da la A13/A28. Ils resultats da l'evaluaziun vegnan preschentads ed explitgads a las repre­schentantas ed als represchentants da las vischnancas e da las regiuns per lung da la A13 a chaschun d'ina ulteriura maisa radunda. Ulteriuras mesiras pon vegnir exa­minadas en il rom dal project «Concept per la gestiun dal traffic». Plinavant ha la vischnanca da Schiers survegnì – durant l'enviern passà – il sustegn da la Polizia chantunala e dal UCB per schliar ils problems da traffic e per tegnair liber il center dal vitg. Ina soluziun persistenta per las vischnancas per lung da la A28 po dentant es­ser mo in concept regiunal da traffic. In tal sto dentant anc vegnir elavurà. Mesiras specificas en lieus singuls spostan numnadamain la colonna ed il traffic da guntgida u stgaffeschan en la proxima vischinanza autras premissas disfavuraivlas per la circulaziun dal traffic, senza propi meglierar la situaziun.

Tar il punct 3: Mesiras accumpagnantas cunter il «traffic nair» vegnan tranter auter er elavuradas en il rom dal project «Concept per la gestiun dal traffic». Tenor l'art. 7 al. 1 da la Lescha introductiva tar la Lescha federala davart il traffic sin via (LItLTV; DG 870.100) han las vischnancas ultra da quai gia oz la pussaivladad da serrar vias communalas en atgna cumpetenza. En quest connex stoi vegnir resguardà ch'ina tala serrada po er chaschunar impediments dal traffic local. In'emprima discussiun cun las persunas responsablas da Google Switzerland ha gì lieu ils 28 da favrer 2022. En quest connex èsi vegnì discutà, sche e co che infurmaziuns pon vegnir plazzadas en il servetsch da chartas Google Maps. In'analisa respectiva da las pus­saivladads vegn fatga da Google a maun da la consegna dals trajects pertutgads il pli fitg, inclusiv dals temps correspundents, nua ch'i dat ils problems cun la furmaziun da colonnas e cun il traffic da guntgida.

Sa basond sin questas explicaziuns propona la Regenza al Cussegl grond d'acceptar questa incumbensa.

28 d'avrigl 2022