Navigation

Inhaltsbereich

Sessiun: 16.06.2022

Ils 24 d'october 2018 ha il deputà Horrer inoltrà la dumonda per introducir in termin da carenza per cussegliers guvernativs partents. Ils 12 da favrer 2019 è questa incumbensa parlamentara vegnida discutada en il Cussegl grond e deplorablamain vegnida refusada cun 71:45 vuschs. Malgrà questa refusa da la maioritad speravan ils aderents che la debatta haja sensibilisà in zic la Regenza. Ma i sa mussa ch'ils cussegliers guvernativs partents n'han danovamain nagina sensibilitad.

Tenor l'art. 8 LSPR survegnan las cusseglieras guvernativas ed ils cussegliers guvernativs partents ina pensiun. Grazia a questa pensiun duain las cusseglieras guvernativas ed ils cussegliers guvernativs reger ed agir independentamain fin a la fin da lur uffizi e pli ditg. Cun entrar immediatamain en in cussegl d'administraziun e.u.v. è la schanza gronda ch'i pon resultar conflicts d'interess – u che mo gia l'impressiun correspundenta vegn svegliada. Quai na gida betg a rinforzar la fidanza necessaria en la politica. Pensiuns pon vegnir suttamessas ad ina discussiun critica, la fracziun da la PPS è dentant persvadida che pensiuns èn il dretg instrument gist per garantir l'independenza da las cusseglieras guvernativas e dals cussegliers guvernativs per in tschert temp.

La fracziun da la PPS incumbensescha perquai la Regenza da stgaffir las basas legalas per in termin da carenza, per che las commembras ed ils commembers da la Regenza na possian – suenter ch'ellas ed els sortan da lur uffizi – betg surpigliar mandats en interpresas, en manaschis ed en instituziuns che adempleschan almain in dals suandants criteris:

  • dal tuttafatg u per part en possess dal chantun;
  • survegnan in stretg connex cun secturs dal chantun;
  • survegnan u adempleschan incumbensas impurtantas dal chantun.

Cuira, ils 16 da zercladur 2022

Gort, Koch, Grass, Bär, Brandenburger, Della Cà, Dürler, Favre Accola, Hefti, Hug, Roner, Salis, Weber

Resposta da la regenza

Ina incumbensa sumeglianta da la fracziun da la PS dals 24 d'october 2018 è vegni­da refusada cleramain dal Cussegl grond en la debatta dals 12 da favrer 2019. En sia resposta da quella giada ha la Regenza explitgà ch'i fiss – en cas d'in temp da caren­za – facticamain nunpussaivel per las commembras ed ils commembers da la Regenza partents da surpigliar ina nova activitad adequata. L'intervenziun respectiva en il dretg fundamental da la libertad economica fiss considerabla. En spezial vegniss restren­schì il dretg constituziunal da la libra tscherna da la professiun e da l'access liber ad in'activitad da gudogn en l'economia privata. I tutgia tar la tradiziun (er tar la Confe­deraziun ed en ils auters chantuns) che las commembras ed ils commembers da la Regenza s'engaschan suenter lur demissiun a favur da la societad e da l'eco­nomia, particularmain, sch'ellas ed els èn giuvens, cura ch'ellas ed els sortan da lur uffizi. Betg sco ultim saja quai er in'expressiun da noss sistem da milissa, tenor il qual uf­fizis cumplains, sco quel d'ina cussegliera guvernativa u d'in cusseglier guver­nativ, pon vegnir exequids giustifitgadamain mo durant in temp limità. Sin basa da lur ex­perientscha e da lur relaziuns adempleschan las anteriuras commembras ed ils ante­riurs commembers da la Regenza las premissas necessarias per l'economia pri­vata, dentant er per la collavuraziun en organisaziuns d'utilitad publica. Perquai che las commembras ed ils commembers da la Regenza èn obligads a la discreziun en fatschentas uffizialas, pon vegnir impedids conflicts d'interess. Areguard questa argumentaziun n'è er sa midà nagut ord vista dad oz.

Ina retschertga da la Chanzlia chantunala da l'avust 2022 mussa plinavant che na­gins chantuns n'enconuschan in temp da carenza per anteriuras commembras ed anteriurs commembers da la Regenza – er betg quels chantuns che n'han nagina limitaziun dal temp d'uffizi. Er sin plaun federal èn pretensiuns politicas sumegliantas vegnidas refusadas gia pliras giadas.

Independentamain da quai èsi ina incumbensa permanenta da mintga instituziun d'applitgar ina public corporate governance moderna. Ella sa sviluppa vinavant per­manentamain, e quai sin tut ils plauns statals (Confederaziun, chantuns, visch­nan­cas). La Regenza è da l'avis che mandats duessan vegnir surpigliads da las per­su­nas ch'èn adattadas il meglier e che han las abilitads necessarias, las enconu­schien­tschas relevantas specificas e da la branscha sco er l'experientscha professiunala e da direcziun necessaria. Da quest circul da persunas fan potenzialmain part er las anteriuras commembras ed ils anteriurs commembers da la Regenza. Quai vala en spezial per interpresas sco er per organisaziuns d'utilitad publica cun sedia en il chantun, sch'il chantun è participà a talas u è collià en autra moda cun talas. In temp da carenza cuntrafaschess a questa finamira; el sa lascha cuntanscher mo tras l'ap­plicaziun consequenta da reglas transparentas en ina procedura ordinaria. Ils criteris per la selecziun e per las obligaziuns da las represchentanzas èn fixads gia oz en l'Ordinaziun davart la realisaziun da la public corporate governance per il chantun Grischun (OR-PCG; DG 710.400). Per recrutar mandatarias e mandataris existan ultra da quai differents mussavias e profils d'exigenzas (en spezial il criteri ch'i na dastgan esser avant maun nagins conflicts d'interess e naginas dependenzas en reguard finanzial, persunal e material).

La Regenza surpiglia l'intenziun da l'incumbensa concernent l'ulteriur svilup da la public corporate governance. Per rinforzar l'acceptanza e la confidenza en il process ed en las instituziuns duain ils instruments vegnir extendids vinavant. Uschia duain las proceduras da recrutaziun e d'elecziun per mandatarias e mandataris vegnir con­cepidas en moda pli averta e transparenta tras ina communicaziun publica. Plinavant na duain anteriuras commembras ed anteriurs commembers da la Regenza betg pli vegnir nominads gia durant il temp d'uffizi.

Sa basond sin questas explicaziuns propona la Regenza al Cussegl grond da midar l'incumbensa qua avant maun sco suonda:

La Regenza vegn incumbensada d'adattar la public corporate governance uschia, che las proceduras da recrutaziun e d'elecziun per mandatarias e mandataris vegnan communitgadas publicamain e che anteriuras commembras ed anteriurs commem­bers da la Regenza na vegnan betg pli nominads gia durant il temp d'uffizi.

7 da settember 2022