Navigation

Inhaltsbereich

Dumonda Gredig concernent fauss impuls per engrondir la rait chantunala da vias da velo

Sessiun: 03.09.2022

En il traffic quotidian po il velo sco med da traffic persistent ed ecologic giugar ina rolla impurtanta per distanzas pli curtas. El è in'alternativa u ina cumplettaziun attractiva e favuraivla tar il traffic public e tar il traffic individual motorisà. La Regenza ha realisà quai ed ha relaschà l'onn 2019 il Plan sectorial Velo. Quel vul meglierar l'infrastructura da velo, augmentar la segirezza stradala e render uschia pli attractiv il traffic da velos. Tras quai duai vegnir augmentada la cumpart dal traffic da velos vi dal traffic total quotidian e da temp liber.

En il rom da la legislaziun stradala chantunala po il chantun pajar contribuziuns substanzialas a favur da la construcziun da vias da velo. Vias da velo èn quellas vias ch'èn destinadas a ciclistas e ciclists, ch'èn separadas dal vial da via cun mesiras architectonicas e ch'èn signalisadas correspundentamain (art. 1 al. 6 da l'Ordinaziun davart las reglas dal traffic sin via, ORT; CS 741.11). Il december 2021 ha il Cussegl grond acceptà l'incumbensa Cahenzli e fixà las contribuziuns chantunalas per vias da velo pauschalmain ad 80 pertschient per la rait da basa ed a 50 pertschient per la rait cumplementara.

Ils vials da velo percunter fan part da la via chantunala tenor la Lescha chantunala davart las vias (LVias; DG 807.100) e vegnan perquai finanziads per 100 pertschient dal chantun (art. 5 al. 1 lit. a LVias). Actualmain exista per las vischnancas pia in stimul finanzial da preferir la construcziun da vials da velo sin la via chantunala empè da vias da velo ch'èn separadas dal traffic cun mesiras architectonicas. Ils vials da velo dastgan vegnir utilisads er dal traffic motorisà, uschia ch'ils velos n'èn betg protegids suffizientamain cunter las participantas ed ils participants dal traffic pli svelt.

Cun la regulaziun actuala vegn promovida ina infrastructura da velo che tegna quint en emprima lingia da las pendularias e dals pendularis versads sco er da las ciclistas e dals ciclists da cursa. Per las famiglias, per las turistas ed ils turists, per las senioras ed ils seniors sco er per la gronda part da las ciclistas e dals ciclists dal mintgadi n'èn ils vials da velo sin las vias chantunalas betg adattads. Ina giada ch'in vial da velo è realisà, è la motivaziun fitg pitschna da construir supplementarmain ina via da velo per questa colliaziun. La regulaziun vertenta po perquai avair per consequenza che colliaziuns da velo impurtantas en il chantun na vegnan duraivlamain betg realisadas.

En vista als fauss impuls numnads dumondan las sutsegnadras ed ils sutsegnaders la Regenza:

  1. È er la Regenza da l'avis che las vias da velo, ch'èn separadas dal traffic cun mesiras architectonicas, èn pli cunvegnentas ch'ils vials da velo per realisar la rait da vias da velo per il traffic quotidian e da temp liber?
  2. Quinta la Regenza d'eliminar il fauss impuls finanzial ch'exista actualmain a favur dals vials da velo ed a disfavur da las vias da velo?
  3. È la Regenza pronta da gidar a finanziar supplementarmain vias da velo er là, nua ch'i dat gia vials da velo sin las vias chantunalas, sche quai è raschunaivel e cunvegnent?

Cuira, ils 3 da settember 2022

Gredig, Oesch, Kocher, Atanes, Bachmann, Bardill, Baselgia-Brunner, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Crameri (Igis), Degiacomi, Dietrich, Hartmann, Hoch, Hofmann, Kaiser, Kreiliger, Mazzetta, Nicolay, Preisig, Rusch Nigg, Rutishauser, von Ballmoos, Walser, Wilhelm

Resposta da la regenza

Tenor l'art. 6 al. 3 da la Lescha davart las vias dal chantun Grischun (LVias; DG 807.100) èn la projectaziun, la construcziun ed il mantegniment da stabiliments dal traffic betg motorisà incumbensas da las vischnancas. Perquai ston las vischnan­cas eliminar ils puncts debels da las colliaziuns dal traffic da velos quotidian sin la rait chantunala da vias da velo, ch'èn cuntegnids en il Plan sectorial chantunal Velo, sco er optimar la rait da temp liber per velos. Cun contribuziuns chantunalas promova il chantun la construcziun da la rait chantunala da vias da velo (art. 58 LVias). En cas d'ina utilisaziun multipla, sco tar vias da velo e sendas cumbinadas, vegnan eruids ils custs imputabels che correspundan a la cumpart dals velos. Sche l'infrastructura da velo sa chatta cumplainamain sin il perimeter da la via chantunala (vial da velo) van 100 pertschient dals custs sin donn e cust dal chantun. Quai è ina consequenza da la revisiun parziala da la Lescha davart las vias dal chantun Grischun ch'è entrada en vigur il 1. da schaner 2016 e che ha declerà ils vials da velo sin las vias chantunalas sco parts integralas da talas (art. 5 al. 1 lit. a LVias). Il motiv che ha dà l'impuls per quai è stada la ponderaziun, ch'i saja raschunaivel ch'ils vials da velo – secturs mar­cads sin la surfatscha da la via – vegnian mantegnids e signalisads tras il chantun (missiva carnet nr. 16 / 2014 – 2015, p. 933).

Tar la dumonda 1: Cun agid d'ina marcaziun separan ils vials da velo il traffic da velos dal traffic individual motorisà ed augmentan uschia la segirezza dal traffic. Ils vehichels a motor èn dentant autorisads da duvrar ils vials da velo ch'èn cunfinads cun ina lingia interrutta. Surpassaments stretgs restan pussaivels, perquai ch'i manca ina separaziun architectonica. Bleras ciclistas e blers ciclists n'han perquai betg in sentiment da segirezza bler meglier sin ils vials da velo. Cun ina ladezza normala dad 1,50 m directamain sper ils vials dals vehichels a motor èn ils vials da velo pauc attractivs per ina gronda part da las persunas che van cun velo. Correspundentamain ha la Regenza gia fixà en il Plan sectorial chantunal Velo, che per motivs da segirez­za e d'attractivitad stoppia il traffic quotidian da velos vegnir manà – sche pussaivel e raschunaivel – sin vias separadas senza vehichels a motor resp. sin vias da velo (directiva da projectaziun, chapitel 1.1). Il medem vala per il traffic da temp liber da velos. En cas excepziunals po la realisaziun da vials da velo esser giustifitgada, per exempel sche la topografia impedescha la separaziun architectonica dal traffic da velos. Pussaivel èsi er, che conflicts da segirezza sin la via chantunala pretendan in vial da velo, sco per exempel, sch'i sa furman colonnas sin il vial da las rutas da velo da cursa preferidas che maina ensi. La Regenza sustegna dentant da princip la separaziun architectonica dal traffic motorisà dal traffic da velos.

Tar la dumonda 2: Ina gronda part che s'augmenta fermamain da la populaziun pre­tenda ina buna rait da vias da velo. Il squitsch sin las vischnancas daventa pli e pli grond. L'infrastructura da velo che vegn pretendida vegn dentant realisada mo plaun­sieu. En sia resposta a l'incumbensa Cahenzli-Philipp concernent la rait da vias da velo dal traffic quotidian sco incumbensa chantunala ha la Regenza perquai stgaffì in impuls finanzial ed empermess d'exaurir il rom da las contribuziuns prescrit e d'intro­ducir ina tariffa da contribuziun unitara dad 80 pertschient (rait da basa) e da 50 pertschient (rait cumplementara) per la rait chantunala da vias da velo dal traffic quotidian. Igl è dentant er vegnì fixà che la projectaziun e la construcziun da questas colliaziuns stoppian restar incumbensas cuminaivlas, cunquai che la rait da vias da velo dal traffic quotidian sa chattia per gronda part sin vias communalas cun utilisa­ziuns multiplas (conclus dals 26 d'october 2021, prot. nr. 930/2021). La finanziaziun cumplaina da vias da velo, analogamain a quella da vials da velo, premettess ina cumpetenza dal chantun per il traffic da velos e pia ina midada da la repartiziun da las incumbensas sco ch'ella è fixada en la Lescha davart las vias.

Tar la dumonda 3: Las premissas per survegnir contribuziuns per stabiliments da vias da velo èn fixadas en l'art. 31 da l'Ordinaziun davart las vias dal chantun Grischun (OVias; DG 807.110). Sch'ina via da velo correspunda a quests criteris, paja il chantun ina contribuziun finanziala. Quai vala er, sch'igl è vegnì realisà en il medem lieu in vial da velo sin la via chantunala. Tenor la legislaziun vertenta n'è l'existenza da vials da velo sin vias chantunalas nagin criteri ch'excluda il pajament da contribuziuns a stabiliments da vias da velo.

21 d'october 2022