L'onn da corona 2021 ha il chantun Grischun fatg in plus operativ da 139,4 milliuns francs. Tras il surpli dal retgav crescha l'agen chapital ch'è libramain disponibel sin 628 milliuns francs. Sch'ins resguarda l'agen chapital ch'è lià ad intents (finanziaziuns spezialas e prefinanziaziuns), importa l'agen chapital passa 1,2 milliardas francs.
Malgrà las sfidas futuras è la situaziun finanziala actuala dal chantun fitg buna – per betg dir memia buna, sch'ins guarda sin l'art. 93 al. 2 da la Constituziun chantunala («Las finanzas duain, considerond il svilup economic, esser equilibradas a media vista.»).
Per las persunas giuridicas èn actualmain anc avertas memia bleras dumondas da la politica naziunala concernent l'imposiziun minimala da taglia tenor la OECD. Percunter ston e pon ins agir immediatamain per distgargiar famiglias, pèrs cun duas pajas e persunas spezialisadas (potenzialas). Quai en vista a la mancanza da persunas spezialisadas, en vista a la promoziun da l'attractivitad da la cumpatibilitad da la professiun cun la famiglia sco er en vista al fatg che la populaziun grischuna vegn pli e pli veglia. Ultra da diversas mesiras ch'èn gia pendentas tar il chantun (p.ex. revisiun totala da la Lescha davart la promoziun da la tgira d'uffants cumplementara a la famiglia en il chantun Grischun), è er la concepziun da l'imposiziun da taglia a las persunas natiralas ina incumbensa centrala dal Cussegl grond per meglierar las cundiziuns generalas.
Las cundiziuns generalas fiscalas per famiglias e per persunas spezialisadas (potenzialas) duessan ussa perquai vegnir examinadas e vegnir suttamessas al Cussegl grond per pudair adattar las cundiziuns generalas legalas.
En il center stat per exempel l'examinaziun da las deducziuns per uffants, da las deducziuns dals custs per la tgira d'uffants tras terzas persunas, ma er da las deducziuns per pèrs cun duas pajas. Ultra da quai pudess eventualmain la concepziun da la progressiun fiscala vegnir analisada criticamain en vista als pèrs da la classa mesauna cun duas pajas. Areguard las persunas spezialisadas stuess en spezial l'imposiziun da la taglia a la funtauna vegnir integrada en las ponderaziuns. Da quai pudessan profitar cunzunt ils patruns dals secturs da l'industria principala e secundara da construcziun u dal turissem. Natiralmain èn las incumbensadras ed ils incumbensaders er averts per propostas supplementaras u alternativas.
Las sutsegnadras ed ils sutsegnaders incumbenseschan correspundentamain la Regenza da suttametter al Cussegl grond in project concret per distgargiar fiscalmain famiglias e persunas spezialisadas (potenzialas), cun la finamira da meglierar l'attractivitad per las gruppas en mira respectivas en la cumparegliaziun naziunala ed internaziunala.
Cuira, ils 3 da settember 2022
Hohl, Bettinaglio, Koch, Adank, Altmann, Bergamin, Berweger, Binkert, Brandenburger, Brunold, Bundi, Butzerin, Cahenzli (Trin Mulin), Caluori, Candrian, Casutt, Censi, Claus, Collenberg, Crameri (Surava), Danuser (Cazas), Della Cà, Derungs, Dürler, Epp, Favre Accola, Föhn, Furger, Gansner, Gort, Grass, Hartmann, Hefti, Heini, Holzinger-Loretz, Hug, Jochum, Kasper, Kienz, Kocher, Kohler, Krättli, Kuoni, Lamprecht, Lehner, Loepfe, Loi, Luzio, Maissen, Mani, Menghini-Inauen, Messmer-Blumer, Metzger, Michael (Donat), Michael (Castasegna), Mittner, Morf, Natter, Pfäffli, Rageth, Rauch, Righetti, Rodigari, Roffler, Rüegg, Said Bucher, Salis, Sax, Schneider, Schutz, Sgier, Stiffler, Stocker, Tanner, Thür-Suter, Tomaschett, Widmer, Wieland, Zanetti (Sent), Zanetti (Landquart)