Pervia da la structura demografica da la populaziun exista en il Grischun ina mancanza da forzas da lavur. En l'avegnir vegn questa mancanza a daventar pli e pli acuta. Dapi in tschert temp s'occupa er il Forum economic dal Grischun da la tematica. Il settember 2022 ha el publitgà in rapport «Mancanza da persunal e da persunas spezialisadas en il Grischun: perspectivas e propostas da mesiras». Tenor quel èn l'augment da las uras da lavur da las abitantas e dals abitants dal Grischun sco er la meglieraziun dal saldo da pendularias e pendularis e dal saldo da migraziun las basas per strategias raschunaivlas. Sco mesiras adattadas che pudessan vegnir realisadas per gronda part dal chantun (per part gia en elavuraziun respectivamain en realisaziun) vegnan proponidas las suandantas:
- stgaffir impuls finanzials per in'ulteriura activitad da gudogn en la vegliadetgna da renta
- obligar las vischnancas d'extender la tgira d'uffants cumplementara a la famiglia
- conceder ina deducziun pli gronda per la tgira d'uffants tar las taglias chantunalas
- accelerar il traffic da cunfin (particularmain sur il pass dal Bernina e dal Malögia)
- rinforzar las scolas autas en il Grischun (p.ex. campus SASGR)
- promover sistematicamain ulteriuras infrastructuras orientadas als basegns e svilups da products innovativs (attractivitad da purschidas da temp liber e da sport)
- examinar, sche la rait a bindel fitg lad è suffizienta per la quantitad da datas che vegn spetgada en l'avegnir e sche las mesiras prendidas en las regiuns bastan
- restructurar la grevezza fiscala (p.ex. engrevgiar pli ferm las immobiglias a favur d'ina taglia sin las entradas pli bassa; tariffa da taglia pli bassa per immobiglias industrialas che per immobiglias per intents d'abitar)
- trair a niz il potenzial da studentas e students da terzs stadis cun adattar la pratica d'admissiun per activitads da gudogn accessoricas a las directivas da la Confederaziun
- sustegnair la purschida da Benefits pertutgant il Grischun per tut las lavurantas ed ils lavurants
- realisar ina midada da paradigma tar il marketing chantunal dal lieu (focussar sin interpresas sco er sin forzas da lavur potenzialas)
- survegliar il svilup dal martgà da lavur
- sviluppar vinavant il e-government en l'administraziun publica
- promover innovaziuns processualas e models da fatschenta innovativs
Las sutsegnadras ed ils sutsegnaders supplitgeschan la Regenza da communitgar,
- tge propostas menziunadas qua survart che vegnan persequitadas vinavant en tge spazi da temp (respostas en furma da tabella bastan);
- pertge che tschertas propostas na vegnan betg elavuradas vinavant e pertge ch'ellas n'èn betg cunvegnentas ord vista da la Regenza;
- tge ulteriuras propostas concernent la mancanza da forzas da lavur e da persunas spezialisadas che vegnan elavuradas en tge spazi da temp.
Cuira, ils 19 d'october 2022
Kappeler, Loepfe, Baselgia, Badrutt, Bardill, Bavier, Bettinaglio, Biert, Bischof, Bleuler-Jenny, Brunold, Cahenzli-Philipp (Vaz Sut), Collenberg, Danuser (Cuira), Derungs, Dietrich, Epp, Gansner, Gartmann-Albin, Heini, Hoch, Kreiliger, Mani, Messmer-Blumer, Michael (Castasegna), Oesch, Rageth, Schutz, von Ballmoos, Widmer, Zanetti (Sent)