Navigation

Inhaltsbereich

Dumonda Gredig concernent la liberaziun da la taglia da traffic per vehichels dal traffic public

Sessiun: 19.10.2022

Per vehichels a motor ch'èn immatriculads en il Grischun èsi da pajar mintga onn ina taglia da traffic. Suenter la deducziun dals custs da l'Uffizi per il traffic sin via vegnan questas entradas fiscalas dabun a la finanziaziun speziala Vias. Exceptads da l'obli­gaziun da pajar taglia èn mo ils vehichels dal chantun, da las organisaziuns a glisch blaua sco er da las persunas cun in impediment.

Betg exceptads n'èn ils vehichels dal traffic public. Per ils bus da lingia sco er per ils vehichels da servetsch da las interpresas da transport public ston vegnir pajadas taglias da traffic. Il traffic public sin via è d'interess public e gida essenzialmain a reducir il dumber da vehichels sin la rait da vias. Per quest motiv libereschan ils blers chantuns ils vehichels dal traffic public da la taglia da traffic, uschia p.ex. ils chantuns da la Svizra Orientala Son Gagl, Turgovia e Schaffusa.

Las interpresas da transport pon bain metter a quint questas taglias da traffic numnadas al chantun sco empustader dal traffic public regiunal. Quai chaschuna dentant custs supplementars inutils ed ina redistribuziun dals daners da la promoziun dal traffic public a la finanziaziun speziala Vias. Ultra da quai restan questas taglias per las vischnancas cun bus locals u per las destinaziuns turisticas cun bus da skis e da viandar. Il chantun na sa participescha numnadamain betg a la finanziaziun da questas purschidas.

Sut quest aspect vulessan las sutsegnadras ed ils sutsegnaders perquai savair il suandant da la Regenza:

  1. Quant aut è l'import total che vegn pajà mintga onn per vehichels dal traffic public sco taglia da traffic?
  2. È la Regenza er da l'opiniun, ch'il traffic public sin via gidia a reducir il dumber da vehichels sin las vias?
  3. Èsi raschunaivel sut quest aspect, ch'i ston vegnir pajadas taglias da traffic per ils vehichels dal traffic public?
  4. Datti ina pussaivladad – cun las basas giuridicas vertentas – da liberar ils vehichels dal traffic public da la taglia da traffic, sco che quai vegn pratitgà en ils auters chantuns da la Svizra Orientala?

Cuira, ils 19 d'october 2022

Gredig, Bergamin, Perl, Atanes, Bardill, Baselgia, Bavier, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Dietrich, Gartmann-Albin, Hoch, Kaiser, Kreiliger, Maissen, Mazzetta, Müller, Nicolay, Pfäffli, Preisig, Rageth, Rettich, Rusch Nigg, Rutishauser, Said Bucher, Schneider, von Ballmoos, Walser, Widmer, Wilhelm

Resposta da la regenza

Tenor l'art. 10 al. 1 da la Lescha introductiva tar la Lescha federala davart il traffic sin via (LItLTV; DG 870.100) pajan las possessuras ed ils possessurs da vehichels a motor ch'èn immatriculads en il Grischun mintga onn ina taglia da traffic. Tenor l'art. 13 al. 1 lit. b da la medema lescha vegn la taglia da traffic per vehichels en il servetsch public reducida fin 50 pertschient, sch'ils vehichels èn equipads spezial­main per quai e sch'els vegnan er duvrads per quest intent.

Sin dumonda e sin basa da l'art. 16 al. 1 lit. b da l'Ordinaziun tar la Lescha introduc­tiva tar la Lescha federala davart il traffic sin via (ORtLItLTV; DG 870.110) po l'Uffizi per il traffic sin via reducir la taglia da traffic per 50 pertschient per vehichels che ve­gnan duvrads tenor il document dal vehichel per il traffic public da lingia. Sin funda­ment da quai e sin dumonda vegn concedida ozendi ina taglia da traffic da 50 per­tschient per vehichels dal traffic public.

Tar la dumonda 1: Per vehichels dal traffic public vegn pajà mintga onn en il chantun Grischun in import da taglia da traffic da total var 400 000 francs.

Tar la dumonda 2: Ins po partir dal fatg, ch'ina part da las viagiaturas e dals viagia­turs utilisass l'agen vehichel, sch'i na dess betg il traffic public sin via.

Tar la dumonda 3: Tenor l'art. 56 al. 1 lit. b da la Lescha davart las vias dal chantun Grischun (LVias; DG 807.100) van las taglias da traffic cumplainamain a favur dal quint da las vias e servan en quest connex al mantegniment, a la construcziun ed a la gestiun da las vias en il chantun Grischun sco er al traffic betg motorisà. Sche l'import croda davent u vegn reducì considerablamain, stuess quel vegnir cumpensà tras daners da taglia generals supplementars, ubain che las expensas correspunden­tas en il sectur da la via stuessan vegnir reducidas.

Per reducir las emissiuns dal sectur traffic confurm a las finamiras propona il Plan d'acziun Green Deal per il Grischun tranter auter da rinforzar la promoziun dal traffic public. Sut quest aspect è la Regenza da l'opiniun, ch'i vala tuttavia la paina d'exami­nar, sch'ins pudess liberar ils vehichels dal traffic public en il chantun Grischun da l'obligaziun da pajar taglia da traffic.

Tar la dumonda 4:La liberaziun da la taglia da traffic per vehichels a motor è reglada en il chantun Grischun en l'art. 12 LItLTV. Vehichels dal traffic public n'èn betg men­ziunads en quest lieu. In'adattaziun correspundenta chaschunass ina revisiun par­ziala da la LItLTV. 

15 da december 2022