Navigation

Inhaltsbereich

Dumonda Metzger concernent la realisaziun lunga e stentusa da projects da bike

Sessiun: 19.10.2022

Las destinaziuns turisticas dal Grischun sa posiziuneschan strategicamain en il sectur da velos da muntogna. Quai pertutga en spezial, dentant betg mo, er l'Engiadin'Ota. Là è per exempel vegnida stgaffida ils onns 2012 fin 2019 ina buna purschida da basa per il sport da mountainbike, quai cun la construcziun da trais flowtrails a San Murezzan e da trails a Silvaplauna ed a Zuoz sco er cun l'adattaziun da la ruta dal Bernina e cun la renovaziun e l'optimaziun da sendas da viandar. Dapi l'onn 2020 èsi daventà pli difficil da survegnir la permissiun per novs projects da mountainbike. Dumondas èn vegnidas refusadas. Tenor las persunas responsablas da las destinaziuns turisticas crititgeschan en spezial l'Uffizi chantunal per la natira e l'ambient e las organisaziuns per la protecziun da l'ambient, ch'i manchian ils instruments da planisaziun (plan directiv, plans generals d'avertura). L'elavuraziun da tals instruments respectivamain lur revisiun u lur cumplettaziun sco er ils conclus respectivs necessaris da las radunanzas communalas u dals parlaments communals ed en votaziuns a l'urna sco er la procedura d'approvaziun da la Regenza dovran dentant extraordinariamain bler temp. Il minimum absolut èn plirs onns. Per quest motiv na vegnan ozendi strusch pli insumma inizialisads novs projects. En autras destinaziuns è la situaziun probablamain sumeglianta.

Ils ultims onns ha il sport da mountainbike fatg in svilup rasant. Ed ina fin da quest svilup n'è betg en vista. Il dumber da ciclistas e ciclists è s'augmentà fermamain ils ultims onns.

En quest connex dumandain nus la Regenza il suandant:

  1. Èsi necessari – tenor il dretg federal – d'elavurar l'emprim plans directivs regiunals e plans generals d'avertura sin plaun communal per pudair conceder permissiuns per novs trails da mountainbike?
    • Sche gea, co pudess la procedura per realisar quests plans vegnir reducida ad in minimum absolut concernent la birocrazia ed il temp?
    • Sche na, pertga pretenda il chantun lura oz l'emprim quests plans, cuntrari a pli baud (fin l'onn 2019)?
  2. È la Regenza pronta d'examinar svelt – en il rom dal dretg surordinà – las basas giuridicas actualas (premissas per la permissiun, andaments da la procedura) e – sche pussaivel – da realisar mesiras sin il stgalim d'ina ordinaziun u – sche necessari – da far ina proposta sin il stgalim d'ina lescha per cuntanscher l'effizienza giavischada?

Cuira, ils 19 d'october 2022

Metzger, Berweger, Binkert, Altmann, Bachmann, Bavier, Bergamin, Berther, Bettinaglio, Biert, Bleuler-Jenny, Brandenburger, Butzerin, Candrian, Casutt, Censi, Collenberg, Cortesi, Crameri, Danuser (Cazas), Della Cà, Derungs, Dürler, Epp, Furger, Gansner, Gort, Grass, Hartmann, Hefti, Hohl, Hug, Jochum, Kasper, Kienz, Koch, Kocher, Krättli, Lamprecht, Lehner, Loepfe, Luzio, Maissen, Mani, Menghini-Inauen, Michael (Castasegna), Morf, Nicolay, Pfäffli, Rauch, Roffler, Salis, Schutz, Sgier, Tomaschett, Ulber, Walser, Weber, Wieland, Zanetti (Sent)

Resposta da la regenza

Tar la dumonda 1: Tenor l'art. 2 da la Lescha federala davart la planisaziun dal territori (LPT; CS 700) vala in'obligaziun da planisaziun per incumbensas che han in effect sin il territori. Ultra da quai pon edifizis e stabiliments ordaifer la zona da con­strucziun, che n'èn betg confurms a la zona, vegnir permess mo, sch'els èn liads al lieu e sche nagins interess predominants s'opponan ad els (art. 24 LPT). Ils instru­ments da planisaziun da la planisaziun dal territori servan a motivar la dependenza dal lieu ed a considerar ils interess pertutgads. L'obligaziun da planisaziun, la consi­deraziun dals interess e la dependenza dal lieu èn prescripziuns dal dretg federal che ston vegnir applitgadas er per projects da bike. Igl è chaussa dals chantuns da realisar questas prescripziuns confurm al stgalim. La pratica per il chantun Grischun, che observa las prescripziuns giuridicas, è descritta en il mussavia «Velos da mun­togna e planisaziun dal territori» ch'è vegnì publitgà l'onn 2012 e revedì l'onn 2015. Dapi lura n'hai dà midadas ni en la pratica ni en il dretg. Il mussavia resguarda en moda cumplessiva las cundiziuns generalas effectivas e giuridicas e promova l'execuziun effectiva. Tut tenor la cumplexitad dal project valan differentas preten­siuns: ina inscripziun en il plan directiv regiunal (PDReg) è necessaria mo per la construcziun da novas rutas (vias) da bike cun in basegn da coordinaziun pli grond, er intercommunal. Implants da velos da muntogna sco pistas da downhill e da freeride ubain uschenumnads flowtrails na dovran per regla betg ina basa en il PDReg, dentant ina inscripziun en il plan general d'avertura (PGA) da la vischnanca. Per signalisaziuns sin las vias existentas na dovri tenor l'art. 40 al. 1 da l'Ordinaziun davart la planisaziun dal territori per il chantun Grischun (OPTGR; D 801.110) nagina permissiun.

Ils retards na resultan betg pervia da lungas proceduras, mabain pervia da conflicts territorials. Tranter auter il boom dals e-bikes ha procurà che dapli persunas van cun velo da muntogna. Quai chaschuna natiralmain er dapli conflicts cun auters interess d'utilisaziun e da protecziun. Igl è pussaivel da gudagnar temp cun chattar soluziuns, sch'ils interess pertutgads vegnan communitgads en moda cumplessiva ed integrads a temp. Ina metoda per minimar conflicts e pia er per accelerar la procedura èn de­tretschaments territorials, p.ex. cun intensivar l'ir cun velo da muntogna en tschertas parts da la destinaziun ed il viandar plitgunsch en las autras. Questa metoda è adat­tada là, nua ch'ina coexistenza n'è betg sa cumprovada resp. betg pussaivla u nua ch'ins ha la chaschun da detretschar, perquai ch'i dat avunda vias attractivas. Il PDReg è in instrument adattà per coordinar talas priorisaziuns sin plaun intercommu­nal. In'autra metoda èn detretschaments cun signalisar raits da vias separadas u cun guntgir territoris sensibels. Il PGA è in instrument adattà per francar tals detretscha­ments, per als legitimar democraticamain e la finala per als fixar en moda lianta per las proprietarias ed ils proprietaris dals bains immobigliars. Senza determinaziuns correspundentas en il PGA stuessan novas vias da velo da muntogna avair ina de­pendenza dal lieu relativa per pudair vegnir permessas en il rom da la procedura EOZ. En auters chantuns, che n'enconuschan betg il PGA, chaschuna quai regular­main problems ed – en cas da protestas – er retardaments processuals. Sco ch'il ba­rat d'experientschas a chaschun da diversas dietas spezialisadas (p.ex. al Congress annual da ride a Tavau u a la dieta da graubündenMOBIL davart il traffic betg motori­sà) ed en gremis professiunals (p.ex. en la Cumissiun per la planisaziun d'utilisaziun da la Conferenza dals planisaders chantunals) ha mussà, ha il PGA gronds avan­tatgs sco instrument da planisaziun ed accelerescha la finala schizunt la realisaziun da projects da bike, perquai che tals resistan uschia plitgunsch ad in'examinaziun giudiziala.

Tar la dumonda 2: La regulaziun prescritta è sa cumprovada en la pratica. La Regen­za na vesa perquai nagin basegn d'adattar il dretg chantunal vertent. Er en il rom dal dretg federal na sa mussan naginas libertads d'agir che purtassan meglieraziuns. Sin dumonda è l'Uffizi per il svilup dal territori gugent pront da cussegliar e da sustegnair las regiuns e las vischnancas en lur planisaziuns da projects da bike.

22 da december 2022