Navigation

Inhaltsbereich

Dumonda Loepfe concernent l'applicaziun dal criteri «raritad» tar la realisaziun da la CIMFS

Sessiun: 15.02.2023

La Cunvegna interchantunala davart la medischina fermamain spezialisada (CIMFS) è la basa legala per il relasch da la glista dals ospitals da la medischina fermamain spezialisada (MFS) e fixescha ils process da decisiun dals organs da la CIMFS. Ultra da quai definescha ella ils criteris ch'in sectur da prestaziun sto ademplir per valair sco MFS en il senn da la CIMFS. Tut ils 26 chantuns fan part da la CIMFS ed èn uschia s'obligads da planisar cuminaivlamain en quest sectur.

Ils secturs da prestaziun ch'èn attribuids a la MFS èn privads da la planisaziun dals ospitals dals chantuns. L'attribuziun d'in sectur da prestaziun da la MFS premetta, che l'intervenziun medicala è rara (art. 1 al. 1 CIMFS). La radunanza plenara da la Conferenza svizra da las directuras e dals directurs chantunals da sanadad (CDS) dals 14 da mars 2008 ha fixà la limita critica per malsognas raras a main che 1 fin 5 tractaments per mais (per exempel: transplantaziuns dal cor tar main che 12 pazients per onn).

Sin la dumonda Caduff concernent la realisaziun da la CIMFS ha la Regenza explitgà en sia resposta dals 23 d'avust 2013, ch'ella na saja per gronda part betg perencletga cun il proceder da l'organ spezialisà e da l'organ da decisiun da la CIMFS. I vegnian attribuids a la medischina fermamain spezialisada pli e pli prestaziuns e secturs, nua ch'ils criteris fixads en la cunvegna da l'attribuziun a la medischina fermamain spezialisada – en spezial il criteri da la raritad dals cas – n'existian ord vista objectiva betg u mo en moda limitada.

En connex cun l'attribuziun da prestaziuns a la MFS constateschan las deputadas ed ils deputads sutsegnads, ch'il criteri «raritad» na vegn vinavant betg resguardà u mo insuffizientamain. Pli e pli vegnan prestaziuns cun adina pli auts dumbers da cas attribuids a la MFS. Il pli nov exempel è l'attribuziun da la tgira intensiva da naschientschas prematuras u a termin (3600 cas per onn) en il sectur da la pediatria. Quai avess per consequenza che tractaments che vegnan fatgs oz – u eventualmain er novs – na pudessan en l'avegnir betg pli vegnir purschids en il chantun Grischun. Ins pudess numnar qua blers auters exempels. Il provediment vast e damanaivel dal lieu da domicil da la populaziun dal Grischun, sco er da regiuns vischinas sco per exempel la regiun da Sargans, ed er da numerus giasts, vegn uschia periclità essenzialmain.

Las deputadas ed ils deputads sutsegnads tschentan en quest connex perquai las suandantas dumondas a la Regenza:

  1. En vista a la segirezza dal provediment: Co giuditgescha la Regenza il svilup en connex cun l'attribuziun da prestaziuns e secturs a la medischina fermamain spezialisada?
  2. Tge fa la Regenza – eventualmain ensemen cun auters chantuns – per pudair cuntanscher che l'organ da decisiun applitgeschia il criteri da «raritad», uschia sco quai ch'igl era vegnì empermess, respectivamain garantì als chantuns en il rom da la procedura da participaziun, e che la segirezza dal provediment en tut las parts dal pajais stettia puspè en il center?
  3. Sche l'organ da decisiun insista sin sia pratica d'interpretaziun extensiva dal criteri «raritad» e na vul betg relaschar prestaziuns cun gronds dumbers da cas or da l'attribuziun a la medischina fermamain spezialisada: Fiss la Regenza pronta da sortir da la CIMFS e tge consequenzas avess ina sortida dal Grischun ord vista da la Regenza?

Cuira, ils 15 da favrer 2023

Loepfe, Cahenzli-Philipp (Vaz Sut), Natter, Altmann, Bachmann, Bardill, Baselgia, Beeli, Bergamin, Berther, Biert, Binkert, Bischof, Bisculm Jörg, Bleuler-Jenny, Brandenburger, Brunold, Censi, Collenberg, Crameri, Degiacomi, Derungs, Dietrich, Epp, Favre Accola, Feuerstein, Föhn, Furger, Gansner, Gartmann-Albin, Grass, Haltiner, Heini, Hoch, Hofmann, Hohl, Holzinger-Loretz, Kasper, Kienz, Kohler, Kreiliger, Lamprecht, Maissen, Mani, Messmer-Blumer, Michael (Donat), Nicolay, Oesch, Pajic, Rageth, Rettich, Righetti, Rutishauser, Saratz Cazin, Sax, Schneider, Spagnolatti, Stiffler, Tanner, Thür-Suter, Tomaschett, Ulber, von Ballmoos, von Tscharner, Walser, Wieland, Zanetti (Sent), Zaugg-Ettlin

Resposta da la regenza

Tar la dumonda 1: Cun preoccupaziun ha la Regenza prendì enconuschientscha da la pratica da l'organ spezialisà e da l'organ da decisiun da la Cunvegna interchantu­nala davart la medischina fermamain spezialisada (CIMFS). Cuntrari a la definiziun da la radunanza plenara dals 14 da mars 2008 attribueschan ils dus organs adina pli savens secturs e prestaziuns cun gronds dumbers da cas a la medischina fermamain spezialisada. Uschia retiran els quests cas dal champ da cumpetenza dals chantuns. En quest connex stoi er vegnir menziunà, che secturs da prestaziun respectivamain malsognas vegnan classifitgads senza motivs medicinals en secturs parzials, e quai en divergenza da las valitaziuns da persunas spezialisadas cumprovadas. Quai ha per consequenza che l'Ospital chantunal dal Grischun ristga da betg pli pudair furnir en l'avegnir tractaments che valan oz sco spezialisads, perquai che quels vegnan classifitgads da nov sco prestaziuns fermamain spezialisadas. Quai pertutga per exempel il provediment d'uffants en cas d'urgenza e probablamain er la chirurgia d'accidents spezialisada. Quai na restrenscha betg mo il spectrum da prestaziuns da l'Ospital chantunal dal Grischun, mabain tut ils ospitals en il Grischun. Per ch'il Gri­schun restia in ferm lieu d'ospitals cun in provediment da basa cumplessiv dovri in ospital dal center cun in vast portfolio da prestaziuns, e quai er en ils secturs spezia­lisads.

Tar la dumonda 2: Sur il departament cumpetent vegn la Regenza ad intervegnir tar l'organ da decisiun, per ch'il criteri «raritad» vegnia applitgà – tar l'attribuziun da sec­turs e da prestaziuns a la medischina fermamain spezialisada – uschia, sco quai ch'igl era vegnì garantì als chantuns en il rom da la procedura da participaziun a la cunvegna. Per motivs pratics vegn questa intervenziun fatga en cooperaziun cun au­ters chantuns ch'èn pertutgads en medema maniera da la pratica dals organs da la CIMFS numnads qua survart. En quest connex sto probablamain vegnir messa en dumonda particularmain la constellaziun da l'organ spezialisà. Quel sa cumpona numnadamain principalmain – ultra da represchentantas e represchentants da gronds ospitals da l'exteriur – da represchentantas e represchentants dals ospitals universitars e dals ospitals dals centers gronds. Persunas d'ospitals dals centers mesauns n'èn betg represchentadas en l'organ spezialisà, in fatg che po er declerar la pratica da l'organ spezialisà.

Tar la dumonda 3: Sche l'organ spezialisà e pia er l'organ da decisiun insistan sin lur pratica extensiva d'interpretar la premissa «raritad», è la Regenza pronta da conside­rar ina sortida da la CIMFS ed eventualmain da suttametter tala al conclus dal Cus­segl grond. Per motivs pratics duai ina tala sortida avair lieu ensemen cun auters chantuns ch'èn pertutgads en medema maniera da la pratica extensiva dals dus or­gans. La CIMFS perda sia vigur, sch'il dumber da commembers sutpassa 17. Sche mo paucs chantuns sortan, ston ins partir dal fatg, che la CIMFS survegnia puspè cumplettamain la cumpetenza da decretar la glista d'ospitals. En quest cas na pon ins betg excluder, ch'il Cussegl federal vegn a proponer al Parlament federal da de­clerar la CIMFS sco generalmain lianta, quai sin dumonda dals chantuns interessads. Ils chantuns sortids pudessan alura far valair lur interess tar il Parlament federal en il rom da la consultaziun respectiva e da las debattas che suondan. Tge ulteriurs ef­fects ch'ina smanatscha da sortir dal chantun Grischun u ina sortida effectiva vegnan ad avair, na po oz betg vegnir giuditgà definitivamain.

19 d'avrigl 2023