Statisticamain èn giuvenils nunbinars pertutgads pli savens da depressiun, da suicidi e da violenza. La ristga da far suicidi è fin 8 giadas pli gronda en cumparegliaziun cun giuvenils cissexuals u eterosexuals! Il stress eteronormativ, la mancanza d'exempels e da stereotips sco er las exclusiuns en scola, en l'emprendissadi, en la professiun e durant il temp liber augmentan questa ristga. Anc adina è il mintgadi dals giuvenils queers marcà d'umiliaziuns da lur identitad da schlattaina e/u da lur orientaziun sexuala. Ingiurias che sa drizzan cunter l'autodeterminaziun da lur percepziun sexuala, èn anc adina snuaivlamain preschentas sin ils areals da scola, en il sport ed en la lavur cun giuvenils. Ina simpla purschida da barat, da cussegliaziun e da colliaziun, en in lieu, nua ch'i las vegn purschì explicitamain in spazi segir per lur gender respectivamain per lur orientaziun sexuala, è necessaria per che las persunas pertutgadas possian sa sviluppar en moda sauna. Il center da giuventetgna queer treff.LGBT+ a Cuira surpiglia en quest reguard ina rolla da sustegn impurtanta per giuvenils nunbinars dal chantun Grischun, dentant er d'autras regiuns, nua ch'in tal lieu d'inscunter manca.
Gugent supplitgesch jau perquai la Regenza da respunder las suandantas dumondas:
- Tenor ina infurmaziun en scrit dal chantun è vegnì garantì in import da 3000 francs al center da giuventetgna queer per l'entir onn 2024. I sa tschenta la dumonda, per tge che quests 3000 francs èn pensads. Els na permettan numnadamain ni da pajar il tschains da locaziun dals locals, ni er mo ina part da l'indemnisaziun per ils servetschs persunals?
- Po il chantun responsar da serrar il lieu d'inscunter queer e da chaschunar uschia consequenzas da sanadad eventualmain dramaticas per ils giuvenils?
- Co vul il chantun reducir l'auta barriera per uffants, per giuvenils e per giuvnas persunas creschidas queeras da dumandar agid professiunal, sche betg tras la simpla purschida ch'i dat mo en il lieu d'inscunter da giuventetgna queer a Cuira?
- Tge projects da furmaziun cun il tema inclusiun pertutgant LGBTIAQ+ cun uffants, cun giuvenils e cun persunas giuvnas creschidas datti en il chantun Grischun, per pudair eliminar pregiudizis e promover l'acceptanza?
Cuira, ils 2 da settember 2023
Bischof, Holzinger-Loretz, Gansner, Atanes, Bachmann, Bardill, Baselgia, Biert, Bisculm Jörg, Bleuler-Jenny, Cahenzli-Philipp, Danuser (Cuira), Degiacomi, Dietrich, Gartmann-Albin, Gredig, Hoch, Kaiser, Kohler, Kreiliger, Mazzetta, Müller, Nicolay, Perl, Preisig, Rageth, Rettich, Rusch Nigg, Rutishauser, Saratz Cazin, von Ballmoos, Wilhelm