Navigation

Inhaltsbereich

Dumonda Cortesi concernent la reducziun dal privel da blessuras per motociclistas e motociclists sco er per ciclistas e ciclists grazia ad aissas da protecziun vi da saivs directivas

Sessiun: 02.09.2023

Saivs directivas reduceschan en moda decisiva grevas consequenzas d'accidents. Ellas impedeschan numnadamain che vehichels vegnian giu da via. Quai ch'è in avantatg per automobilists e per camiunists, è percunter savens in privel da mort per motociclistas e motociclists dentant er per ciclistas e ciclists.

Il privel il pli grond n'èn betg las uschenumnadas spundas directivas, mabain las pitgas, vi da las qualas las saivs directivas èn francadas. Talas chaschunan savens la mort da motociclistas e motociclists. Zunt privlus èsi, che las pitgas han per il pli urs gizs. Membra separada dal corp u er grevas blessuras internas èn consequenzas tipicas en cas da tals accidents.

Per la Svizra existan paucas datas statisticas en chaussa. In studi dal Institut für Zweiradsicherheit (ifz) ad Essen D mussa dentant, che quasi 61 pertschient da las manischunzas e dals manischunzs da vehichels a duas rodas che vegnan giu d'ina via cun ina saiv directiva senza aissa da protecziun, vegnan blessads grevamain u perdan la vita. Gia ina collisiun cun tempo 35 cunter ina pitga d'ina saiv directiva, che ha ina furma agressiva, po chaschunar fitg grevas blessuras.

Per il chantun Grischun percunter existan cifras exactas davart accidents da traffic cun vehichels a duas rodas (Funtauna: Polizia chantunala dal Grischun) e questas cifras inditgeschan in svilup pauc legraivel. L'onn 2022 èn vegnidas blessadas grevamain – mo en accidents da traffic cun motos – 42 persunas (+16 en cumparegliaziun cun l'onn precedent) ed 8 mazzadas (+4). Sin ils pass fermamain frequentads èn capitads – per menziunar trais exempels – sin il Pass dal Flüela 14 accidents cun 11 persunas blessadas ed 1 persuna mazzada, sin il Pass dal Bernina 8 accidents cun 5 persunas mazzadas e sin il Pass dal Güglia 7 accidents cun 5 persunas blessadas. Sin il pass dal Güglia èn collidadas en tut en tut 13 accidents da moto (2021+2022) 5 persunas cun la saiv directiva. Quai correspunda quasi ad in terz. Quest exempel mussa, che sistems da saivs directivas efficazis, sco ch'els èn avant maun per gronda part da la vart nord dal Pass dal Güglia, han ina fitg gronda impurtanza. Sin nundumbraivels auters trajects plain stortas e fermamain frequentads existan dentant mo paucas da questas aissas da protecziun respectivamain mancan ellas dal tuttafatg.

I na duai dentant betg vegnir meglierà sin donn e cust da la segirezza dals automobilists e dals camiunists. Anzi, sin ils trajects plain stortas duain las saivs directivas vegnir munidas cun aissas da protecziun. Sche quai vegn fatg cun sistems d'aissas da protecziun moderns ed a paraculp, po la ristga da blessuras vegnir reducida en moda anc pli significativa. Sistems d'aissas da protecziun pon vegnir montads posteriuramain e pon ultra da quai – grazia ad in sistem da montascha svelt – simplamain vegnir allontanads durant ils mais d'enviern, là, nua che quai è necessari. Uschia è la lavur supplementara dal Servetsch d'enviern restrenschida ad in minimum.

Dumondas a la Regenza:

  1. È la Regenza er da l'avis, che sistems d'aissas da protecziun vi da saivs directivas sin vias plain stortas possian reducir considerablamain il grad da las blessuras da motociclistas e motociclists sco er da ciclistas e ciclists crudads?
  2. Sche gea, è la Regenza pronta da promover la montascha da sistems d'aissas da protecziun adattads en stortas cun blers accidents da manischunzas e manischunzs da vehichels a duas rodas sco er preventivamain sin trajects cun grond traffic da motos, quai per reducir la ristga da blessuras da ciclistas e ciclists crudads?
  3. È la Regenza pronta d'eruir, sche quai n'è betg gia vegnì fatg, cun ina simpla enquista davart ils lieus respectivamain ils trajects privlus che n'èn anc betg munids cun aissas da protecziun?
  4. È la Regenza pronta d'intimar l'Uffizi federal da vias (UVIAS) da far ina meglieraziun respectiva areguard las trais vias naziunalas en il chantun N13 (San Bernardin), N28 (Partenz), N29 (Güglia)?

Cuira, ils 2 da settember 2023

Cortesi, Bachmann, Tomaschett, Atanes, Bavier, Biert, Bisculm Jörg, Bundi, Butzerin, Candrian, Casutt, Crameri (Li Curt), Della Cà, Dürler, Gort, Grass, Hohl, Krättli, Lehner, Mani, Morf, Rauch, Rettich, Roffler, Salis, Saratz Cazin, Sgier, von Ballmoos, Weber

Resposta da la regenza

L'Uffizi da construcziun bassa dal Grischun (UCB) è responsabel per projectar, per construir sco er per mantegnair las vias chantunalas d'ina lunghezza da var 1400 km. Tenor la cunvegna da prestaziun cun l'Uffizi federal da vias (UVIAS) è il UCB plinavant responsabel  per il mantegniment funcziunal ed architectonic da las vias naziunalas d'ina lunghezza da var 220 km en l'unitad territoriala V. En questas funcziuns tegna il UCB quint commensuradamain da la segirezza dal traffic. Sa basond sin l'art. 6a da la Lescha davart il traffic sin via (LTV; CS 741.01) ha il chantun uschia tranter auter nominà ina persuna da contact ch'è responsabla per il sectur da la segirezza dal traffic (incumbensà da segirezza) sin las vias naziunalas e chantunalas. Ultra da quai prevesa l'art. 6a LTV, ch'il chantun stopppia controllar regularmain, sche la rait da vias ha lieus, nua ch'i capitan adina puspè accidents e lieus privlus ed en cas da basegn elavurar ina planisaziun per reglar quels. Per exequir questa incumbensa ha il UVIAS sviluppà sis instruments da la segirezza d'infrastructura. L'applicaziun da quests instruments renda pli segirs tant ils projects da via sco er las vias existentas. Ultra da sa basar sin ils instruments da la segirezza d'infrastructura, sa basa il chantun sin la norma correspundenta da l'Associaziun svizra da las spezialistas e dals spezialists per vias e per il traffic (VSS) sco er sin il mussavia chantunal per projectaders dal sectur da la segirezza passiva en il spazi stradal. Quest mussavia cuntegna las basas per realisar las saivs directivas sin las vias naziunalas, principalas e da colliaziun. Ultra da quai ha lieu in stretg barat regular cun las organisaziuns a glisch blaua, en spezial cun la Polizia chantunala dal Grischun.

Tar la dumonda 1: Aissas da protecziun èn ina mesira preventiva per reducir la ristga da blessuras en cas d'accidents. Sistems d'aissas da protecziun èn aissas d'atschal ch'èn montadas faschond penna, che absorbeschan l'energia dal culp en cas d'ina collisiun e che impedeschan da ruschnar sut la saiv directiva ora. Quai lascha er evitar il contact cun las pitgas cun urs gizs. En cas d'ina collisiun reduceschan quests sistems la ristga da blessuras da las motociclistas e dals motociclists, n'han dentant naginas consequenzas sin il stil da charrar sco tal e pia sin la frequenza dals accidents.

Tar la dumonda 2: Gia oz vegnan montads sistems d'aissas da protecziun als lieus, nua ch'i capitan adina puspè accidents sin las vias chantunalas sco er naziunalas. Quests sistems vegnan montads er preventivamain sin trajects cun in grond dumber da motociclistas e motociclists. Cun valitar las ristgas e cun considerar ils interess stoi vegnir resguardà, che la rumida da la naiv na dastga betg vegnir difficultada sproporziunadamain pervia dals sistems d'aissas da protecziun. L'allontanament temporar dals elements fatgs sin mesira chaschunass gronds custs, uschia che sistems d'aissas da protecziun vegnan montads sistematicamain en ils lieus, nua ch'i capitan adina puspè accidents e sin ils trajects cun in grond dumber da motociclistas e motociclists. Ultra da quai po la sumbriva dals sistems d'aissas da protecziun chaschunar glatsch sin il vial. Quai ch'è generalmain disfavuraivel per la segirezza dal traffic.

Tar la dumonda 3: Sco explitgà en l'introducziun controllescha il UCB sistematicamain la segirezza dal traffic sin las vias chantunalas. en quest connex analisescha el il potenzial, nua che l'infrastructura po vegnir optimada (NSM network safety management). Priorisads vegnan silsuenter quels trajects da via, sin ils quals il nivel da la segirezza dal traffic po vegnir meglierà – tras l'utilisaziun sistematica da las resursas – en moda la pli effectiva e la pli effizienta cun prender mesiras architectonicas, da la tecnica da traffic e/u funcziunalas. En il rom dal management dals lieus, nua ch'i capitan adina puspè accidents vegn meglierada la segirezza dal traffic sin via en ils lieus privlus existents. En cas da basegn vegnan er fatgas inspecziuns (road safety inspection) e reglads ils deficits da segirezza registrads. Sin las vias naziunalas maina il UVIAS – ensemen cun ils chantuns – in sistem d'infurmaziun «Accidents da traffic sin via», che consista d'in sistem da registraziun e d'evaluaziun.

Tar la dumonda 4: Il stretg barat tranter il UVIAS e l'incumbensà da segirezza per las vias naziunalas e chantunalas procura per ina meglieraziun permanenta da la segirezza entaifer il sectur da las vias naziunalas. En il rom da questa collavuraziun è er vegnì lantschà il project «Mesiras da la segirezza passiva», per sustegnair la realisaziun dals aspects menziunads qua survart.

27 d'october 2023