Navigation

Inhaltsbereich

Dumonda Crameri concernent la determinaziun d'areals prioritars per prads sitgs

Sessiun: 15.02.2023

Cun la brev dals 6 da schaner 2023 han l'Uffizi per la natira e l'ambient (UNA) e l'Uffizi per il svilup dal territori (UST) infurmà las vischnancas grischunas che lur territori cumpiglia pastgiras sitgas e prads sitgs (PPS) d'impurtanza naziunala ch'èn inscrittas en l'Inventari naziunal dals biotops. L'Inventari PPS è vegnì actualisà dal Cussegl federal l'onn 2021. Sche projects sco p.ex. conducts u telefericas duain vegnir realisads sin objects PPS, resultan conflicts cun las disposiziuns da protecziun da l'Ordinaziun davart la protecziun da pastgiras e prads sitgs d'impurtanza naziunala (Ordinaziun davart ils prads sitgs, OPPS; CS 451.37). Tenor la OPPS pon projects che n'èn betg en l'interess naziunal vegnir realisads mo, sch'igl è avant maun in uschenumnà areal prioritar. Tenor la pratica dal UNA e dal UST vegnivan tals projects tractads fin ussa cun in simpel instrument che valitava l'intervenziun e la prestaziun da cumpensaziun. Pervia da la nova pratica giudiziala n'è quai betg pli permess. Quai ha per consequenza che la permissiun da projects sin objects PPS sa retardescha fermamain, sch'i n'èn betg vegnids determinads areals prioritars. En in'emprima fasa ston ils areals prioritars vegnir elavurads a maun da basas specificas e vegnir rectifitgads cun las persunas pertutgadas sco er cun l'Uffizi federal d'ambient (UFAM). En la segunda fasa vegnan ils areals prioritars determinads en la planisaziun d'utilisaziun. Il UNA ed il UST fineschan la brev menziunada cun la suandanta recumandaziun: «Per impedir che projects futurs vegnian retardads nunnecessariamain en Vossa vischnanca pervia da conflicts cun objects PPS d'impurtanza naziunala, As recumandain nus urgentamain d'examinar Voss basegn da realisar l'inventari PPS sur l'instrument da l'areal prio­ritar e da determinar preventivamain areals prioritars tenor la OPPS en la planisaziun d'utilisaziun communala.»

Las vischnancas èn pia confruntadas cun novas incumbensas e ston l'emprim tschertgar, chattar e determinar areals prioritars. Las proprietarias ed ils proprietaris dals bains immobigliars ston medemamain vegnir consultads e vegnir persvadids da quai. Lura sto tut vegnir transferì en la planisaziun locala da la vischnanca.

Las sutsegnadras ed ils sutsegnaders drizzan perquai las suandantas dumondas a la Regenza:

  1. È er la Regenza da l'avis che questa incumbensa saja ina gronda sfida per las vischnancas sco er per las proprietarias ed ils proprietaris dals bains immobigliars pertutgads?
  2. Tge custs e quanta lavur stima la Regenza per l'elavuraziun da las basas specificas e per la rectificaziun da talas ensemen cun las persunas pertutgadas (emprima fasa)?
  3. Vegnan las vischnancas indemnisadas per lur surpli da custs e da lavur, e vegnan las proprietarias ed ils proprietaris dals bains immobigliars indemnisads per eventualas restricziuns da la proprietad dal dretg public en consequenza da la deter­mi­naziun?
  4. Co pon ins – ord vista da la Regenza – impedir ch'i vegnia decidì senza resguardar l'opiniun da las proprietarias e dals proprietaris dals bains immobigliars?
  5. È la Regenza pronta da s'engaschar per ina revisiun parziala da la OPPS, per uschia evitar la determinaziun d'areals prioritars, ma er novs process da planisaziun nunnecessaris, ch'engrevgeschan supplementarmain la planisaziun locala da las visch­nancas?

Cuira, ils 15 da favrer 2023

Crameri, Roffler, Loi, Altmann, Beeli, Berther, Berweger, Binkert, Brandenburger, Brunold, Butzerin, Casutt, Censi, Collen­berg, Della Cà, Derungs, Donatsch, Dürler, Epp, Föhn, Furger, Gansner, Hartmann, Hohl, Holzinger-Loretz, Jochum, Kienz, Kohler, Laim, Lamprecht, Loepfe, Luzio, Maissen, Messmer-Blumer, Michael (Donat), Righetti, Saratz Cazin, Sax, Schutz, Sgier, Spagnolatti, Städler, Tanner, Thür-Suter, Tomaschett, Ulber, von Tscharner, Weber, Wieland

Resposta da la regenza

La Lescha federala davart la protecziun da la natira e da la patria (LPNP; CS 451) è entrada en vigur il 1. da schaner 1967. Dapi lura ha la Confederaziun fatg abundanta­main diever da ses dretg da decretar disposiziuns da protecziun en il sectur da la pro­tecziun da la natira. Questas disposiziuns ston er vegnir chapidas sco reacziun sin il svilup negativ da la biodiversitad. In dals instruments, cun ils quals la Confederaziun emprova da mantegnair la biodiversitad indigena, èn ils inventaris federals. Il Cussegl federal ha la cumpetenza da designar biotops d'impurtanza naziunala e da fixar lur po­siziun. Ils chantuns han lura l'incumbensa da procurar per la protecziun e per il mante­gniment da quests biotops. La Confederaziun na dat dentant betg simplamain maun liber als chantuns, mabain ha concretisà questas incumbensas executivas en tschintg ordinaziuns (ina per mintga tip da biotop) ed en agids d'execuziun. En las tschintg ordinaziuns davart la protecziun dals biotops èn cunzunt er fixadas las finamiras da protecziun cun disposiziuns pli u main identicas: Ils objects ston vegnir mantegnids senza restricziuns. Unicamain l'Ordinaziun davart la protecziun da las zonas umidas d'impurtanza naziunala (Ordinaziun da las zonas umidas; CS 451.31) e l'Ordinaziun davart la protecziun da pastgiras e prads sitgs d'impurtanza naziunala (Ordinaziun davart ils prads sitgs, OPPS; CS 451.37) permettan, en l'art. 4 al. 2 resp. en l'art. 7, divergenzas da la finamira da protecziun. Uschia resulta ina libertad d'agir – bain mo da dimensiuns limitadas – per considerar ils interess, sch'i sa tracta da projects ch'èn dependents d'in lieu e che stattan en in interess public predominant. Quest interess sto medemamain esser d'impurtanza naziunala. Mo la OPPS cuntegna ina disposiziun excepziunala anc pli vasta. Quella permetta als chantuns da divergiar da la finamira da protecziun, sch'i sa tracta da projects ch'èn dependents d'in lieu, ma che na stattan betg en in interess naziunal. Quai sut la cundiziun che l'intervenziun e la cumpensa­ziun sa chattian en in uschenumnà areal prioritar PPS.

Tar la dumonda 1: Gea, er la Regenza è da quest avis areguard las sfidas procedu­ralas per vischnancas effectivamain pertutgadas. La determinaziun d'areals prioritars PPS dastgass vegnir en dumonda mo per ina minoritad da las vischnancas grischu­nas, nua che conflicts d'utilisaziun existan u pudessan daventar visibels. Ina sfida è quella d'identifitgar a temp il basegn per in areal prioritar. In'autra sfida resulta da la dumonda, sch'igl è – sin basa da las relaziuns dal spazi natiral – pussaivel da designar in areal prioritar che satisfa a las pretensiuns da l'Uffizi federal d'ambient.

Tar la dumonda 2: Fin ussa n'èn anc disponiblas naginas valurs d'experientscha da­vart ils custs e davart la lavur per designar in areal prioritar. Ils custs dependan da la situaziun da las datas e da la grondezza dal territori. Per la gronda part da las visch­nancas pertutgadas dastgassan els sa chattar en la regiun da paucs 10 000 francs. L'Uffizi per la natira e l'ambient quinta ch'i dovria almain in onn per la fasa da l'elavura­ziun dal concept ed almain in onn per la realisaziun en la planisaziun d'utilisaziun.

Tar la dumonda 3: Per elavurar las basas ecologicas d'in concept per in areal prioritar po il chantun garantir contribuziuns LPNP a las vischnancas. L'autezza da las contri­buziuns sto sa drizzar tenor l'efficacitad ecologica da las mesiras. Per las proprietarias ed ils proprietaris dals bains immobigliars n'exista nagin dretg d'indemnisaziun direct. Sche la valur ecologica d'ina surfatscha vegn augmentada e sche quai chaschuna ina reducziun da la valur dal terren, po la valur reducida dentant vegnir indemnisada. La tgira adattada da las surfatschas da biotop e da las structuras entaifer in areal prioritar PPS vegn indemnisada sin basa da contracts da cultivaziun.

Tar la dumonda 4: Areals prioritars vegnan designads en la planisaziun d'utilisaziun. Questa procedura porscha vastas pussaivladads da cooperaziun e la protecziun giu­ridica cumplaina. Sco mintga autra midada dal stadi dovran er revalitaziuns en mintga cas il consentiment da la proprietaria u dal proprietari dal bain immobigliar.

Tar la dumonda 5: La Regenza è s'engaschada differentas giadas – ma fin ussa senza success – per che la Confederaziun stgaffeschia las premissas giuridicas che permet­tessan da garantir il mantegniment quantitativ e qualitativ da PPS, quai cun ordinar ina cumpensaziun reala en la procedura da permissiun, sch'i sa tracta d'intervenziuns pli pitschnas en objects PPS, nua ch'il stadi da l'object na vegniss betg restrenschì consi­derablamain. La Regenza vegn a s'engaschar er vinavant tar la Confederaziun per simplificaziuns da la procedura en questa direcziun.

19 d'avrigl 2023