Navigation

Inhaltsbereich

Sessiun: 15.02.2023

Il schaner 2023 è la publicitad vegnida a savair da l'existenza d'in monument emblidà, ch'ils naziunalsocialists avevan plazzà sin il santeri Daleu a Cuira. Las retschertgas dad SRF han mussà ch'i sa tracta d'in mausoleum per schuldads tudestgs ch'èn morts en Svizra durant l'Emprima Guerra mundiala. Quest mausoleum è vegnì installà l'onn 1938 cun il consentiment da las autoritads localas e renovà l'onn 1955 – pia ditg suenter la Segunda Guerra mundiala.

Cumpareglià cun las duas guerras mundialas sezzas è l'epoca tranter las guerras mundialas – cun excepziun d'intginas lavurs preliminaras – betg anc elavurada sistematicamain en la perscrutaziun istorica en il Grischun. Il mausoleum naziunalsocialistic (rescuvrì) sin il santeri Daleu a Cuira è dentant mo in da numerus indicaturs che mussan, ch'il faschissem ed il naziunal­socialissem han laschà enavos fastizs en noss chantun e ch'i existivan tensiuns tranter resistenza e simpatias. Ulteriurs puncts – d'ina glista betg cumpletta – pon vegnir menziunads:

  • Ils lungs cunfins dal Grischun cun l'Italia faschistica e cun l'Austria, ch'è vegnida integrada l'onn 1938 en il «Terz Reich», ed uschia las stretgas colliaziuns da nossa populaziun e da nossas autoritads cun quests pajais.
  • Il process giudizial a Cuira cunter David Frankfurter che ha mazzà il favrer 1936 a Tavau il manader da la gruppa svizra da la Partida naziunalsocialistica Gustloff, e ch'è vegnì condemnà ad in chasti maximal – accumpagnà da propaganda naziunal­socialistica massiva.
  • Las dunnas ed ils uffants che avevan supplitgà invanamain las autoritads per agid, perquai ch'ellas avevan pers lur dretg da burgaisas tras la maridaglia cun umens esters, persequitads dal reschim faschistic respectivamain naziunalsocialistic. Qua tras eran las dunnas ed ils uffants medemamain vegnids surlaschads a la persecuziun ed a l'exterminaziun.
  • L'arrivada clandestina, l'occupaziun e la domiciliaziun dals perscrutaders da la Germania naziunalsocialistica, che han lavurà ed eran per part responsabels tar la HOVAG (pli tard Ems-Chemie). Cun lur savida davart substanzas chemicas e sistems d'armas han els mess il fundament per il success economic da l'interpresa che vegniva subvenziunada da quel temp cun daners publics.

Cun sia incarica d'elavurar las mesiras repressivas per motivs da provediment ha la Regenza grischuna mussà ch'in tal project po vegnir realisà en moda exemplarica. Pervia da l'impurtanza dal temp tranter las guerras e pervia da l'effect che tscherts eveniments han fin en noss temp dad oz, para in'elavuraziun istorica dad esser inditgada.

Las sutsegnadras ed ils sutsegnaders dumondan perquai la Regenza, sch'ella è pronta:

  1. da prender – en collavuraziun cun la citad da Cuira – l'iniziativa per mantegnair e per contextualisar il mausoleum sin il santeri Daleu a Cuira per infurmar e per sensibilisar la populaziun;
  2. da surdar l'incarica e da finanziar ina perscrutaziun independenta ed interdisciplinara dal temp tranter las guerras en il Grischun e da sias consequenzas per il temp suenter la guerra.

Cuira, ils 15 da favrer 2023

Hofmann, Schneider, Danuser (Cuira), Atanes, Bachmann, Bardill, Baselgia, Biert, Bischof, Bleuler-Jenny, Cahenzli-Philipp (Vaz Sut), Dietrich, Furger, Gansner, Gartmann-Albin, Gredig, Hoch, Kreiliger, Mani, Mazzetta, Müller, Nicolay, Pajic, Perl, Preisig, Rettich, Righetti, Rusch Nigg, Rutishauser, Spagnolatti, von Ballmoos, Zaugg-Ettlin

Resposta da la regenza

Sin il santeri municipal Daleu a Cuira sa chatta in monument da fossa resp. in crap commemorativ, che regorda als schuldads tudestgs ch'eran internads durant l'Em­prima Guerra mundiala en il Grischun e ch'èn morts qua. Il crap è vegnì installà l'onn 1938 dal «Volksbund Deutsche Kriegsgräberfürsorge». Da quel temp era quai in'or­ganisaziun da caracter naziunalsocialistic, che ha instrumentalisà la commemoraziun dals defuncts da l'Emprima Guerra mundiala per derasar sia ideologia politica. Entant che circuls spezialisads savevan gia daditg che quest crap exista, è ina vasta publi­citad vegnida infurmada en chaussa il schaner 2023 tras in rapport da Radio e tele­visiun svizra. Il rapport ha gì ina gronda resonanza ed ha procurà per discussiuns davart la dumonda, co ch'il crap duai vegnir tractà en l'avegnir. Savens è er vegnì exprimì il basegn d'analisar istoricamain la tematica.

Tar la dumonda 1: La Regenza è pronta da prender – ensemen cun la citad da Cuira – l'iniziativa per mantegnair e per contextualisar il crap commemorativ sin il santeri Daleu, per infurmar e per sensibilisar la populaziun.

Tar la dumonda 2: La Regenza beneventa iniziativas da perscrutaziun che gidan ad approfundar la chapientscha istorica dal temp da las duas guerras mundialas en il Grischun sco er da las relaziuns socialas e politicas da quella giada. Legraivlamain èn vegnidas publitgadas dacurt pliras contribuziuns che han perscrutà il temp da la Segunda Guerra mundiala, las activitads da la «Nationalsozialistische Deutsche Arbeiterpartei» (NSDAP) en il Grischun en general, l'assassinat dal manader da la gruppa svizra da la NSDAP Wilhelm Gustloff en spezial sco er l'istorgia da la Holz­verzuckerungs-AG. Avant che pudair formular ina incarica da perscrutaziun concreta, èsi perquai impurtant d'eruir pli detagliadamain il stadi actual da la perscrutaziun e d'identifitgar largias da perscrutaziun existentas. Perquai planisescha la Regenza da surdar ina incumbensa per realisar in project da retschertga correspundent, quai cun la finamira d'elavurar ina bibliografia extendida da la litteratura da perscrutaziun rele­vanta sco er d'identifitgar ils giavischs da perscrutaziun existents. Actualmain ha er il deputà Tino Schneider drizzà ina incumbensa concernent la «analisa da l'istorgia dal faschissem e dal naziunalsocialissem en il chantun Grischun» a la Regenza. Questa incumbensa metta il focus sin il temp avant il cumenzament da la Segunda Guerra mundiala. Perquai fai senn da resguardar tuttas duas intervenziuns en il project da retschertga. Sin basa da quai è la Regenza pronta da surdar l'incumbensa per reali­sar projects da perscrutaziun concrets.

26 d'avrigl 2023