Navigation

Inhaltsbereich

Dumonda Krättli concernent enconuschientschas linguisticas solidas per ina integraziun reussida

Sessiun: 15.02.2023

L'Ordinaziun federala davart il dretg da burgais regla las pretensiuns linguisticas minimalas per obtegnair il dretg da burgais svizzer. Ella renviescha al Rom europeic communabel da referenza per las linguas da sis stgalims. Persunas che vulan acquistar il dretg da burgais ston preschentar almain in B1 a bucca ed in A2 en scrit. Ils chantuns èn libers d'auzar questas pretensiuns. Las sfidas minimalas èn plitost bassas. Quai è para er il motiv, ch'i vegnan gia fatgas pretensiuns politicas en Svizra, da translatar las broschuras da votaziun en autras linguas. Quai cun l'argumentaziun che las enconuschientschas dal nivel A2 bastian bain per ademplir las premissas per la natiralisaziun, che la persuna che ha survegnì il dretg da burgais na saja cun questas enconu­schientschas però strusch abla da pudair participar a la vita politica, sociala ed economica. Ston ins propi cumpensar magras enconuschientschas linguisticas cun translaziuns? Na. La finamira stoi esser da promover pli fitg l'integraziun linguistica da persunas che vulan acquistar il dretg da burgais. La lingua è la clav al pajais ed a la glieud, a la societad, al mund da lavur, a la cultura ed a la politica. Da pudair manar in discurs normal cun persunas da lingua materna è indispensabel per participar a la vita publica.

Tgi che ha las enconuschientschas minimalas pretendidas actualmain dal A2 (segund pli bass stgalim da sis stgalims), po chapir frasas ed expressiuns che vegnan duvradas savens, che han in connex cun ils secturs d'impurtanza tut directa (p.ex. infurmaziuns davart la persuna e davart la famiglia, cumpras, lavur, proxims conturns), e po communitgar en situaziuns simplas, da rutina, nua ch'i va per in barat simpel e direct d'infurmaziuns davart chaussas enconuschentas e famigliaras.

Nivel B1 vul dir, ch'ins chapescha ils puncts principals, sch'i vegn duvrada ina clera lingua da standard e sch'i sa tracta d'objects famigliars da la lavur, da la scola, dal temp liber e.u.v. Ins dumogna la gronda part da las situaziuns ch'ins inscuntra sin viadis tras il territori linguistic correspundent. Ins sa manar in discurs simpel e coerent davart tematicas famigliaras e davart champs d'interess persunals.

Il nivel B2 signifitga ch'ins chapescha ils cuntegns principals da texts cumplexs e da temas concrets ed abstracts. Ins sa s'exprimer en moda spontana e fluida, uschia ch'in discurs normal cun persunas da lingua materna è bain pussaivel er senza grondas stentas da tuttas duas varts. Ins sa s'exprimer en moda clera e detagliada davart in vast spectrum da temas, declerar in punct da vista davart ina dumonda actuala ed inditgar ils avantatgs ed ils dischavantatgs da differentas pussaivladads.

En vista a quests fatgs tschentan las sutsegnadras ed ils sutsegnaders la suandanta dumonda:

È la Regenza pronta – premess ch'il chantun haja il dretg da far quai – da midar e cumplettar las basas legalas en quel senn, ch'i ston vegnir cumprovadas enconuschientschas a bucca d'ina lingua chantunala (tudestg, talian u rumantsch) che correspundan al nivel da referenza B2 dal Rom europeic communabel da referenza per las linguas dal Cussegl da l'Europa (RECR) ed enconuschientschas en scrit d'ina lingua chantunala che correspundan al nivel da referenza B1 per obtegnair il dretg da burgais svizzer?

Cuira, ils 15 da favrer 2023

Krättli, Menghini-Inauen, Morf, Casutt, Cortesi, Della Cà, Dürler, Favre Accola, Gort, Grass, Heim, Hug, Metzger, Roffler, Sgier, Städler, Weber

Resposta da la regenza

La Lescha dal dretg da burgais dal chantun Grischun (LDBchant; DG 130.100) è ve­gnida revedida totalmain l'ultima giada ils 13 da zercladur 2017. Fin a quest mument aveva il chantun Grischun desistì da pretender abilitads d'ina lingua chantunala en scrit (tudestg, rumantsch u talian). Tenor l'art. 5 al. 2 lit. d da l'Ordinaziun tar la Lescha dal dretg da burgais dal chantun Grischun dals 13 da december 2005 (ODBchant; DG 130.110) bastavi d'avair enconuschientschas linguisticas a bucca confurmas al nivel da referenza B1 dal Rom europeic communabel da referenza per las linguas (RECR). La revisiun da la Lescha federala davart il dretg da burgais sviz­zer (LDB; CS 141.0) ch'è entrada en vigur il 1. da schaner 2018 pretenda da nov – ultra d'enconuschientschas linguisticas a bucca – er enconuschientschas linguisticas en scrit. En l'Ordinaziun davart il dretg da burgais svizzer (OBurg; CS 141.01) preve­sa la Confederaziun in nivel da referenza B1 a bucca resp. A2 en scrit. Tenor missiva da la Regenza dals 21 da favrer 2017 al Cussegl grond tar la revisiun totala da la Lescha chantunala dal dretg da burgais (carnet nr. 12/2016–2017, p. 746, art. 6 lit. c) èsi vegnì remartgà, ch'il chantun Grischun saja liber da pretender cumpetenzas lin­guisticas pli autas, quai na saja però betg planisà. Ils 13 da zercladur 2017 ha il Cus­segl grond approvà unanimamain l'artitgel 6 che pertutga ils criteris d'integraziun (Protocol dal Cussegl grond da la sessiun da zercladur 2017, p. 1040, art. 6) e la revisiun totala da la Lescha dal dretg da burgais e la revisiun totala da l'Ordinaziun tar la Lescha dal dretg da burgais èn vegnidas messas en vigur per il 1. da schaner 2018.

En l'entira Svizra è la maioritad dals chantuns monolings u bilings sa cunvegnida ad in nivel da referenza A2 per las cumpetenzas linguisticas en scrit ed ad in nivel da referenza B1 per las cumpetenzas linguisticas a bucca. Sulettamain ils chantuns Sutsilvania, Sviz e Turgovia pretendan enconuschientschas linguisticas dal nivel da referenza B1 a bucca e B2 en scrit. Ils chantuns Basilea-Champagna e Son Gagl prevesan per las enconuschientschas linguisticas a bucca ed en scrit il nivel da referenza B1.

La soluziun ch'è vegnida concludida en la ODBchant è sa cumprovada bain fin ussa. La prioritad vegn er vinavant messa sin las enconuschientschas a bucca. Uschia gar­tegia er ina realisaziun consequenta dal «model d'ina integraziun progressiva», tras quai che las pretensiuns linguisticas èn mintgamai pli severas che per la concessiun da la permissiun da domicil. L'integraziun linguistica pretendida garantescha, che las persunas che vulan acquistar il dretg da burgais pon sa far chapir en la vita da min­tgadi. Ils texts da la vita da mintgadi pon vegnir chapids ed exprimids a bucca. La basa per la participaziun e l'interess a la vita sociala, al process da lavur e per l'enco­nuschientscha da las relaziuns chantunalas e communalas è uschia avant maun. L'integraziun linguistica pretendida è ina part dal giudicament tras las autoritads cum­petentas sin stgalim communal, chantunal e federal e mo, sche quest giudicament è tut en tut positiv, suonda ina natiralisaziun.

Da vulair engrevgiar la natiralisaziun sco proponì, è plinavant disfavuraivel, sch'ins considerescha che la populaziun estra pudess midar domicil entaifer il chantun Gri­schun d'ina regiun linguistica en in'autra. Ils onns 2020, 2021 e 2022 èn en media mintga onn vegnidas natiralisadas 290 persunas creschidas. En media eran 237 da questas persunas da lingua materna tudestga u taliana u ch'ellas avevan absolvì en Svizra il temp da scola ch'è prescrit tenor la lescha u ch'ellas avevan il diplom da scola pretendì. En media han 53 persunas stuì preschentar ina cumprova linguistica. Da quai pon ins trair la conclusiun, che la maioritad da las persunas creschidas che acquistan il dretg da burgais han enconuschientschas linguisticas ch'èn bler pli autas che las pretensiuns linguisticas minimalas. 

Sin basa da questas explicaziuns n'exista per la Regenza nagin motiv d'auzar las pretensiuns legalas per las enconuschientschas a bucca sin il nivel da referenza B2 e per las enconuschientschas en scrit sin il nivel da referenza B1 dal Rom europeic communabel da referenza per las linguas (RECR).

19 d'avrigl 2023