Navigation

Inhaltsbereich

Dumonda Preisig concernent collecziun da plastic e reducziun dal consum da plastic

Sessiun: 15.02.2023

Il rapport publitgà dacurt da l'organisaziun nunguvernamentala Oceancare davart il tractament da plastic ha revelà che la Svizra è a la testa da la rangaziun en il consum da plastic. Differentas medias han communitgà en chaussa, tranter auter er il Tages-Anzeiger en sia ediziun dals 9 da schaner 2023: «Differents studis mussan che la Svizra tutga puncto materias sinteticas tar ils pli gronds producents da rument da l'entir mund. Cun annualmain ca. 109 kg per persuna ranghescha la Svizra en l'Europa suenter Luxemburg sin plazza 2, … Il consum da plastic vegn a sa triplar senza mesiras effectivas, hai num en il pli nov rapport da la OECD da l'onn passà.»

Posts per rimnar PET datti dapertut e ston vegnir purschids da tut ils posts da vendita che vendan victualias u bavrondas en emballadis da PET. Blers emballadis, sche betg ils blers, tutgan dentant ad in'autra categoria da plastic (spezialmain materials sintetics da PE u da PP). La restituziun da quests tips da plastic è dentant bainquant pli cumplitgada ed en tscherts lieus n'è ella insumma betg pussaivla. Er qua stuess valair: Tgi che venda plastic, al sto er prender enavos. Almain stuess dapertut là, nua che satgs da rument pon vegnir cumprads, er vegnir purschids satgs per rimnar plastic. Ina dumonda Deplazes correspundenta da l'onn 2017 han la Regenza sco er il Cussegl grond refusà. Las cifras qua survart pretendan dentant d'agir. La UE scumonda dapi l'onn 2021 pusada e vaschella a diever unic u bavrolas e truschets da plastic ad occurrenzas grondas.

Anc pli impurtant fiss dentant – ultra da simplifitgar la collecziun da plastic – da meglierar il material d'emballadi e da renunziar cumplettamain da plastic a diever unic.

Jau supplitgesch perquai la Regenza da respunder las suandantas dumondas:

  1. Tge instruments vesa la Regenza per simplifitgar resp. per augmentar la collecziun da plastic?
  2. Vegn la Regenza a realisar quests instruments? Cura?
  3. Prenda la Regenza activamain mesiras per evitar ruments da plastic, co quai che fa per exempel la UE?
  4. Co vul la Regenza per exempel reducir il consum da plastic per persuna en il chantun, per exempel tras utilisaziun multipla u tras incassament d'ina taxa da deposit?

Cuira, ils 15 da favrer 2023

Preisig, Mazzetta, Bachmann, Atanes, Bardill, Baselgia, Biert, Bischof, Bisculm Jörg, Bleuler-Jenny, Bundi, Cahenzli-Philipp (Vaz Sut), Degiacomi, Dietrich, Furger, Gartmann-Albin, Gredig, Hoch, Hofmann, Kreiliger, Müller, Nicolay, Oesch, Pajic, Rageth, Rettich, Rusch Nigg, Rutishauser, Walser, Zaugg-Ettlin

Resposta da la regenza

A maun da la statistica dals ruments da la Confederaziun che vegn publitgada an­nualmain, èsi evident ch'en Svizra resultan dapli ruments da plastic per persuna ch'en auters pajais europeics. Quai è en emprima lingia d'attribuir a la situaziun economica, perquai che tar tut ils tips da rument stat la quantitad da princip en ina proporziun directa cun la conjunctura. Per las buttiglias da PET exista gia in sistem naziunal da rimnar e da reciclar che funcziuna bain. Per auters tips da material sin­tetic èn resultads divers sistems da rimnada ils ultims onns. Pertutgant rimnar e reciclar materials sintetics maschadads da chasadas, han l'Uffizi federal d'ambient (UFAM), la reuniun da las expertas e dals experts per rument e per resursas Cercle Déchets (CD) e l'Associaziun svizra Infrastructuras communalas (ASIC) publitgà cu­mi­naivlamain in document da posiziun la fin da l'onn 2017. En quest palpiri èn els s'exprimids plitost cun sceptica envers rimnar materials sintetics maschadads da chasadas, perquai che la part che po vegnir reciclada sco materia dals objects rim­nads è savens pitschna e perquai ch'ina part relevanta dals ruments sto la finala tut­tina vegnir dismessa termicamain en in stabiliment per arder ruments u en in'ovra da cement. Ultra da quai na datti actualmain nagins stabiliments per zavrar ruments en Svizra. Quai chaschuna savens vias da transport pli lungas a l'exteriur. Quai na ston dentant betg restar uschia. Sch'i reussescha d'augmentar substanzialmain – en il material rimnà – la part dals ruments reciclads sco materia (recycling) en cumpare­glia­ziun cun la part dals ruments reciclads termicamain, pon er las collecziuns ma­scha­dadas da material sintetic da chasadas daventar ecologicamain ed economica­main interessantas. In tal sistem da rimnar e da reciclar fiss cunzunt alura effizient e persistent, sch'el vegniss introducì sin plaun naziunal en l'entira Svizra.

Tar la dumonda 1: En il rom dal project «Collecziun 2025» lavuran actualmain sin plaun naziunal diversas organisaziuns per lung da l'entira chadaina da valurisaziun vi d'in sistem da rimnar e da reciclar emballadis da materia sintetica. L'organisaziun Swiss Recycling collavura cun passa 50 ulteriuras organisaziuns sco producents d'em­­balladi, concerns da bains da consum, commerzis en detagl ed ulteriurs per introducir in tal sistem. En il Grischun datti gia oz divers purschiders da satgs da rimnada per materials sintetics da chasadas. Quests satgs vegnan purschids en differentas vischnancas. Resguardond quests fatgs e cunzunt en vista ad in sistem da rimnar naziunal na vesa la Regenza nagin basegn d'introducir sistems da rimnar supplementars u da promover sistems existents.

Tar la dumonda 2: Actualmain n'èsi betg raschunaivel da realisar mesiras ed instru­ments chantunals per simplifitgar e per promover la collecziun da material sintetic da chasadas sin plaun chantunal, perquai ch'in sistem naziunal da rimnar e da reciclar è gia en elavuraziun. Cun introducir ina soluziun naziunala, uschia sco ch'ella exista gia per las buttiglias da PET, po vegnir etablì in sistem da rimnar e da reciclar ch'è ecologicamain ed economicamain effizient.

Tar las dumondas 3 e 4: En il rom dal repassament da la planisaziun chantunala dals ruments durant ils onns 2021 e 2022 tras l'Uffizi per la natira e l'ambient èn vegnidas definidas tut en tut otg finamiras per la gestiun da ruments en il Grischun. La finamira nr. 3 pertutga l'evitar ruments. La planisaziun chantunala dals ruments cuntegna in plan da mesiras che permetta da cuntanscher las finamiras ch'èn vegnidas fixadas en il rom da la planisaziun. La mesira WS-4 pertutga la sensibilisaziun da la popula­ziun per materials d'emballadi e la motivaziun per cumprar products cun paucs mate­rials d'emballadi. La mesira duai vegnir sviluppada e realisada tras las corporaziuns per la gestiun da ruments ch'èn responsablas per reciclar e per allontanar ruments chasans en il chantun Grischun. Las strategias surordinadas per evitar ruments stuessan primarmain cumenzar tar l'industria d'emballadi e tar la legislaziun da vict­ualias. Questa incumbensa na po betg surpigliar in chantun sulet, mabain pretenda in proceder sin plaun naziunal.

19 d'avrigl 2023