Navigation

Inhaltsbereich

Dumonda Favre Accola concernent la surpigliada da la legislaziun da la UE davart las dronas – restricziuns per il Grischun sco lieu da perscrutaziun

Sessiun: 15.06.2023

La legislaziun da la UE davart las dronas vegn surpigliada en Svizra a partir dal 01-01-2023. Fin ils 31-08-2023 vala anc ina fasa transitorica. Durant quella poi anc vegnir sgulà tenor la legislaziun veglia.

Ordvart decisivas per la perscrutaziun en las muntognas èn cunzunt las suandantas novaziuns legalas, che pericliteschan l'adempliment da cunvegnas da prestaziun e d'incaricas:

  • In'autezza da sgol da 120 m sur il terren na dastga betg vegnir surpassada.
  • Gia a partir da la classa da pais > 900 g (A2) en la categoria averta na dastgan vegnir sursguladas naginas persunas nunparti­cipadas.
  • Distanza minimala da 150 m davent da territoris d'abitadi, da mastergn, d'industria e da recreaziun.

Pervia da las novaziuns legalas n'èsi betg pli pussaivel d'utilisar dronas da mesiraziun en moda raschunaivla ed effizienta en las muntognas. Il SLF a Tavau, sco part da l'Institut federal da perscrutaziun WSL ed uschia dal sectur da las scolas politecnicas federalas, utilisescha dapi il 2015 cun grond success dronas per la perscrutaziun e per applicaziuns praticas. Latiers tutgan las suandantas acziuns:

  • Survegliar eveniments da donn pussaivels (bovas da crappa, lavinas, bovas da glitta, crudadas da crappa), savens er per incumbensa da l'Uffizi da guaud e privels da la natira dal Grischun, da vischnancas u d'uffizis d'auters chantuns da muntogna (p.ex. al Piz Buin Pitschen u a Brinzauls).
  • Documentar eveniments (lavinas, bovas da glitta, crudadas da crappa e da grippa, donns da stemprads), savens per incumbensa dal chantun u da biros d'inschigneria.
  • Cartar la repartiziun da l'autezza da la naiv per planisar ed evaluar rempars da lavinas, medemamain savens per incumbensa dal chantun, da vischnancas u da biros d'inschigneria.
  • Numerus projects da perscrutaziun, ch'èn dependents da mesiraziuns precisas tras dronas per pudair calibrar e validar models.

Tenor l'Uffizi federal d'aviatica civila (UFAC) duai bain esser pussaivel da dumandar permissiuns spezialas (p.ex. PDRA u SORA). Questa procedura è actualmain però fitg diffusa, perquai ch'i mancan infurmaziuns impurtantas da vart dal UFAC. Sgols effizients n'èn dentant betg pussaivels, sch'i ston vegnir dumandadas – en il rom da process birocratics – permissiuns per tut ils sgols (er sgols che dependan da l'aura). Ussa ston ins temair ch'il SLF na possia betg pli ademplir incumbensas per la pratica e per la perscrutaziun a partir dal settember 2023, perquai ch'i n'è actualmain er betg enconuschent, co che permissiuns pon vegnir obtegnidas cun lavur e custs commensurads ed entaifer in termin raschunaivel.

Las sutsegnadras ed ils sutsegnaders dumondan la Regenza grischuna:

  1. Èn questa problematica e la restricziun respectiva da l'activitad da perscrutaziun en il chantun Grischun sco er dal svilup tecnic da las dronas en general enconuschentas a la Regenza grischuna?
  2. È la Regenza grischuna pronta da s'engaschar tar il UFAC, per che tal pretendia las revisiuns da la legislaziun da la UE davart las dronas, ch'èn necessarias per ils pajais da muntogna?
  3. È la Regenza pronta da s'engaschar tar il UFAC per ina permissiun excepziunala nuncumplitgada ed uschè duraivla sco pussaivel a favur dals instituts da perscrutaziun u per ina procedura d'annunzia pragmatica, per che tals possian ademplir lur incaricas e cunvegnas da prestaziun (er publicas)?

Claustra, ils 15 da zercladur 2023

Favre Accola, Wilhelm, Mani, Adank, Atanes, Bärtsch, Bavier, Beeli, Bergamin, Berweger, Biert, Bischof, Bisculm Jörg, Bleuler-Jenny, Brandenburger, Brunold, Bundi, Butzerin, Cahenzli-Philipp (Vaz Sut), Candrian, Casutt, Cola Casaulta, Cortesi, Danuser (Cazas), Degiacomi, Della Cà, Derungs, Dietrich, Dürler, Epp, Föhn, Furger, Gansner, Gartmann-Albin, Gort, Grass, Gredig, Hartmann, Hoch, Hofmann, Hug, Krättli, Kreiliger, Lamprecht, Lehner, Loepfe, Luzio, Menghini-Inauen, Morf, Preisig, Rageth, Rauch, Roffler, Rusch Nigg, Rutishauser, Said Bucher, Salis, Sax, Schutz, Sgier, Stocker, Tanner, von Ballmoos, von Tscharner, Wieland, Zanetti (Sent)

Resposta da la regenza

Tenor la Lescha federala davart l'aviatica (Lescha d'aviatica, LA; CS 748.0) surveglia il Cussegl federal l'aviatica en l'entira Svizra. Il Cussegl federal è er cumpetent per concluder cunvegnas internaziunalas davart il traffic aviatic transcunfinal u davart la segirezza tecnica en l'aviatica. En il rom da la Cunvegna bilaterala davart il traffic aviatic reglan la Svizra e l'Uniun europeica (UE) il sectur da l'aviatica internaziunala en moda unitara e sur in comité maschadà. Cun il consentiment dal Cussegl federal ha quest comité concludì ils 24 da november 2022 da surpigliar las prescripziuns da la UE davart eromobils nunoccupads (dronas, aviuns da model ed eromobils nun­occupads d'autras categorias). Las novas prescripziuns cuntegnan tranter auter stan­dards da segirezza per la producziun, per l'admissiun e per il manaschi da dronas. Latiers tutgan autezzas maximalas da sgol, limitas da pais, restricziuns territorialas sco er prescripziuns concernent la protecziun da l'ambient, la protecziun da la sfera privata e la segirezza. Ina da las novaziuns pli impurtantas per pilotas e pilots da dronas è la divisiun dals objects sgulants en las trais categorias «avert», «spezial» e «certifitgà» – tut tenor la ristga da manaschi. A partir da la categoria «spezial» dovri ina permissiun da l'Uffizi federal d'aviatica civila (UFAC).

Tar la dumonda 1: Grazia a la surpigliada da la regulaziun da dronas da la UE po l'industria da dronas svizra, ch'è orientada a l'export, acceder al martgà internaziunal. Ultra da quai pon permissiuns vegnir renconuschidas vicendaivlamain, quai ch'è util per l'attractivitad da l'economia locala svizra cun ses blers start-ups. A medem temp portan las prescripziuns armonisadas cun la UE però er restricziuns per intgins sec­turs d'applicaziun e chaschunan lavur supplementara. Cun la participaziun dals chantuns ha il UFAC perquai infurmà gia ordavant las gruppas d'interess pertutgadas davart las novaziuns, quai en il rom da differents formats da scolaziun. Cun divers meds auxiliars e cun prestaziuns da cussegliaziun simplifitgescha ed accelerescha il UFAC plinavant il process da dumonda. Ils pli differents acturs dal sectur da la geo­matica e d'autras branschas han inoltrà ils mais passads dumondas per lur manaschi da dronas specific al UFAC. En in process iterativ han els lura survegnì permissiuns da manaschi generalas per in u schizunt per dus onns. Perquai na constatti betg, ch'i sto vegnir inoltrà a l'autoritad federala ina dumonda da permissiun per mintga singula incumbensa da sgol. Tenor il UFAC è il WSL Institut per la perscrutaziun da la naiv e da las lavinas (SLF) a Tavau, che appartegna al sectur da las scolas politecnicas federalas, s'infurmà il november 2022 davart il nov sistem da permissiun ed ha lura survegnì las infurmaziuns da l'uffizi federal. Dapi lura n'ha il SLF – tenor l'infurmaziun dal UFAC – betg pli contactà l'uffizi federal e n'ha er betg inoltrà ina dumonda per ina permissiun da manaschi. Perquai n'èsi betg cler, quant enavant ch'il SLF ha adattà ses manaschi da dronas a las novas disposiziuns.

Tar la dumonda 2: Er senza esser commembra da la UE ha la Svizra pudì sa partici­par activamain a las lavurs da plirs onns per ina regulaziun europeica cumplessiva da las dronas. Per la branscha svizra da dronas resultan numerus avantatgs tras il rom giuridic armonisà cun la UE. I sto dentant vegnir admess che l'augment da la segirezza giuridica – che resulta tras l'unificaziun dal dretg – chaschuna er lavurs supplementaras, ch'ils pajais participants ston acceptar. Ina dumonda posteriura da la Svizra per regulaziuns spezialas per ils «pajais da muntogna» na sa laschass strusch giustifitgar suenter la cooperaziun da plirs onns en il comité maschadà, suen­ter avair cuntanschì in'armonisaziun dal dretg sco er en vista al basegn d'adattaziun minimal, sch'in tal basegn è insumma avant maun.

Tar la dumonda 3: A las petentas ed als petents dat il UFAC per regla gia oz ina per­missiun da manaschi duraivla dad in fin dus onns. Perquai na vesa la Regenza nagin basegn d'intervenziun. Als instituts da perscrutaziun vegni recumandà da tschertgar il barat cun il UFAC e d'instradar ensemen cun il post spezialisà dal UFAC – sco quai che er autras petentas ed auters petents han fatg – il process d'approvaziun concret per ina permissiun da manaschi dad in fin dus onns.

16 d'avust 2023