Tenor l'art. 10 da la nova Lescha d'energia (LEn; CS 730.0) ch'è entrada en vigur il 1. da schaner 2018, han ils chantuns l'incumbensa, che cunzunt ils trajects d'auas ed ils territoris adattads per il diever da la forza idraulica e da la forza dal vent vegnian fixads en il plan directiv. Tenor l'art. 8b da la Lescha federala davart la planisaziun dal territori (LPT; CS 700) che vala a partir dal 1. da schaner 2018, inditgescha il plan directiv ils territoris ed ils trajects d'auas adattads per l'utilisaziun d'energias regenerablas. Cun la procedura dal plan directiv na vegnan ils dretgs ni da las vischnancas ni da las burgaisas e dals burgais perdids. La procedura dal plan directiv è ina part da la planisaziun tenor dretg federal ed è legitimada democraticamain. Igl è in emprim pass da planisaziun, en il qual na vegnan fixadas anc naginas utilisaziuns generalmain liantas. Quai vegn pir fatg sin il stgalim da la planisaziun d'utilisaziun u en il rom d'ina approvaziun dal project. En questa procedura existan dretgs da cundecisiun e da recurs cumplessivs. Sch'ina permissiun da construcziun è er anc necessaria, pudessan tut las persunas pertutgadas far valair danovamain lur interess. Sche utilisaziuns potenzialas futuras mancan dentant en il plan directiv, na pon ellas betg vegnir realisadas en il plan d'utilisaziun u en il rom d'ina approvaziun dal project.
Ils 31 da mars 2023 è vegnì annunzià en il Fegl uffizial chantunal, che l'adattaziun dal Plan directiv chantunal Energia (PDChant-E) vegnia exponida publicamain ils 12 d'avrigl 2023 e ch'il termin da cooperaziun duria fin ils 30 da zercladur 2023. Ils 12 d'avrigl 2023 ha alura gì lieu la publicaziun da l'exposiziun publica.
Il PDChant-E è vegnì preschentà en il rom d'occurrenzas avertas durant l'avrigl ed il matg en set lieus en las differentas regiuns.
Il cumenzament da zercladur è il termin vegnì prolungà fin ils 28 da fanadur 2023. In'ulteriura prolungaziun è vegnida publitgada ils 21 da zercladur 2023 en il Fegl uffizial. Il termin dura ussa fin ils 30 da settember 2023.
Tenor l'art. 7 da l'Ordinaziun davart la planisaziun dal territori per il chantun Grischun (OPTGR; CS 801.110) vegn il PDChant exponì publicamain en l'internet e tar il chantun durant 30 dis. En cas da projects impurtants dal plan directiv vegn il termin d'exposiziun prolungà adequatamain.
Ina prolungaziun commensurada da passa 30 dis sin 2,5 mais è gia vegnida fatga a chaschun da l'emprima exposiziun. Suenter èsi vegnì prolungà sin 3,5 mais. Cun l'ultima prolungaziun fin la fin da settember importa il termin ussa 5,5 mais. La commensurabladad tenor l'art. 7 OPTGR è uschia gia surstrapatschada. Cunzunt pervia da motivs da pregiudizi èn uschè lungs termins problematics, damai che planisaziuns, en connex cun las qualas existan opiniuns differenziadas, pon simplamain vegnir retardadas, cumbain ch'i vegn actualmain cunzunt pretendì savens acceleraziun en la planisaziun dal territori. Ina prolungaziun dal termin adattada per projects impurtants è necessaria, sche la furmaziun da l'opiniun e l'inoltraziun da la posiziun dovra dapli temp che 30 dis, quai pervia da la grondezza u da la cumplexitad dal project.
Tenor la Lescha davart la planisaziun dal territori per il chantun Grischun (LPTGR; DG 801.100) è la Regenza responsabla per conclus davart relaschar e midar il plan directiv chantunal. Il Cussegl grond fixescha la strategia chantunala da svilup dal territori e sias midadas. En quest senn èn la regulaziun da las cumpetenzas e la repartiziun da las incumbensas tranter il Cussegl grond e la Regenza definidas cleramain. Quellas èn pir vegnidas fixadas avant in pèr onns en il rom da la revisiun da la LPTGR per il 1. d'avrigl 2019.
Tar la dumonda 1: Sco menziunà è il termin gia vegnì prolungà da 2,5 mais sin 3,5 mais e la finala sin 5,5 mais. In'ulteriura prolungaziun suenter ils 30 da settember 2023 na vegn la Regenza betg ad ordinar.
Tar la dumonda 2: La lescha na permetta quai betg, uschia ch'i na po vegnir surdà nagin project al Cussegl grond per vegnir approvà.
16 d'avust 2023