La Lescha davart la promoziun dal sport e dal moviment (Lescha da promoziun dal sport; DG 470.000) fixescha en l'artitgel davart l'intent (art. 1 al. 1 lit. a) il sustegn da las activitads da sport e da moviment sin tut ils stgalims da vegliadetgna sco fina­mira. Ils princips da promoziun en l'Ordinaziun davart la promoziun dal sport e dal moviment (Ordinaziun da promoziun dal sport; DG 470.010) dattan dentant l'atten­ziun principala al sport d'uffants e da giuvenils. Quai cun l'intenziun da metter là la basa per activitads sportivas durant l'entira vita. En il sport per creschids vul il chantun – tenor il Concept per promover il sport (5.2. Promoziun generala dal sport da massa) – collavurar cun la Confederaziun e cun sias organisaziuns partenarias (p.ex. la Pro Senectute), per cuntanscher in standard da qualitad unitar en la scola­ziun ed en la furmaziun supplementara. Quai vegn garantì tras il program Sport per creschids Svizra (esa).

L'art. 12 da l'Ordinaziun da promoziun dal sport che vegn menziunà en l'incumbensa da fracziun sa referescha al dretg da survegnir contribuziuns or da la finanziaziun speziala Sport, pia or da la cumpart chantunala dal gudogn net da SWISSLOS, ch'è destinada per la promoziun dal sport. Il princip, tenor il qual las organisaziuns da sport e lur uniuns cun sedia en il chantun Grischun han il dretg da survegnir contribu­ziuns mo, sche lur federaziuns naziunalas èn commembras da la federaziun tetgala dal sport svizzer (Swiss Olympic) u sche lur disciplina vala sco disciplina da sport G+S, n'excluda betg il sport per creschids ed er betg las manadras ed ils manaders scolads tenor esa. Per exempel è la federaziun tetgala dals amis da la natira dal Grischun, la Federaziun svizra dals amis da la natira, commembra da la federaziun tetgala Swiss Olympic. Mo trais da las 36 disciplinas spezialisadas da la esa vegnan exclusas tras l'artitgel menziunà qua survart, numnadamain las purschidas da movi­ment en chasas da dimora, ils trenaments da la fitness cun apparats e la disciplina d'autodefensiun «Wing Tsun». Perquai che las chasas da persunas attempadas ed ils centers da fitness commerzials na valan betg sco instituziuns organisadas sco uniuns, n'avessan els insumma betg il dretg da survegnir contribuziuns.

La Regenza sustegna la finamira da l'incumbensa da fracziun, che er las persunas creschidas duessan cuntinuar a far sport. Gia la formulaziun actuala da l'art. 12 da l'Ordinaziun da promoziun dal sport pussibilitescha dentant da pajar contribuziuns or da la finanziaziun speziala Sport ad organisaziuns dal sport per creschids (p.ex. per occurrenzas, acquisiziuns da material u projects da construcziun) e n'è betg stada il motiv per refusar contribuziuns ils onns passads. I n'è perquai insumma betg neces­sari d'adattar l'Ordinaziun da promoziun dal sport per cuntanscher las finamiras avi­sadas da l'incumbensa.

Sa basond sin questas explicaziuns propona la Regenza al Cussegl grond da refusar questa incumbensa.

29 d'avust 2023