Navigation

Inhaltsbereich

Dumonda da la fracziun da la PPS concernent la mancanza da persunas spezialisadas tar la polizia (emprim sutsegnader Krättli)

Sessiun: 02.09.2023

L'avrigl 2023 ha la Regenza grischuna communitgà, ch'er persunas cun permissiun da domicil vegnian admessas en l'avegnir a l'instrucziun da polizia. La Regenza motivescha quest pass cun la mancanza da persunas spezialisadas e cun il fatg, ch'i possian uschia vegnir recrutadas avunda forzas giuvnas. Questa communicaziun ha procurà per displaschair tar ina gronda part da la populaziun. La polizia, en la quala la populaziun ha gì fitg gronda confidenza fin ussa, è vegnida messa en dumonda. Ina tscherta malsegirezza è resultada.

Che la Polizia chantunala – sco fitg bleras autras branschas – è pertutgada da la mancanza da persunas spezialisadas, è cler er per la PPS. Ch'igl è necessari da prender mesiras en cas d'ina mancanza da persunas spezialisadas, sa chapescha da sez. La segirezza e l'urden ston esser garantids da tut temp. Mo lura è noss chantun attractiv sco destinaziun da lavur e da vacanzas. Cun in tschert smirvegl avain nus dentant stuì constatar, che la Polizia chantunala ha – durant il medem temp e malgrà la mancanza da persunas spezialisadas – dumandà activamain las vischnancas da pudair surpigliar las incumbensas da la Polizia communala. Gia ils ultims onns è la Polizia chantunala daventada activa tar bleras vischnancas ed ha fatg – per part cun success – reclama per ina polizia unitara. Quai, cumbain ch'ella vegn incaricada gist tras quai cun bleras lavurs supplementaras che na pretendan nagina instrucziun poliziala (multas da parcar, scumonds da traffic, obligaziun da tegnair ils chauns a la corda, controllas da mascrinas…). Per part vegnan questas incumbensas liquidadas tras assistentas ed assistents da segirezza, savens dentant er tras polizistas e polizists scolads. Per talas incumbensas èn dentant er interpresas privatas adattadas fitg bain. Plinavant datti en egl ch'i vegnan organisadas controllas da radar cun bler persunal sin las vias naziunalas e sin las vias da colliaziun principalas, quai savens vers la fin da l'onn da preventiv, per ademplir las finamiras dal preventiv da passa 12 milliuns francs multas. Cuntrari a las controllas da radar entaifer ils vitgs ed en lieus privlus ha questa mesira da far fitg pauc cun dumondas da segirezza; percunter absorbescha ella bleras uras da lavur.

Nus supplitgain la Regenza d'infurmar davart las suandantas dumondas:

  1. Tge mesiras èn vegnidas examinadas, ultra da la recrutaziun da persunas cun permissiun da domicil, per mitigiar la problematica da la mancanza da persunas spezialisadas?
  2. Quantas uras da lavur investescha la Polizia chantunala per incumbensas, che pudessan vegnir ademplidas gist uschè bain tras interpresas privatas?
  3. Vesa la Regenza ina schanza da mitigiar la mancanza da persunas spezialisadas cun puspè returnar incumbensas da la Polizia communala, che n'han da far nagut cun la segirezza da la populaziun?
  4. Sch'il conto dal preventiv 427011 «Multas en la procedura da multas disciplinaras» vegniss stritgà senza cumpensaziun, reduciss quai massivamain il squitsch da cuntanscher las finamiras dal preventiv, ed il persunal vegniss schanegià. È er la Regenza da questa opiniun?

Cuira, ils 2 da settember 2023

Krättli, Salis, Rauch, Adank, Brandenburger, Butzerin, Candrian, Casutt, Cortesi, Della Cà, Favre Accola, Gort, Grass, Hefti, Lehner, Metzger, Morf, Roffler, Sgier, Stocker, Weber

Resposta da la regenza

Tar la dumonda 1: Cun il conclus dals 4 d'avrigl 2023 (prot.nr. 256/2023) ha la Regenza stgaffì las premissas legalas, per che er polizistas e polizists cun ina permissiun da domicil possian vegnir recrutads. En in project da pilot duai vegnir sclerì, sch'i exista tar las persunas domiciliadas en l'Engiadina in interess per la professiun da polizista u polizist, quant grond che quest interess è, e co che l'inte­graziun en il corp da polizia reussescha. Prospectivamain ha la Polizia chantunala sviluppà la «Strategia Kapo 2025+» e fixà en quest connex tschintg iniziativas stra­tegicas. Duas da questas iniziativas, numnadamain l'attractivitad dal patrun e la direcziun e cultura d'interpresa, èn mussavias per las incumbensas ed ils projects ch'èn gia vegnids sviluppads – u ch'èn anc da sviluppar en l'avegnir – per tegnair e per recrutar collavuraturas e collavuraturs. Tras mesiras organisatoricas, structuralas e persunalas ch'èn vegnidas realisadas intenziunadamain sur blers onns è la Polizia chantunala pertutgada fin ussa mo pauc da la mancanza da persunas spezialisadas, quai cun excepziun da paucas mancanzas da persunal en la regiun Engiadina – e là oravant tut en l'Engiadin'Ota. En spezial pervia dals auts fits d'abitaziuns han ins stgaffì en la regiun Engiadina ulteriurs stimuls finanzials cun supplements, per uschia motivar las collavuraturas ed ils collavuraturs da restar ils emprims 5 onns da ser­vetsch en la vallada alpina. Per porscher a las persunas spezialisadas differents mo­dels da lavur, sa concentrescha la Polizia chantunala sin la flexibilitad da las plazzas da lavur. Sche pussaivel vegn adina permessa la lavur remote, lavur parziala e job-sharing. Ils accents per tegnair e per recrutar collavuraturas e collavuraturs vegnan plinavant mess cun il project «Marketing e recrutaziun da persunal». Plinavant vegn elavurà in nov concept per il svilup dal persunal che garantescha a las collavuraturas ed als collavuraturs perspectivas entaifer l'agen corp da polizia, inclusivamain las pussaivladads necessarias da scolaziun da cader e da scolaziun spezialisada. Latiers tutga er la cuntinuaziun da l'engaschament da polizistas e polizists che han problems da sanadad cun incumbensas pli simplas, sco per exempel incumbensas da la polizia communala.

Tar la dumonda 2: La Polizia chantunala examinescha cuntinuadamain sias incum­bensas e sias prestaziuns. In process d'optimaziun cuntinuant demussan l'externa­lisaziun dals accumpagnaments da transports cun camiuns gronds ad interpresas privatas l'onn 2018, l'aboliziun da l'unitad speziala Sfunsaders l'onn 2018 e la nova regulaziun en il concept da salvament, l'acquisiziun da las unifurmas da polizia per tut ils corps incl. la reorganisaziun da l'acquisiziun e la magasinaziun l'onn 2020 sco er la separaziun da las incumbensas en il traffic da guntgida tranter l'Uffizi da con­strucziun bassa, las vischnancas e la Polizia chantunala l'onn 2022. Ils cunfins da talas externalisaziuns dad incumbensas ad interpresas privatas èn il monopol da pussanza dal stadi ed en general la legislaziun.

Tar la dumonda 3: En il rapport «Polizia dal Grischun 2015plus» che la Regenza ha approvà ils 22 da settember 2015, èn las furmas da liquidar las incumbensas vegni­das analisadas e preschentadas detagliadamain en il chapitel II, p. 24 ss. La repar­tiziun da las incumbensas tranter il chantun e las vischnancas en il sectur polizial e las conclusiuns che la Regenza aveva tratg quella giada concernent il rapport men­ziunà, èn anc adina valaivlas (al lieu inditgà, p. 56), numnadamain: Las structuras existentas en il chantun Grischun èn sa cumprovadas, il tema polizia unitara na vegn betg persequità vinavant. Per consequenza duess la collavuraziun tranter las visch­nancas e la Polizia chantunala vegnir concepida vinavant cun agid da cunvegnas contractualas che tegnan quint da la situaziun respectiva. Las vischnancas han qua tras la pussaivladad da surdar lur incumbensas polizialas sin basa voluntara a la Polizia chantunala. Quai vegn er fatg uschia en la pratica. Las vischnancas dumon­dan mintgamai la Polizia chantunala per ina soluziun contractuala, betg il cuntrari.

Tar la dumonda 4: En cas da differentas cuntravenziuns cunter l'urden giuridic pre­tenda e conceda la legislaziun la pussaivladad d'incassar multas en la procedura da multas disciplinaras. Gia mo pervia da quai n'èsi betg pussaivel d'abolir questa posi­ziun da bilantscha. Bleras multas disciplinaras pronunziadas en il sectur da traffic, sco charrar senza tschinta, charrar senza glisch, charrar memia svelt, surpassar en moda privlusa, servan a la segirezza dal traffic e ston vegnir pronunziadas pervia da l'inobservanza da disposiziuns legalas. Controllas da radar vegnan exequidas cun pauc persunal ch'è però spezialisà. Ellas servan unicamain a la segirezza dal traffic. Pli paucas controllas da radar chaschunan damain segirezza dal traffic ed uschia dapli accidents cun donn da persunas e/u donn material. Mintga accident evità spargna suffrientschas e schanegia bler pli fitg las resursas da persunal ed è uschia ina fitg buna mesira da prevenziun da la polizia da traffic.

Bildrm
 17 d'october 2023