Navigaziun principala

Cuntegn da la pagina

Moziun concernent reveder l'ordinaziun davart il notariat

sessiun: 30.05.2000
Fatgs:
1. Notars en il senn da l'ordinaziun grischuna davart il notariat èn ils notars patentads, ils notars cirquitals ed ils administraturs dal register funsil.
L'art. 2 da l'ordinaziun davart il notariat (ONo) di ch'ils notars sajan cumpetents per far documentaziuns e legislaziuns en il senn digl art. 17 LItCCS.
L'art. 17 LItCCS regla dentant be las documentaziuns per propi e betg las legalisaziuns. Quai ha per consequenza intschertezzas e situaziuns betg praticablas. La cumissiun davart il notariat represchenta p. ex. l'opiniun ch'ils notars cirquitals dastgian legalisar be la suttascripziun d'ina persuna domiciliada en il circul.
2. Per ch'i possia er vegnir garantì in servetsch public che funcziuna en las valladas, è l'art. 2 al. 2 da la ONo da midar uschia, respectivamain da sclerir uschia che tut ils notars pia er ils notars cirquitals ed ils administraturs dal register funsil sajan cumpetents per legalisaziuns, e quai senza restricziuns territorialas. I sto bain esser pussaivel che la persuna da documentaziun ch'è autorisada da documentar in impegn immobigliar da pli che 1 milliun francs stoppia er esser autorisada da legalisar ina simpla suttascripziun. Quest giavisch na vegn betg contestà da naginas varts.
Sin fundament da questas explicaziuns fan ils sutsegnads perquai la proposta da midar l'art. 2 da l'ordinaziun davart il notariat sco suonda:
Al. 1 na vegn betg midà
Al.2 (nov) Els èn cumpetents da far documentaziuns e legalisaziuns. Per documentaziuns sin il sectur dal dretg civil èn els cumpetents en il rom digl art. 17 LItCCS.

Cuira, ils 30 da matg 2000

Namen: Zarro, Keller, Lemm, Ambühl, Augustin, Bachmann, Bär, Barandun, Battaglia, Brüesch, Casanova, Catrina, Claus, Giacometti, Giovannini, Gross, Hartmann, Heinz, Juon, Kehl, Lardi, Luzi, Meyer, Nick, Noi, Parolini, Peretti, Plozza, Quinter, Righetti, Rizzi, Roffler, Schmid (Sedrun), Schmid (Spleia), Suter, Telli, Thomann, Tramèr, Trepp, Tuor (Trun), Walther

Session: 30.05.2000
Vorstoss: rg Motion

Resposta da la regenza

La scienza e la giurisdicziun dal tribunal federal partan dal fatg che la noziun da la documenta-ziun publica appartegnia al dretg federal. Sa basond sin l'art. 55 Tfin CCS vala ch'il dretg federal reglia la dumonda (da dretg material), tge che saja ina documentaziun publica. Il dretg chantunal respunda la dumonda (dal dretg da procedura) co ch'in document public vegnia creà.
Il cuntegn d'ina documentaziun publica èn decleranzas da voluntad e conscienza, causals ed andaments. Object da la documentaziun publica d'in causal resp. da fatgs existents èn constataziuns che la persuna da documentaziun fa a basa d'atgnas ob-servaziuns. Latiers tutgan causals sco la legalisaziun uffiziala d'ina suttascripziun u da la copia d'in document, la constataziun da las activas e passivas en il rom d'in in-ventari uffizial u l'attestaziun, tge persunas u corporaziuns ch'il relaschader ha laschà enavos sco ertavels. La noziun dal dretg federal da la documentaziun publica cum-piglia pia sco noziun superiura expressivamain er il causal da la legalisaziun.
En l'art. 17 LItCCS sa chatta la regulaziun legala da las cumpetenzas materialas e localas per la documentaziun publica. Tenor il messadi da la regenza dals 2 da no-vember 1992 avess il sistem da fin uss gia stuì vegnir reglà en la lescha cun il notar patentà, cun il notar cirquital e cun l'administratur dal register funsil. Cuntrari a la cumpetenza generala dals notars patentads che dastgan agir en l'entir chantun, a-vess il champ d'activitads dals notars ciquitals duì vegnir restrenschids localmain. Ina proposta da stritgar la relaziun dals notars cirquitals cun il circul è vegnida refusada en il cussegl grond cun 87 encunter 11 vuschs a favur da la proposta da la regenza e da la maioritad da la cumissiun. Uschia è vegnì deliberà l'art. 17 LItCCS en la furma odierna cun la clera opiniun che la cumpetenza locala dals notars cirquitals saja da restrenscher.
Cun ina midada da l'ordinaziun davart il notariat na po betg vegnir tegnì quint da la moziun, damai che la regulaziun davart la cumpetenza è detagliada e clera en l'art. 17 LItCCS ed ina midada da la cumpetenza locala sin stgalim da l'ordinaziun davart il notariat cuntrafaschess a la disposiziun legala surordinada.
Tenor las materialias tar la LItCCS ha regì cleramain l'intenziun da liar l'activitad dals notars cirquitals d'ina vart al circul e da l'autra vart al lieu (da domicil) da las partidas resp. al lieu dals bains immobigliars. Ina sumeglianta restricziun vala per l'administratur dal register funsil. Perencunter ageschan ils notars patentads en l'entir chantun. Uschia po il servetsch public vegnir garantì a moda suffizienta. En quest connex èsi da resguardar ch'i dat oz in dumber suffizient da notars patentads ch'èn obligads tenor l'art. 23 da l'ordinaziun davart il notariat da far er legalisaziuns. Ultra da quai èn vegnids dismess ils notars auxiliars en il rom da la revisiun da l'ordinaziun davart il notariat e persuenter èsi vegnì dà als circuls la pussaivladad d'eleger da nov dus notars cirquitals. Sche tut ils notars cirquitals fissan uss autorisads da far legali-saziuns senza ina colliaziun localas fiss abolì il princip da la cumpetenza territoriala. I dess alura en quest cas er nagins motivs che giustifitgassan ch'in notar cirquital pu-dess far documentaziuns en il senn pli stretg senza relaziun cun ses circul. Perquai è la moziun da refusar tant per motivs furmals sco er per motivs materials.

Cuira, 29 d'avust 2000