Il conduct existent da la Oleodotto del Reno SA (ODR SA) na transporta dapi il schaner 1997 effectivamain betg pli ieli da Genua ad Ingoldstadt tras il chantun Grischun. Suenter che l'emprova da duvrar il conduct d'ieli per il transport da gas n'ha betg reussì, vegnan examinadas dapi var in onn autras soluziuns per mantegnair e duvrar il conduct en in'autra moda:
Pertutgant las singulas dumondas:
1. La ODR SA è actualmain sin il precint da concluder las tractativas cun interessents or da la branscha internaziunala da telecommunicaziun. Il conduct duai servir da nov sco recipient per cabels da fibras da vaider che vegnan duvrads per construir ina colliaziun internaziunala da communicaziun tranter la Germania e l'Italia.
2. La permissiun per la construcziun ed il manaschi d'in conduct da bischens che datescha da l'onn 1961 na prevesa betg ina obligaziun da vart da la ODR SA da prestar indemnisaziuns en il cas ch'ella serra ses manaschi anticipadamain. Ins po pretender ina indemnisaziun be, sche dretgs privats u publics vegnan pregiuditgads tras la renaturalisaziun dal stabiliment.
3. Davart in eventual return a tschep na cuntegna la permissiun existenta naginas regulaziuns. Ella prevesa sulettamain il restabiliment dal stadi original en cas da revocaziun u da scadenza da la permissiun. Il chantun na po betg avair interess ch'il conduct actual vegnia allontanà. Per motivs da l'economia publica e da la politica regiunala sa demussa la midada dal diever previsa d'esser raschunaivla e giavischada. A las persunas chargiadas cun servituts èsi perquai da recumandar da far ina regulaziun en enclegientscha vicendaivla al mument che la cunvegna da fin uss vegn substituida.
4. Sche las tractativas currentas tranter la ODR SA ed ils interessents internaziunals e sche la substituziun da la permissiun actuala han success, alura na cuntrafa nagut ad ina reactivaziun dals stabiliments sco recipients per lingias da transport da datas.
5. Dapi ch'igl è vegnì fatg enconuschent che la ODR SA ha l'intenziun da midar il diever dal conduct, sustegna la regenza la ODR SA cun intermediar e coordinar las proceduras, e quai perquai ch'ella è persvadida che metter ord funcziun resp. allontanar ils stabiliments na fiss betg raschunaivel ord vista economica. Actualmain vegnan fatgs differents scleriments entaifer il chantun e sin plaun federal per far avanzar il project. Finalmain ponderescha la regenza da vender il pachet d'aczias dal chantun a la ODR SA.


Cuira, ils 2 d'october 2000