Dumonda en scrit concernent la Oleodotto del Reno SA
Sessiun: 02.10.2000
Enconuschentamain è il conduct d'ieli che traversa noss chantun gia dapi ditg ord funcziun. Evidentamain n'han betg purtà fritg ils scleriments ch'èn vegnids fatgs per dar in nov intent d'utilisaziun a quest med da transport, sco per exempel il diever sco conduct per il transport da gas u sco recipient d'ina lingia per il transport da datas. Per proteger l'ovra da donns da corrusiun è ella vegnida emplenida en il fratemp cun ina maschaida da nitrogen. La messa ord funcziun dal conduct d'ieli ha malavita per consequenza che las entradas urgentamain necessarias mancan al chantun ed eventualmain ad ulteriurs circuls e che ultra da quai van a perder plazzas da lavur.
Il sutsegnà ha perquai las suandantas dumondas:
1. Co è il stadi da las chaussas areguard l'ulteriur diever dal conduct d'ieli?
2. Tge indemnisaziuns pon pretender il chantun ed eventualmain ulteriurs circuls sin fundament da la messa ord funcziun anticipada da quest conduct d'ieli?
3. Co statti cun in pussaivel return a tschep?
4. Pon ins far quint cun ina reactivaziun per in auter intent?
5. Tge activitads planisescha la regenza?
Cuira, ils 2 d'october 2000
Namen: Portner
Session: 02.10.2000
Vorstoss: rg SchriftlicheAnfrage
Resposta da la regenza
Il conduct existent da la Oleodotto del Reno SA (ODR SA) na transporta dapi il schaner 1997 effectivamain betg pli ieli da Genua ad Ingoldstadt tras il chantun Grischun. Suenter che l'emprova da duvrar il conduct d'ieli per il transport da gas n'ha betg reussì, vegnan examinadas dapi var in onn autras soluziuns per mantegnair e duvrar il conduct en in'autra moda:
Pertutgant las singulas dumondas:
1. La ODR SA è actualmain sin il precint da concluder las tractativas cun interessents or da la branscha internaziunala da telecommunicaziun. Il conduct duai servir da nov sco recipient per cabels da fibras da vaider che vegnan duvrads per construir ina colliaziun internaziunala da communicaziun tranter la Germania e l'Italia.
2. La permissiun per la construcziun ed il manaschi d'in conduct da bischens che datescha da l'onn 1961 na prevesa betg ina obligaziun da vart da la ODR SA da prestar indemnisaziuns en il cas ch'ella serra ses manaschi anticipadamain. Ins po pretender ina indemnisaziun be, sche dretgs privats u publics vegnan pregiuditgads tras la renaturalisaziun dal stabiliment.
3. Davart in eventual return a tschep na cuntegna la permissiun existenta naginas regulaziuns. Ella prevesa sulettamain il restabiliment dal stadi original en cas da revocaziun u da scadenza da la permissiun. Il chantun na po betg avair interess ch'il conduct actual vegnia allontanà. Per motivs da l'economia publica e da la politica regiunala sa demussa la midada dal diever previsa d'esser raschunaivla e giavischada. A las persunas chargiadas cun servituts èsi perquai da recumandar da far ina regulaziun en enclegientscha vicendaivla al mument che la cunvegna da fin uss vegn substituida.
4. Sche las tractativas currentas tranter la ODR SA ed ils interessents internaziunals e sche la substituziun da la permissiun actuala han success, alura na cuntrafa nagut ad ina reactivaziun dals stabiliments sco recipients per lingias da transport da datas.
5. Dapi ch'igl è vegnì fatg enconuschent che la ODR SA ha l'intenziun da midar il diever dal conduct, sustegna la regenza la ODR SA cun intermediar e coordinar las proceduras, e quai perquai ch'ella è persvadida che metter ord funcziun resp. allontanar ils stabiliments na fiss betg raschunaivel ord vista economica. Actualmain vegnan fatgs differents scleriments entaifer il chantun e sin plaun federal per far avanzar il project. Finalmain ponderescha la regenza da vender il pachet d'aczias dal chantun a la ODR SA.
Cuira, ils 2 d'october 2000