Navigaziun principala

Cuntegn da la pagina

Postulat concernent la reorganisaziun dals uffizis da stadi civil

sessiun: 02.10.2000
En ses documents da consultaziun tar la revisiun parziala da l'ordinaziun executiva davart ils fatgs da stadi civil propona la regenza d'ina vart la varianta dals circuls (da reunir circuls) sco er la varianta dals districts. Ella favurisescha l'ultima varianta cun l'argumentaziun che quella correspundia al concept da l'organisaziun giudiziala ch'entra en vigur il 1. da schaner 2001.
Ils postulants constateschan en quest connex ch'ils districts èn vegnids introducids en il rom dal sboz da la constituziun dal 1851 sco circuls da dretgira che n'avevan e n'han insumma naginas incumbensas administrativas e funcziuns politicas. Quai en cumparegliaziun cun ils circuls ch'han in'impurtanza culturala, istorica e politica sco er ina realitad vivida, e duessan avair quella vinavant er sin fundament da l'organisaziun giudiziala. Quai accentuescha er la creaziun dal cussegl cirquital.
La revisiun parziala da l'ordinaziun davart il stadi civil croda en il temp da la discussiun davart la nova constituziun. Sch'i vegn discurrì en la consultaziun da la regenza da favurisar la varianta dals districts, è quai nuschaivel per la libra discussiun davart la concepziun da las funcziuns e dals plauns administrativs futurs e po schizunt manar a pregiudizis nungiavischads.
Cun ina reglamentaziun fixa da 40% sa lascha bain chattar ina soluziun organisatoria, ma l'effizienza na s'augmenta perquai anc ditg betg. I correspunda a las tendenzas centralisticas dad oz che cuntrasteschan cun la politica d'occupaziun en las regiuns periferas e cun las stentas per il mantegniment da plazzas da lavur. En ils documents da consultaziun na vegn er betg menziunada la qualitad dals uffizials da stadi civil sco motiv per la reorganisaziun, mabain notabene l'introducziun d'in sistem central sustegnì da la EED. L'introducziun è previsa per il 2004/2005. Perquai èn ils postulants da l'opiniun ch'i saja sin fundament da las explicaziuns precedentas - giustifitgà da suspender questa fatschenta. Els na pon betg sa distatgar da l'impressiun che l'execuziun saja stada in act d'obedientscha memia premurus. Dal rest permettan gist las tecnicas da communicaziun modernas adina pli savens organisaziuns decentralas senza grondas expensas supplementaras.
Perquai envidain nus la regenza da:
suspender la revisiun parziala da l'ordinaziun executiva davart il stadi civil u almain da la coordinar uschia ch'ella correspunda a la revisiun da la constituziun; metter ensemen pensums da lavur, sco previs en il cas dals uffizials da stadi civil, na sto numnadamain betg succeder d'uffizi ad uffizi, mabain po er vegnir schlià entaifer autras organisaziuns (circuls, corporaziuns regiunalas e.u.v.). Uschia na vegn betg gia mess in signal en direcziun d'ina dismessa dals circuls cun favurisar la varianta dals districts.

Cuira, ils 2 d'october 2000

Namen: Hübscher, Crapp, Bär, Ambühl, Bachmann, Barandun, Battaglia, Beck, Brunold, Bühler, Butzerin, Caviezel, Christoffel, Dalbert, Giovannini, Göpfert, Hanimann, Hardegger, Hartmann, Heinz, Hess, Jeker, Juon, Keller, Kessler, Lemm, Märchy, Marti, Möhr, Montalta, Nigg, Parolini, Patt, Pleisch, Portner, Ratti, Rizzi, Scharplatz, Schmid (Sedrun), Schütz, Telli, Thöny, Tscholl, Tuor, Valsecchi, Vetsch, Wettstein, Zegg, Zinsli

Session: 02.10.2000
Vorstoss: rg Postulat

Resposta da la regenza

Il 1. da schaner 2000 è entrada en vigur l'ordinaziun federala revedida davart il stadi civil. Quella oblighescha ils chantuns da divider ils circuls da stadi civil uschia che las persunas incumbensadas cun ils fatgs da stadi civil cuntanschan in grad d'occupaziun d'almain 40 pertschient unicamain cun activitads da stadi civil. La finamira da questa revisiun è stada da garantir qua in'execuziun professiunala fidada per l'entir pajais.
Examinond il grad d'occupaziun dals circuls da stadi civil en il chantun Grischun, èsi sa mussà ch'ils pli paucs uffizis adempleschan questa pretaisa, uschia ch'ina revi-siun da l'ordinaziun grischuna davart il stadi civil vegn ad esser inevitabla. Silsuenter ha la regenza dà en consultaziun duas variantas che prevesevan da resumar la funcziun dals uffizis da stadi civil sin stgalim dals circuls u dals districts.
Er sch'i dat buns motivs per la varianta dals districts e sche quella è vegnida sustegnida u schizunt favurisada d'insaquants adressats da la consultaziun, planisescha la regenza da proponer al cussegl grond d'organisar ils uffizis da stadi civil tenor ils circuls e quai sin fundament da la maioritad predominanta da las posiziuns. Ils uffizis da stadi civil duain dentant s'unir entaifer il district u duain er pudair vegnir fusiunads.
Il postulat envida la regenza da spetgar cun la reorganisaziun dals fatgs da stadi civil e da coordinar quels cun la revisiun da la constituziun pendenta per betg periclitar u schizunt pregiuditgar la libra discussiun davart las funcziuns futuras da l'administraziun.
Sco gia explitgà è entrada en vigur il 1. da schaner 2000 la revisiun dal dretg federal, sin la quala sa basa il project da revisiun chantunal. Per restructurar ils uffizis da stadi civil en il senn da l'artitgel 3 alinea 1bis da la OSC (DS 211.112.1), han ils chantuns survegnì in termin transitori fin ils 31 da december 2005 (artitgel 188l alinea 1 OSC). Sch'ins considerescha che la regiunalisaziun dals uffizis da stadi civil premetta per mintgin dals 198 uffizis da stadi civil actuals ina surdada d'uffizi formala (artitgel 25 OSC), vegn il termin transitori en il chantun Grischun, sche insumma, be a tanscher per pauc. Ina surdada d'uffizi è numnadamain cumpigliada cun bler temp perquai ch'ella premetta in'inspecziun da register detagliada. Gia per quest motiv na pon ins betg spetgar cun la revisiun da l'ordinaziun executiva dal cussegl grond fin ch'è terminada la discussiun politica davart il concept da la nova constituziun chantunala.
Sch'ins spetgass pli ditg, chaschunass quai er problems organisatoris perquai che l'introducziun dad Infostar l'onn 2002 (betg 2004/2005, sco menziunà dals postulants) vegn a reducir supplementarmain il temp da lavur da l'uffizial da stadi civil. L'engaschi minimal da 40% ordinà da la confederaziun, sto damai vegnir calculà alura da nov per tut las persunas occupadas cun ils fatgs da stadi civil. Las consequenzas futuras dad Infostar ston perquai vegnir resguardadas gia en la fasa da realisa-ziun. L'installaziun da bunamain 200 colliaziuns cun la banca da datas centrala federala e la scolaziun individuala previsa per il manaschi dals applitgaders gist uschè numerus, chaschunassan custs nunprevesibels che n'èn betg da responsar sulettamain per in'utilisaziun transitoria. La restructuraziun sto perquai vegnir accelerada en tutta prescha.
Per tut quests motivs propona la regenza da refusar il postulat.

Cuira, ils 2 d'october 2000