Navigaziun principala

Cuntegn da la pagina

Moziun concernent il postulat Bucher ed il concept 1995 dal departament da giustia, polizia e sanitad davart consegnar squittas

sessiun: 02.10.2000
En il Grischun vegnan annunziadas annualmain circa 6 novas infecziuns cun il virus HIV, 1 fin 2 da quellas infecziuns vegnan chaschunadas tras il diever da squittas gia duvradas. Betg cumpiglià è il dumber da giasts da vacanzas da la Svizra e da l'exteriur ch'èn vegnids infectads tar nus sco er la quantitad dals stagiunaris che lavuran sin il sectur dal turissem e che han laschà far il test giu la Bassa u en lur patria. Ins po pia discurrer d'in dumber inuffizial considerabel.
Durant il di funcziunan senza problems la cumpra ed il barat da squittas en apotecas, posts da cussegliaziun e.u.v.
Drogas da tut gener pon ins chattar senza problems er en la vischnanca la pli pitschna da noss chantun. I n'è dentant betg uschè simpel da chattar là er las squittas sterilas ch'èn necessarias per ina injecziun netta, almain betg durant la notg. Sentiments da vargugna ed il basegn da restar anonim impedeschan dad ir la notg en l'apoteca. Ultra da quai stuess ins savens anc svegliar l'apotecra, quai che custass giustifitgadamain anc il supplement da notg d'almain 10.20 francs.
Pervia da la mancanza da basas legalas che pudessan obligar las vischnancas da render accessiblas las squittas en automats, è il concept da l'onn 1995 restà senza effect. Sulettamain Tavau e Cuira han ademplì lur duairs. Autras vischnancas pli grondas ch'ins ha dumandà n'han betg sa laschà persvader da far quel pass, e quai savens per motivs nunchapaivels, per part er betg suenter discussiuns intensivas cun las organisaziuns professiunalas cumpetentas. L'autonomia communala va a fin là, nua che la responsabladad per la prevenziun e la limitaziun dals donns entschaiva. En quest cas n'han ins deplorablamain insumma betg realisà quai, u sulettamain a moda insuffizienta. Ils centers han prestà insaquantas contribuziuns per limitar ils donns en connex cun il consum da drogas ed han era recepì toxicomans da la periferia, saja quai cun u senza intenziun. La politica da drogas a quatter pitgas da la confederaziun ston ins era realisar sin il sectur da l'agid a surviver e da la prevenziun, quai vul tranter auter er dir che l'access a squittas ed artitgels d'igiena è da garantir a moda nunbirocratica ed anonima.
Las sutsegnadas ed il sutsegnads da questa moziun dumondan la regenza da decretar las disposiziuns legalas necessarias per ch'il concept surmenziunà da l'onn 1995 possia finalmain vegnir realisà en l'entir territori chantunal. En tut ils centers pli gronds dal chantun (San Murezzan, Samedan, Scuol, Poschiavo, Arosa, Claustra, Tavau, Cuira, Landquart, Flem/Laax, Glion, Mustér, Tusaun, Roveredo, Sta. Maria e Samignun) stoi dar la pussaivladad da retrair squittas, e quai da tut las uras ed a moda birocratica ed anonima.

Cuira, ils 2 d'october 2000

Namen: Trepp, Bucher, Meyer, Arquint, Casanova (Cuira), Catrina, Caviezel, Claus, Feltscher, Frigg, Hardegger, Hess, Jäger, Joos, Kessler, Locher, Nick, Noi, Pfenninger, Pfiffner, Portner, Scharplatz, Schmid (Spleia), Schütz, Tscholl, Tuor, Zanolari, Zindel, Martschitsch

Session: 02.10.2000
Vorstoss: rg Motion

Resposta da la regenza

La consegna da material d'injecziun net è ina mesira impurtanta per prevegnir a l'ulteriura derasaziun d'Aids e hepatitis. Savend quai ha la regenza introducì l'entschatta da l'onn 1991 la consegna gratuita da squittas a toxicomans che squittan a moda intravenusa; quai è succedì en collavuraziun cun il post da cussegliaziun da giuvenils e da dumondas da drogas, l'agid grischun cunter Aids, cun ils apotechers ed ils medis.
Sin fundament dal postulat Bucher ch'il cussegl grond ha approvà en la sessiun da november/december 1994 e che s'occupa da l'adattaziun dal provediment da squittas per toxicomans als basegns actuals d'ina prevenziun effizienta cunter HIV, ha modifitgà il departament da giustia, polizia e sanitad l'entschatta 1994 il concept da consegnar squittas. Il concept modifitgà cumpiglia oravant tut la creaziun da posts da consegna ch'èn averts la notg sco er l'installaziun d'automats per la consegna da squittas e flash-boxes.
Cun la brev dals 14 da favrer 1995 ha il departament da giustia, polizia e sanitad dumandà las vischnancas d'examinar il basegn d'ina pussaivladad da consegna da squittas durant 24 uras e d'instradar las mesiras necessarias.
Fin uss han ins pudì installar tut en tut trais automats da squittas sin il territori da la citad da Cuira ed en il circul da Tavau. Problems sco squittas che giaschan giun plaun, la furmaziun da novas scenas da droga e sumegliants n'hai dà en nagin da quels lieus da consegna.
Sin dumondas da pudair installar automats da squittas a Samedan ed a San Murezzan ha l'agid grischun cunter Aids fin uss obtegnì ina resposta negativa da las vischnancas.
En vista a questa situaziun da partenza intenziunescha l'uffizi dal servetsch social dal chantun d'installar proximamain en insaquantas vischnancas da pilot automats da squittas sin territori privat. Per installar automats da squittas sin territori public dovri l'approvaziun da la vischnanca, per far quai sin territori privat è dentant mo necessaria la permissiun da l'uffizi chantunal da polizia.
L'installaziun d'automats da squittas e flash-boxes è ina mesira adequata per proveder ils toxicomans cun squittas, e quai a moda nunbirocratica e durant 24 uras. Cun questa mesira pon ins impedir ch'ils toxicomans injecteschan la substanza cun squittas gia duvradas. Correspundentamain è la regenza da l'avis ch'il concept 1995 dal departament da giustia, polizia e sanitad davart consegnar squittas saja da realisar en mintga cas. Ella è er da l'avis ch'ina obligaziun legala da las vischnancas d'installar automats da squittas, respectivamain d'approvar il manaschi da tals apparats, saja da considerar pir cur ch'ins sa definitivamain ch'i na dat nagin'autra via da proveder ils toxicomans cun squittas a moda nunbirocratica e da tuttas uras.
En quest senn sa declera ella pronta d'acceptar la moziun sco postulat.

Cuira, ils 3 d'october 2000