Navigation

Inhaltsbereich

Interpellaziun concernent la Tele-Rätia SA

Sessiun: 02.10.2000
La Tele-Rätia SA è ina societad anonima ch'è vegnida fundada dal maun public l'onn 1980. Dals acziunaris fan part exclusivamain corporaziuns dal dretg public. Cun ina participaziun da passa 80% è il chantun Grischun acziunari da maioritad; dapi pauc temp dentant senza esser represchentà en il cussegl administrativ. Ils ulteriurs contrahents da la Tele-Rätia SA èn vischnancas, circuls u corporaziuns regiunalas. La Tele-Rätia SA ha l'intent da proveder il chantun cun ils programs fundamentals ed ultra da quai cun programs supplementars da radio e televisiun, e quai a las meglras cundiziuns pussaivlas. Plinavant ha la societad l'intent da furnir prestaziuns da servetsch sin l'entir sectur da telecommunicaziun.
Per cuvrir ils custs dal provediment da 115 vischnancas cun quatter programs esters da TV sco er cun ils radios locals Grischa e Piz incassa la Tele-Rätia SA taxas da diever sin fundament ed a norma da las cunvegnas stipuladas tranter la Tele-Rätia SA e las vischnancas resp. ils circuls u las regiuns.
En las sentenzas relaschadas dacurt ha il tribunal federal renconuschì da princip il dretg da la Tele-Rätia SA d'incassar taxas per il provediment da televisiun senza cabel, ha dentant constatà il medem mument che l'incassament da las taxas na stoppia betg esser collià mo cun il possess d'in apparat da televisiun, mabain er cun l'existenza resp. il manaschi d'in indriz da recepziun. Dal rest ha il tribunal federal considerà sco inadmissibel che la taxa incassada per la recepziun da televisiun vegnia er duvrada per la diffusiun ulteriura da programs locals da radio. Ch'in tal diever equivalia ad ina subvenziun cruschada inadmissibla e cuntrafetschia uschia al princip da legalitad.
Sin fundament da questa situaziun effectiva e legala dumandain nus la regenza:
1. Tge pon far las vischnancas per che las insuffizienzas crititgadas dal tribunal federal vegnian eliminadas e per che tut las aspectaturas ed ils aspectaturs da televisiun pajan taxas?
2. Tge pon far las vischnancas per ch'ellas disponian er en il futur d'in provediment adequat cun programs da radios locals sin lur territoris? Tge intenziuns ha la Tele-Rätia SA sin quest sectur?
3. Tge pussaivladads ha il chantun per garantir in provediment cun programs da televisiun e da radios locals en l'entir chantun? Tge vul el far sin quest sectur?
4. È la regenza pronta d'intervegnir tar la confederaziun per che quella garanteschia in provediment equivalent cun ina purschida adequata da programs da televisiun e da radios locals en las regiuns da muntogna e periferas?
5. Tge strategia futura ha la Tele-Rätia SA sin il martgà da telecommunicaziun liberalisà, spezialmain en vista al provediment dal chantun cun novas tecnologias d'infurmaziun e da communicaziun? È la regenza pronta da sustegnair la Tele-Rätia SA en questa nova provocaziun strategica?
6. N'è la regenza betg da l'avis che l'acziunari maioritar d'ina societad anonima duess esser represchentà en il cussegl administrativ?

Cuira, ils 2 d'october 2000

Namen: Telli, Walther, Casanova, Bär, Barandun, Bischoff, Bühler, Capaul, Catrina, Caviezel, Demarmels, Donatsch, Feltscher, Giacometti, Giovannini, Hanimann, Hartmann, Hess, Hübscher, Jäger, Juon, Kessler, Lemm, Maissen, Märchy, Marti, Parolini, Portner, Robustelli, Scharplatz, Schmid (Spleia), Suter, Tramèr, Wettstein, Zanolari, Zarro, Martschitsch, Bezzola

Session: 02.10.2000
Vorstoss: rg Interpellation

Resposta da la regenza

La Tele-Rätia SA è vegnida fundada l'onn 1980 sco societad anonima dal maun public a basa d'in conclus dal cussegl grond. La finamira oriunda da la Tele-Rätia SA era il provediment cun programs esters da televisiun senza cabel en l'entir chantun, e quai per eliminar almain per part il provediment mancant surtut en valladas giud via. Cun passa 18 staziuns emetturas da TV resp. reemetturs da TV e cun 21 reemetturs dad UKW proveda la Tele-Rätia SA oz 115 da las 212 vischnancas grischunas cun quatter programs esters da TV sco er cun ils radios locals Grischa e Piz. Dals acziunaris da la Tele-Rätia SA fan part exclusivamain corporaziuns dal dretg public.
En consequenza da la liberalisaziun dal martgà da telecommunicaziun ha la Tele-Rätia SA concludì avant bunamain dus onns da meglierar considerablamain sia purschida telematica existenta. Questa nova orientaziun ha chaschunà la fundaziun da la NetCom Grischun SA, ina filiala a 100 pertschient da la Tele-Rätia SA. La finamira primara da la NetCom SA è quella da parar ils deficits pervia da la libra concurrenza sin il martgà da telecommunicaziun e da crear en il chantun Grischun, grazia ad ina soluziun cun economia da martgà, las premissas per ina constituziun pass per pass d'ina rait da communicaziun e las premissas per las novas tecnologias d'infurmaziun e da telecommunicaziun.
Sin fundament da quest svilup pudain nus respunder las dumondas da las interpellantas e dals interpellants sco suonda:
1. In return a quel stadi giuridic, sco ch'el sa preschentava avant las duas sentenzas dal tribunal federal, n'è betg pussaivel, perquai che - tenor las explicaziuns impegnativas dal tribunal federal - l'incassament da taxas per in provediment cun televisiun senza cabel na sto betg vegnir cumbinà mo cun il possess d'in apparat da televisiun, mabain cun l'existenza effectiva resp. cun il manaschi d'in indriz da recepziun (antenna).
2. Per che las vischnancas disponian er en il futur d'in provediment adequat cun programs da radios locals en lur territoris, ston vegnir cumplettadas las basas legalas en las vischnancas ed en ils circuls en quel senn, che la Tele-Rätia SA vegn incumbensada er cun il provediment cun programs da radios locals. Il diever da las taxas incassadas per la recepziun da televisiun per la diffusiun ulteriura da programs da radios locals considerescha il tribunal federal sco inadmissibel.
3. Cun la Tele-Rätia SA dispona il chantun gia d'in instrument che garantescha il provediment fundamental cun programs esters da televisiun senza cabel en il chantun. Parallellamain a quest provediment radioelectric succeda la megliuraziun da la purschida cun cabel, grazia ad ina rait moderna ed efficazia da communicaziun tras la NetCom SA. In provediment equivalent per l'entir chantun è però nunrealistic. Cun ils instruments menziunads vegni empruvà dentant da cuntanscher in provediment uschè bun sco pussaivel.
4. Sin il sectur da medias ch'è segnà da las midadas tecnicas e da la liberalisaziun na vegn la regenza betg a tralaschar da s'engaschar tar la confederaziun en favur d'in provediment equivalent cun ina purschida adequata da programs da TV e radio en las regiuns da muntogna e periferas. Discurs gia terminads tranter il departament cumpetent d'educaziun, cultura e protecziun da l'ambient e l'uffizi federal da communicaziun (UFCOM) vegnan proximamain a dar la pussaivladad da sclerir la posiziun respectiva da la regenza.
5. La regenza sustegna ils interess da la NetCom Grischun SA da constituir pass per pass ina vasta infrastructura da telecommunicaziun en parts dal chantun. Sut la premissa ch'il cussegl grond permettia ils credits correspundents, duai l'avertura cun vastas structuras da telecommunicaziun vegnir sustegnida cun ils instruments da la promoziun da l'economia.
6. Ils cussegliers administrativs da la Tele-Rätia SA e da la NetCom Grischun SA èn vegnids numnads da nov a chaschun da las davosas radunanzas generalas. La regenza è da l'opiniun, ch'ils novs cussegliers administrativs disponian da las cumpetenzas realas e directivas necessarias e ch'ina represchentanza directa da la regenza en ils dus cussegls administrativs na s'imponia actualmain betg.

Cuira, ils 2 d'october 2000