Navigaziun principala

Cuntegn da la pagina

Interpellaziun concernent l'occupaziun da dunnas tar la polizia chantunala dal Grischun

sessiun: 02.10.2000
Jean-Pierre Monti, secretari general da la federaziun svizra dals funcziunaris da polizia, duai avair ditg tenor la pressa: „Dunnas èn in grond plus per la polizia, ellas èn adina ina idea pli perdertas, chapeschan pli spert e lur perseveranza intellectuala fa surstar.“ Il schef da la scolaziun e furmaziun professiunala tar la polizia chantunala da Berna, Hermann Garz, conferma: „Dunnas san ir enturn meglier cun agressiuns ed han ina demananza pli agreabla che tut lur collegas masculins. En la pratica ha quai damain reclamaziuns davart policistas per consequenza.“ Tut ils citats or dal Beobachter 15/2000 p. 34 ss.
Bunamain en l'entira Europa è la quota da dunnas en ils corps da polizia pli auta ch'en Svizra. Las procentualas varieschan tranter l'Estonia cun 22% e la Frantscha cun 8%. En questa glista da rangaziun sa chatta la Svizra en la segund davosa plazza: Be en la Tirchia (3%) datti damain policistas ch'en Svizra (6%). Er entaifer la Svizra existan variaziuns considerablas. La quota da policistas e polizists variescha qua tranter 9,6% (Berna) ed 1,6% (Friburg). Dal rest vegnan dunnas promovidas fitg darar en posiziuns da cader.
La quota da dunnas en las polizias chantunalas mussa in resultat dischillusiunant per il Grischun: Be en ils chantuns Uri (2,5%) e Friburg (1,6%) datti pertschientualmain damain dunnas en las polizias chantunalas ch'en il Grischun, nua che la part procentuala munta be a 2,6%.
Sin fundament da questas constataziuns faschain nus las suandantas dumondas a la regenza:
1. Tge posiziun prenda la regenza envers la constataziun dals experts da scolaziun, tenor la quala las policistas san ir enturn meglier cun agressiuns e san intermediar meglier che lur collegas masculins?
2. A tge fatg attribuescha la regenza questa pitschna quota da dunnas tar la polizia chantunala?
3. È la regenza er da l'opiniun ch'ins sto meglierar a moda decisiva la quota da dunnas en las proximas scolas da polizia?
4. Co patratga la regenza d'augmentar la quota da dunnas tar la polizia chantunala?
5. Co patratga la regenza da meglierar las schanzas da las dunnas per posiziuns da cader tar la polizia chantunala?

Cuira, ils 2 d'october 2000

Namen : Frigg, Meyer, Bucher, Arquint, Butzerin, Cavegn, Christ, Christoffel, Jäger, Joos, Locher, Looser, Märchy, Noi, Pfenninger, Pfiffner, Scharplatz, Schmutz, Schütz, Trepp, Zindel, Martschitsch

Session: 02.10.2000
Vorstoss: rg Interpellation

Resposta da la regenza

La polizia chantunala dal Grischun accepta dapi 1976 policistas. L'onn 1992 è la quota procentuala stada 3,3 pertschient da l'effectiv, a moda che la polizia chantunala dal Grischun fascheva part dals emprims corps da polizia da la Svizra. Oz munta la quota da dunnas be pli 2,9 pertschient da l'effectiv. Per elavurar delicts specifics da la schlattaina e vegliadetgna (dunnas ed uffants) sco er sin fundament da la lescha federala davart l'agid a victimas sto la polizia chantunala disponer da policistas avunda. Decisiv per l'engaschament è la qualificaziun per il servetsch da polizia. Da las 80 fin 200 candidaturas per scola da polizia durant ils onns 1989 fin 1997 èn entradas mintgamai tranter otg e 23 candidaturas da dunnas. Da quellas han tschintg fin otg dunnas reussì l'examen d'admissiun. Cun grondezzas da classa tranter 25 e 30 èn vegnidas engaschadas mintgamai dus fin trais dunnas. La quota da dunnas èn las scolas da polizia è stada pia dapi il 1989 mintgamai pli gronda che la quota a las candidaturas. Uschia vulev'ins cuntanscher la finamira da pudair recrutar almain diesch pertschient dunnas.
1. En questa furma na po la regenza betg approvar la constataziun. Ir enturn cun agressiuns e savair intermediar n'èn betg qualitads specificas d'ina schlattaina, mabain dependan plitost da la persunalitad. I dastgass però constatar che la prontezza per violenza ed agressiun è pli pitschna envers policistas. Uschia èsi savens pli simpel per dunnas da vegnir a frida cun situaziuns difficilas. Quai vegn ad esser in motiv, che la capacitad da las policistas d'ir enturn cun agressiuns e d'intermediar vegn percepida savens a moda pli positiva.
2. Decisiv per la pitschna quota da dunnas è spezialmain il curt temp d'engaschi da las dunnas en il corp da polizia. Actualmain munta quel ad ina media da set onns. Dapi 1997 n'han ins plinavant betg pli pudì manar ina scola da polizia. Quest fatg ha reducì la quota da dunnas sin il stadi actual. Totalmain han bandunà set dunnas la polizia chantunala suenter lur maridaglia, dus èn entradas en in auter corp da polizia e tschintg han midà per l'economia privata.
3. La regenza è er da l'opiniun ch'igl è d'empruvar da cuntanscher in augment da la quota da dunnas a chaschun da la proxima recrutaziun per las scolas da polizia. Sch'i s'annunzian suffizientamain bunas candidatas qualifitgadas, pon vegnir recrutadas circa quatter fin tschintg dunnas sin 30 plazzas d'aspirantas e d'aspirants. Sin fundament dal svilup da l'effectiv èsi da partir dal fatg che davent da l'onn 2002 vegnan puspè organisadas regularmain scolas da polizia. Sch'i pon vegnir recrutadas là vinavant tranter diesch e 20 pertschient dunnas, alura vegn la quota da dunnas a s'augmentar correspundentamain.
4. La quota da dunnas po vegnir augmentada en emprima lingia cun recrutar dunnas per las scolas da polizia. Plinavant ha il commando da polizia promovì ils onns passads il return en la professiun d'anteriuras policistas, e quai concedend pensums parzials. Medemamain promova il commando da polizia ils menus da temp da lavur e pensums parzials per policistas activas.
5. Il fatg che las dunnas restan main ditg tar la polizia chantunala ch'ils umens, ha impussibilità fin uss da surdar ad ellas incumbensas da direcziun per propi. Oz è be ina collavuratura dapli che nov onns en servetsch. Pli baud adempliva ella ina incumbensa da direcziun, ha dentant desistì da quella en connex cun ina reducziun dal temp da lavur ch'ella aveva giavischà. La regenza è dentant da l'opiniun che a media vista san e pon surpigliar er dunnas incumbensas directivas tar la polizia chantunala, sch'ellas èn qualifitgadas per quella funcziun ed han prestà servetsch durant in temp commensurà. En scadin cas obtegnan las policistas las medemas schanzas per quest intent. Dunnas qualifitgadas vegnan er encuraschadas da candidar per ils posts da cader. Malavita n'èn entradas fin oz naginas candidaturas da dunnas per quels posts.

Cuira, ils 2 d'october 2000