Interpellaziun concernent l'extremissem da dretga
Sessiun: 02.10.2000
Ils acts da violenza da l'ultim temp a l'exteriur envers esters e differents eveniments en Svizra han resveglià er tar nus danovamain la discussiun concernent l'extremissem da dretga. Tant sin plaun federal sco er en differents chantuns tschertg'ins soluziuns per cumbatter l'extremissem da dretga. Il cussegl federal è pront d'ademplir sia incumbensa en collavuraziun cun ils chantuns e las vischnancas e da far cumplainamain diever da sia libertad d'agir.
Tenor la polizia federala s'augmenta il dumber da skinheads dapi l'onn 1995 cuntinuadamain en Svizra. Malgrà ina zona grischa ch'ins na dastga betg survalitar, sa movan oz passa 700 persunas en quest milieu. En noss chantun vischin Son Gagl èsi vegnì a fermas sadadas tranter skinheads ed Africans. Er a Cuira conusch'ins singulas cumparsas da skinheads a las festas da citad da Cuira, ma er la citad da Maiavilla e la vischnanca da Landquart èn stadas pertutgadas da talas activitads.
Sa basond sin ils eveniments e svilups da l'ultim temp e sin l'enconuschientscha che l'extremissem da dretga è sin s'augmentar, tschentan ils interpellants las suandantas dumondas a la regenza:
1. Co taxescha la regenza l'extremissem da dretga en noss chantun?
2. Tge pussaivladads e meds legals ha la polizia en connex cun la violenza, la proclamaziun publica da vers radicals da dretga e cun persunas che portan emblems faschists?
3. Datti largias en la lescha chantunala e sche gea, co intenziunescha la regenza da serrar quellas?4. Tge mesiras preventivas intenziunescha il cusseglier guvernativ cumpetent da prender per las scolas ed ils giuvenils en il chantun Grischun?
5. Datti dal puntg da vista da la regenza la pussaivladad d'engaschar ina persuna qualifitgada dal chantun che pudess cussegliar las scolas, ils geniturs ed ils pertutgads?
6. Pudess la regenza s'imaginar ina collavuraziun tranter ils chantuns e sche gea, en tge furma?
Cuira, ils 2 d'october 2000
Namen: Bucher, Frigg, Locher, Jäger, Looser, Meyer, Noi, Pfenninger, Pfiffner, Schmutz, Schütz, Trepp, Zindel
Session: 02.10.2000
Vorstoss: rg Interpellation
Resposta da la regenza
1. L'extremissem da dretga è in problem ch'ins na po betg bagatellisar e ch'ins sto prender serius. En il chantun Grischun na datti dentant betg ina scena extrema da dretga per propi. Ma i pudess constar ch'i dat er en il Grischun persunas che demussan simpatia per la scena extrema da dretga, senza ch'ellas sa dattan d'enconuscher. Las autoritads da polizia chantunalas, ensemen cun las federalas, ston perquai tegnair en egl la scena.
2. Ils fatgs penals menziunads en l'artitgel 261bis CP pretendan ina relaziun directa tar la publicitad. Occurrenzas privatas da la scena extrema da dretga ed uniuns cun talas finamiras n'èn betg scumandadas. Era purtar simbols ed emblems u far gests e proclamar vers da la scena extrema da dretga nun è chastiabel uschè ditg che quai na capita betg envers terzas persunas.
Fin ussa nun hai dà en il chantun Grischun acts chastiabels tras persunas da la scena extrema da dretga ch'ins avess stuì persequitar tenor l'artitgel 261bis CP, cun excepziun d'ina inquisiziun currenta d'ina singula persuna, davart la quala igl è gia vegnì rapportà en las medias.
3. Scuvrir structuras organisadas en il sectur da l'extremissem è difficil uschè ditg ch'i na capitan nagins acts chastiabels. Mesiras preventivas pon ins prender mo a basa da la lescha federala davart mesiras per mantegnair la segirezza interna (LMSI). I fiss dentant inopportun da crear disposiziuns chantunalas davart la protecziun preventiva dal stadi, perquai ch'i sa tracta d'in problem interchantunal ed en quel cas è responsabla la confederaziun. Quella ha er gia instradà ils emprims pass en chaussa. Ultra da quai pon ins examinar en il rom da las lavurs a la lescha da polizia, sch'i dat in basegn per ina legislaziun chantunala.
4. Il departament cumpetent è s'occupà da quest sectur durant ils onns 1998 e 1999 ed ha preschentà soluziuns pussaivlas en il palpiri da lavur „Anregungen zum Umgang mit Verhaltensauffälligkeiten in Schule und Kindergarten“ da l'october 1999. Ils inspecturats da scola han tramess a la magistraglia las propostas ch'han en il senn da la prevenziun la finamira da gidar a percepir ad uras singularitads dal cumportament en scolas. Las autoritads da scola localas e regiunalas èn vegnidas infurmadas davart quest palpiri da lavur.
5. La pussaivladad d'engaschar ina singula persuna qualifitgada per il sectur da la prevenziun, para a la regenza pauc avantagiusa. Dapli success pudess probablamain avair la via sur las persunas da cussegliaziun dal DECA che lavuran en las regiuns, surtut sur la surveglianza da scolas e scolinas, ils cussegliaders da scola e d'educaziun dal servetsch psicologic da scola dal Grischun e sur la furmaziun supplementara da la magistraglia. En l'ultim sectur han ins stabilì ils davos onns stretgs contacts cun il Pestalozzianum a Turitg ed ha pudì gudagnar differentas expertas e differents experts per la collavuraziun. Da preschent vegn lavurà vi da questa tematica en vista ad occurrenzas da furmaziun supplementara.
6. En il sectur da la polizia è la collavuraziun interchantunala instituziunalisada tras la polizia federala. En il sectur da la scola stessan, sche necessari, a disposiziun las instituziuns da las conferenzas dals directurs da l'educaziun publica (CDEP da l'ost e CDEP). Er en connex cun la surveglianza da scola ed ils servetschs psicologics da scola vegn collavurà tranter ils chantuns. Ils curs svizzers da furmaziun supplementara per la magistraglia porschan in'ulteriura pussaivladad per coordinar e furmar opiniuns tranter ils chantuns da la Svizra.
Cuira, ils 2 d'october 2000