Navigaziun principala

Cuntegn da la pagina

Interpellaziun concernent l'interpellaziun concernent la responsabladad dal chantun per obligaziuns communalas

sessiun: 03.10.2000
Sin l'interpellaziun Suenderhauf (cump. protocol dal cussegl grond mars 1999, p. 453 e matg 1999, 178 s.), sch'il chantun haja da surpigliar, sin fundament da sias cumpetenzas da surveglianza, ina responsabladad per il depurtament finanzial da las vischnancas e pia de facto er ina responsabladad subsidiara per obligaziuns da las vischnancas, ha la regenza confermà almain indirectamain l'opiniun ch'ina responsabladad subsidiara da vart dal chantun per obligaziuns da las vischnancas existia e che quella possia vegnir deducida da l'obligaziun da surveglianza dal chantun.
Questa opiniun n'è betg vegnida contestada en la debatta parlamentara. Examinond pli exactamain questa problematica èsi dentant da far la dumonda, sche questa constataziun è stada correcta e quala che duai esser la basa legala per la responsabladad subsidiara dal chantun.
Per il chantun èsi da gronda muntada finanziala, sch'igl exista ina responsabladad subsidiara. Perquai èsi da precisar la posiziun prendida en l'interpellaziun Suenderhauf, sch'ella na vegniss betg a constatar en questa clerezza.
Igl exista numnadamain la pussaivladad che crediturs presumian, sin fundament da questa resposta da la regenza, ina responsabladad statala illimitada e fetschian star bun giuridicamain il chantun, pervia da la protecziun da la confidenza, en il cas d'insolvenza d'ina vischnanca, e quai er sch'i n'existiss nagina basa legala per surpigliar daivets da vischnancas.
Per eliminar questas intschertezzas dumondan las interpellantas ed ils interpellants la regenza da respunder las suandantas dumondas.
1. Exista tenor l'opiniun da la regenza ina responsabladad subsidiara dal chantun Grischun per obligaziuns da vischnancas insolventas e sche gea, a basa da tge normas ed en tge dimensiun?
2. Exista tenor l'opiniun da la regenza in basegn d'agir legislativ per quest sectur?

Cuira, ils 3 d'october 2000

Namen: Schmid (Spleia), Juon, Suenderhauf, Augustin, Bachmann, Bär, Barandun, Battaglia, Beck, Biancotti, Brunold, Bühler, Capaul, Casanova (Cuira), Cathomas, Catrina, Caviezel, Demarmels, Donatsch, Federspiel, Feltscher, Geisseler, Giacometti, Giuliani, Hardegger, Hartmann, Hess, Hübscher, Keller, Kessler, Lardi, Lemm, Loepfe, Marti, Meyer, Möhr, Montalta, Nick, Patt, Peretti, Portner, Ratti, Rizzi, Robustelli, Roffler, Scharplatz, Schmid (Sedrun), Stiffler, Suter, Telli, Thöny, Tramér, Tscholl, Walther, Wettstein, Zarro, Zegg, Zinsli, Martschitsch, Kollegger

Session: 03.10.2000
Vorstoss: rg Interpellation

Resposta da la regenza

En la resposta a l'interpellaziun Suenderhauf (cump. protocol dal cussegl grond mars 1999, p. 453 e matg 1999, p. 178 s.) ha la regenza demussà, ch'ella dispona, en il rom dal dretg da surveglianza e da la legislaziun davart la gulivaziun da finanzas, d'instruments efficazis per evitar ina surdebitaziun extrema da vischnancas. Sin fundament da las cumpetenzas da surveglianza ha il chantun er ina responsabladad per il depurtament finanzial da las vischnancas. Da quest fatg deducescha la regenza er de facto ina responsabladad subsidiara dal chantun per obligaziuns communalas.
Ina garanzia chantunala fixada en la lescha en favur da las vischnancas n'exista dentant betg. A basa d'ina retschertga da l'institut per economia e dretg da finanzas da l'universitad da Son Gagl che datescha da l'onn 1997 na datti ina tala garanzia chantunala en nagin chantun. Perencunter inditgeschan differents ulteriurs chantuns ch'els disponan facticamain d'ina garanzia correspundenta, perquai ch'els possedan ina buna surveglianza da finanzas e mecanissems da gulivaziun efficazis.
Per la regenza èsi impurtant da constatar, ch'ella sa senta en il rom da la surveglianza da finanzas - er responsabla per il fatg, che las vischnancas adempleschian lur incumbensas ed observian lur obligaziuns. Perquai sto il creditur savair ch'ins po, grazia a l'instrumentari dal dretg da surveglianza e da gulivaziun da finanzas, evitar per gronda part in cas d'insolvenza. Senza buns instruments da surveglianza e senza ina gulivaziun da finanzas efficazia avessan intginas vischnancas flaivlas da finanzas savens gì bregia d'observar lur obligaziuns envers ils crediturs. Fin uss n'ha dentant anc nagin creditur subì donn pervia d'ina vischnanca grischuna.
Da las totalmain 212 vischnancas grischunas han passa trais quarts ina situaziun da finanzas nunproblematica. Differentas vischnancas che sa chattan en stretgas finanzialas, disponan anc d'ina libertad d'agir considerabla per pudair far diever da l'agid a sasez. Cun augments da taglia adequats e cun ulteriuras mesiras per augmentar las entradas e limitar las expensas pon questas vischnancas dar impuls per ulteriurs meds da la gulivaziun da finanzas. Quai permetta ad ellas d'observar lur obligaziuns envers ils crediturs. Per vischnancas che na reusseschan betg da tegnair en equiliber lur finanzas malgrà ch'ellas tiran a niz maximalmain l'agid a sasez ed ils meds ordinaris da la gulivaziun da finanzas (gulivaziun da finanzas indirecta, gulivaziun da la forza fiscala), prevesa la lescha davart la gulivaziun da finanzas intercommunala l'instrument da la gulivaziun dal basegn spezial. Sut quest titel obtegnan oz totalmain 14 vischnancas contribuziuns supplementaras per restabilir l'equiliber da finanzas e per observar lur obligaziuns legalas e contractualas.
Uschia garantescha il sistem da gulivaziun da finanzas a tut las vischnancas quella affluenza da meds ch'ellas dovrassan per ademplir lur incumbensas necessarias. La surveglianza procura ch'en questas vischnancas vegnian ademplidas be incumbensas ch'èn d'interess public e ch'ils meds vegnian impundids a moda spargnusa ed economica per quest intent.
La responsabladad dal chantun arriva là a ses cunfins, nua che la vischnanca fa expensas nunnecessarias senza l'obligaziun d'avair quità e cuntrariamain a las recumandaziuns dal chantun u nua ch'ella surpiglia engaschaments ristgads.
Sa basond sin questas explicaziuns respunda la regenza las dumondas sco suonda:
1. Ina garanzia chantunala fixada en la lescha en favur da la vischnanca n'exista betg. Grazia als instruments da surveglianza e da gulivaziun po dentant vegnir garantida per gronda part la solvenza da las vischnancas.
2. Sin quest sectur n'exista nagin basegn d'agir legislativ. Perencunter vegni a daventar necessari d'observar, sur la finanziaziun dals credits e dal martgà da chapital, il provediment cun daners da las vischnancas e da prender mesiras en cas da basegn.


Cuira, ils 3 d'october 2000