Navigaziun principala

Cuntegn da la pagina

Dumonda en scrit concernent ina soluziun per ils problems da traffic a Küblis

sessiun: 04.10.2000
Enconuschentamain è la via dal Partenz la via principala la pli frequentada en noss chantun. Da preschent vegn realisà il sviament da Claustra. Suenter è planisà il sviament da Saas. La realisaziun da quests dus projects gronds vegn a durar ses temp.
Quai signifitgescha che Küblis sto supportar l'entir traffic d'autos ils proxims onns.
Gia avant onns han ins installà a l'entrada dal vitg in signal da glisch per ils peduns. Oz maina il signal da glisch surtut las fins d'emna a stagnaziuns dal traffic sin la via principala. Ultra da quai ston ils automobilists, che vulan vegnir dal center dal vitg en via principala, savens spetgar ditg.
Il segund lieu critic sa chatta tar la bifurcaziun da la via da colliaziun en direcziun Luzein Pany St. Antönien. Gist suenter la bifurcaziun suonda il passadi da viafier (cun barrieras). Il spazi da stagnaziun fin a la via principala tanscha per ca. 4 autos. Dapi l'avertura dal tunnel dal Vereina van bler dapli trens tras la val e bloccheschan pia pli savens il passadi da viafier. I capita mintga di diversas giadas ch'ils autos s'accumuleschan fin en via principala.
Il sutsegnà ha las suandantas dumondas:
1. Tge quinta la regenza da far per schliar a curta vista ils problems dals dus centers da traffic a Küblis?
2. Pon ins far quint cun meds federals per las mesiras da construcziun urgentas suenter la reclassificaziun da la via dal Partenz?

Cuira, ils 4 d'october 2000

Namen : Rizzi

Session: 04.10.2000
Vorstoss: rg SchriftlicheAnfrage


Resposta da la regenza

A la regenza è enconuschenta la situaziun dal traffic sin la via dal Partenz entaifer il vitg da Küblis. Tar in augment dal traffic èsi en general uschia che gia pitschens disturbis entras vehichels parcads u vehichels che vegnan en via principala, peduns che traversan la via e.u.v. chaschunan stagnaziuns dal traffic. A Küblis è quai spezialmain il cas cura ch'il sulet signal da glischs è cotschen per proteger il peduns resp. cura che la barriera da la Viafier retica è serrada e ch'i resulta ina cumulaziun dal traffic en la via dal Partenz. Quests disturbis mainan a colonnas e stagnaziuns sco en las citads pli grondas mintga di durant pliras uras. La moda la pli efficazia per meglierar la situaziun è da reducir il traffic da transit ester. A Küblis è quai be pussaivel cun il spustament da la via dal Partenz, damai cun realisar la via da sviament. Sin fundament da las relaziuns da plazza n'èn mesiras efficazias punctualas praticamain betg realisablas e fissan colliadas, ultra cun grondas expensas finanzialas, cun dischavantatgs gravants per il maletg dal vitg. Era la reclassificaziun da la via dal Partenz en ina via naziunala e cun quai la disponibladad eventuala da meds federals per mesiras da construcziun, na mida deplorablamain nagut vi da quest fatg.
L'execuziun da la reclassificaziun stat en la cumpetenza dal cussegl federal. Il termin n'è anc betg enconuschent. Deplorablamain na po la regenza perquai betg s'exprimer pli exactamain davart il termin da realisaziun dal sviament ed uschia davart la soluziun per ils problems da traffic entaifer il vitg da Küblis.


Cuira, ils 4 d'october 2000