Navigation

Inhaltsbereich

Postulat concernent l'examinaziun da las furmas da participaziun e represchentaziun dals interess dal chantun en instituziuns, societads ed interpresas

Sessiun: 04.10.2000
Ultra da las incumbensas centralas dal maun public che vegnan ademplidas en il rom da la legislaziun e da la repartiziun da las incumbensas tranter confederaziun, chantuns e vischnancas tras l'administraziun chantunala (departaments), datti en il Grischun sin fundament da nossas structuras spezialas ch'èn sa sviluppadas durant decennis in grond dumber d'instituziuns, fundaziuns, societads e firmas publicas, mez publicas e privatas ch'adempleschan per part cun subvenziuns considerablas fitg differentas incumbensas publicas (ospitals, implants electrics, Viafier retica, VFA, assicuranza d'edifizis, Tele Rätia e.u.v.). La represchentaziun dals interess dal chantun concernent las activitads da questas instituziuns u societads para dad esser oz relativamain casuala. Ella è er reglada a moda fitg differenta. A discussiuns pli intensivas ha manà dacurt spezialmain la participaziun directa dals commembers da l'executiva chantunala en cussegls d'administraziun, cussegls da fundaziun e sumegliantas instituziuns, societads u interpresas.
Igl è inditgà d'examinar da princip las relaziuns tranter il chantun d'ina vart e las diversas instituziuns cun incumbensas ch'èn predominantamain d'interess public. En il senn da relaziuns cleras, da dapli transparenza e d'in detretschament uschè vast sco pussaivel da las activitads e dals interess na duess quai esser permess a represchentantas u represchentants dal chantun dad esser participà directamain en ils organs strategics da diversas instituziuns. Là, nua ch'il chantun (e las vischnancas) subvenziuneschan prestaziuns d'auters, duessan quellas perencunter vegnir fixadas consequentamain cun mandats e cunvegnas da prestaziun.
La regenza vegn envidada d'analisar en in rapport la situaziun actuala da sias represchentaziuns dals interess sco er da preschentar ina strategia pussaivla per far midadas cun variantas da realisaziun en il senn da nossas explicaziuns.

Cuira, ils 4 d'october 2000

Namen: Jäger, Biancotti, Marti, Arquint, Augustin, Berther (Sedrun), Bucher, Büsser, Casanova (Cuira), Cathomas, Cavigelli, Christ, Claus, Dermont, Donatsch, Farrér, Frigg, Joos, Locher, Looser, Luzio, Meyer, Noi, Pfiffner, Sax, Scharplatz, Schmid (Val s. Pieder), Schmutz, Schütz, Suenderhauf, Trepp, Tscholl, Walther, Wettstein, Zanolari, Zegg, Zindel, Zinsli

Session: 04.10.2000
Vorstoss: rg Postulat

Resposta da la regenza

Ils postulants pretendan da la regenza in rapport ch'analisescha la situaziun actuala da la represchentaziun dals interess dal chantun en las differentas instituziuns ordaifer l'administraziun chantunala e che preschenta ina eventuala strategia per ina midada. Tenor ils postulants duain ils represchentants e las represchentantas chantunals en il futur desister da sa participar directamain da en ils gremis directivs da talas interpresas u organisaziuns. En connex cun instituziuns che retschaivan contribuziuns chantunalas duai la represchentaziun dals interess succeder cun incumbensas u cunvegnas da prestaziun. Ils postulants preschentan in tema, cun il qual il cussegl grond è s'occupà pir dacurt en occasiun da la deliberaziun dal postulat Trepp concernent evitar conflicts d'interess (guarda PCG 5/1997/98, p. 564 e PCG 1/1998/99, p. 185ss.). En la resposta a quella intervenziun durant la sessiun da matg 1998 ha la regenza preschentà sia strategia en questa dumonda ed ha fixà sco princip ch'ils commembers da la regenza vegnan er en il futur a far part da gremis directivs, sche quai correspunda ad in interess public considerabel dal chantun. Il cussegl grond ha silsuenter refusà il postulat Trepp che ha dal rest er pretendì in rapport cun 66 cunter 11 vuschs (guarda PCG 1/1998/99, p. 185 ss.). Las relaziuns effectivas e la tenuta da la regenza n'èn betg sa midadas dapi quella giada. La regenza na considerescha perquai anc adina betg sco necessari da far in rapport davart quest tema. Quai vala tant dapli che la regenza ha fixà en scrit las strategias ed ils mecanissems da controlla en vista a la delegaziun da represchentants en talas organisaziuns (guarda CR prot. nr. 778/2000 dals 2 da matg 2000). Quai è succedì sin in giavisch respectiv da la cumissiun da controlla da gestiun dal cussegl grond e per secturs impurtants (scolas autas professiunalas, energia, Tele-Rätia SA, turissem, sanadad). Abstrahà da quai na faschess in rapport nagin senn da preschent, perquai che la participaziun da represchentants da la regenza en organs d'interpresas u organisaziuns duai vegnir reglada expressivamain en il rom da la revisiun totala da la constituziun chantunala. Il sboz da consultaziun, elavurà da la cumissiun da constituziun, prevesa ina disposiziun (restrictiva) correspundenta. Igl è perquai pli adequat da discutar questa dumonda intensivamain durant la deliberaziun da la revisiun totala da la constituziun chantunala e sin fundament da la proposta concreta da reglamentaziun da quel temp. In rapport separat percunter n'è betg necessari.
Per quests motivs propona la regenza al cussegl grond da refusar il postulat.

Cuira, ils 4 d'october 2000