Navigation

Inhaltsbereich

Sessiun: 04.10.2000
Per l'elavuraziun da las dumondas en connex cun la concessiun da plazzas da lavur da stagiun incassescha il chantun taxas per il martgà da lavur e taxas da la polizia d'esters. Questas muntan fin ussa a fr. 80.- per patrun per mintga concessiun nova resp. readmessa, e fr. 100.70 per lavurant resp. fr. 84.70 per readmissiun. Per dus manaschis da stagiun signifitgescha quai adina la taxa dubla. Las taxas per in manaschi cun 10 stagiunaris sa summeschan la finala a fr. 3454.- l'onn.
L'acceptaziun da las cunvegnas bilateralas e l'entrada en vigur da l'ordinaziun davart l'introducziun successiva da la libra circulaziun da persunas tranter la Svizra e la Communitad europeica e ses stadis commembers (EVO) chaschuna midadas tar las concessiuns ed uschia era tar las taxas per las concessiuns.
En l'art. 31 da la EVO reglescha la confederaziun er las taxas. Ella parta da quai anor che las taxas per il martgà da lavur crodan per motivs d'ina discriminaziun indirecta dals commembers da la CE en connex cun la prioritad limitada a dus onns da las persunas domiciliadas en Svizra.
Las taxas da la polizia d'esters per l'elavuraziun d'ina dumonda da permissiun da dimora astgan importar max. fr. 35.-.
En sia consultaziun sa referescha il chantun Grischun a questa circumstanza. El pretenda surtut da „crear ina basa legala per pudair cuvrir las expensas correspundentas dals chantuns durant il temp transitori da 2 onns, durant il qual ha da succeder in'examinaziun dal martgà da lavur“.
Questa pretaisa maina a las suandantas dumondas:
1. È la regenza pronta da realisar a maun da quest exempel sia intenziun sincerada repetidamain da crear bunas cundiziuns da basa per l'economia grischuna?
2. Vesa la regenza la pussaivladad d'organisar durant ils 2 onns transitoris las lavurs per las concessiuns dal chantun uschia, ch'ins po renunziar - en favur da l'economia grischuna - cumplainamain a las taxas per il martgà da lavur?

Cuira, ils 4 d'october 2000

Namen : Marti, Walther, Jeker, Bachmann, Bär, Barandun, Berther (Mustér), Bischoff, Büsser, Butzerin, Capaul, Casanova, Catrina, Cavegn, Christ, Claus, Crapp, Dermont, Donatsch, Feltscher, Giacometti, Göpfert, Hanimann, Hartmann, Hess, Jeker, Keller, Kessler, Lardi, Lemm, Luzio, Märchy, Nick, Parolini, Parpan, Pleisch, Ratti, Rizzi, Robustelli, Roffler, Schmid (Sedrun), Schmid (Spleia), Stiffler, Suenderhauf, Suter, Tramér, Vetsch, Walther, Wettstein, Zanolari, Zarro, Zegg, Zinsli, Bezzola

Session: 04.10.2000
Vorstoss: rg Interpellation

Resposta da la regenza

En il rom da la resposta al postulat Barblan il matg 1995 aveva la regenza gì l'occasiun da motivar la necessitad per incassar questa taxa. Las explicaziuns valan er per questa interpellaziun.
1. La regenza è conscienta da l'impurtanza da las forzas da lavur estras, surtut dals stagiunaris, per l'economia grischuna. Ella è sa stentada fermamain per metter a disposiziun en quest sectur bunas cundiziuns da basa. Uschia ha la regenza cuntanschì che la durada da dimora da las persunas cun dimora curta è vegnida prolungada da 3 sin 4 mais. Quai è in levgiament che ha anc oz in effect positiv per noss manaschis da stagiun. L'onn 1995 èsi reussì a la regenza en in act da sforz d'impedir l'aboliziun dal statut dals stagiunaris e l'introducziun d'ina reglamentaziun da dimora curta che n'è betg pratitgabla per las regiuns da turissem. Er en connex cun la repartiziun dals contingents e las attribuziuns dal contingent da reserva da l'uffizi federal dals esters è il chantun Grischun adina s'engaschà senza cumpromiss e cun success per ils interess da l'economia grischuna. La procedura da permissiun per forzas da lavur estras en il chantun Grischun è per quai che reguarda la spertadad d'elavuraziun nuncuntanschida en Svizra; quai è dal reminent vegnì onurà da l'uniun grischuna d'artisanadi e mastergn cun il premi da deregulaziun per manaders da partiziun. Sco quai ch'ils exempels mussan, na manchi betg vi da la voluntad da la regenza grischuna da metter a disposiziun bunas cundiziuns da basa per l'economia.
2. La taxa per ina permissiun da stagiunaris u da dimora curta tenor la reglamentaziun actuala sa cumpona sco suonda:
Taxa per il martgà da lavur fr. 30.-
Taxa per la polizia d'esters:
Taxa per garantir la permissiun da dimora fr. 40.-
Taxa da la confederaziun (taxa register central dals esters) fr. 10.-
Taxa per la permissiun da dimora tenor la durada da dimora, max. fr. 66.-
Legitimaziun d'esters fr. 16.-
Taxa per l'annunzia e per l'avis da partenza mintgamai fr. 30.-
Cun reducir la taxa per la polizia d'esters sin fr. 35.-, previsa en il rom da l'introducziun da la cunvegna davart la libra circulaziun, e cun abolir la taxa per il martgà da lavur perda il chantun, tut tenor la durada da dimora concedida, en media ca. fr. 130.- per permissiun. Igl è da quintar mintg'onn cun entradas pli pitschnas en la dimensiun da 3 milliuns francs.
Segund l'art. 5 da la lescha davart las finanzas dal chantun Grischun (DG 710.100) han giudiders e chaschunaders da prestaziuns spezialas per regla da surpigliar sezs ils custs imputabels. Cun las sperditas d'entradas surmenziunadas n'è betg pli garantì il princip da la cuvrida dals custs en il sectur da las permissiuns per forzas da lavur estras. Resguardond la situaziun actuala da las finanzas dal chantun Grischun è la regenza perquai sa decidida da proponer a la confederaziun en il rom da la procedura da consultaziun tar l'ordinaziun davart l'introducziun successiva da la libra circulaziun da persunas (EVO) da mantegnair la taxa per l'examinaziun dal martgà da lavur durant il temp transitori da 2 onns. Cun mantegnair la taxa per il martgà da lavur sa reduciss la sperdita d'entradas da 3 milliuns francs a 2 milliuns francs, uschia ch'ils patruns grischuns vegnissan tuttina distgargiads per 2 milliuns francs. En vista a la reducziun decisiva da la taxa per la polizia d'esters e considerond il fatg che l'examinaziun dal martgà da lavur ed uschia er la taxa crodan davent 2 onns suenter l'entrada en vigur da las cunvegnas bilateralas, è la regenza da l'opiniun ch'i saja giustifitgà d'incassar la taxa da permissiun per il martgà da lavur. Quai tant pli ch'era cun la taxa per il martgà da lavur nun è pli garantì en l'avegnir il princip da la cuvrida dals custs.


Cuira, 4 d'october 2000