Navigaziun principala

Cuntegn da la pagina

Interpellaziun concernent refurmas da scola en il Grischun

sessiun: 04.10.2000
Las scolas sa chattan en in stadi da midada. La furmaziun sin ils secturs da la scola primara e dal stgalim superiur sco er da la scola media sto s'adattar a las novas cundiziuns ch'èn resultadas en il context naziunal ed internaziunal. Igl è in fatg che refurmas da scola èn ina tematica cumplexa. Correspundentamain regna ina gronda malsegirezza, betg mo en scola, mabain er ordaifer quella. En il Grischun stattan avant porta gronds projects da refurma. Per che quests chattian l'acceptanza dals uffants, geniturs e da la magistraglia e per che la realisaziun dals projects possia succeder cun il succurs da la politica, ston vegnir preschentadas e communitgadas avertamain tut las refurmas planisadas en in concept general.
Perquai vegn la regenza supplitgada da respunder las sequentas dumondas:
1. Tge refurmas da scola èn necessarias e previsas en il Grischun?
2. Co vegnan las refurmas realisadas ed en tge temp duain ellas vegnir realisadas en las scolas?
3. Co vegn la scolaziun correspundenta da las magistras e dals magisters concepida e realisada?

Cuira, ils 4 d'october 2000

Namen: Claus, Suter, Joos, Bär, Barandun, Biancotti, Bühler, Capaul, Casanova (Vignogn), Cathomas, Hartmann, Hess, Juon, Kessler, Luzio, Nick, Parolini, Portner, Rizzi, Roffler, Schmid (Sedrun), Stiffler, Tramér, Walther, Zinsli, Martschitsch

Session: 04.10.2000
Vorstoss: rg Interpellation

Resposta da la regenza

En la debatta d'entrada concernent la revisiun parziala da l'ordinaziun executiva tar la lescha da scola durant la sessiun d'october 2000 è la regenza sa declerada pronta da furnir als deputads dal cussegl grond fin la fin 2001 ina documentaziun davart las refurmas actualas e planisadas sin il sectur da las scolas popularas. Questa infurmaziun duai cumpigliar in concept da basa en il senn d'ina planisaziun progressiva e vul dar als deputads ina survista da las scolas dal Grischun. La broschura duai ultra da quai cuntegnair infurmaziuns davart las tendenzas da svilup naziunalas. Ella cumplettescha pia il rapport annual dal chantun e la preschentaziun da las finamiras annualas en il program annual da la regenza.
Ils sutsegnads accentueschan cun lur interpellaziun lur basegn da vegnir infurmads a moda concentrada davart refurmas e tendenzas da svilup sin il sectur da la furma-
ziun ed oravant tut sin il champ da las scolas publicas. La regenza è da l'avis ch'i saja gist da deliberar en la broschura d'infurmaziun da la fin da l'onn 2001 las dumondas fatgas en l'interpellaziun cun l'approfundaziun commensurada e da correspunder uschia al basegn d'infurmaziun pertutgant ils svilups sin il sectur da la furmaziun (guarda latiers er la resposta da la regenza al postulat Arquint concernent il rapport intermediar davart il Grischun sco regiun da furmaziun).
Tenor quai ch'è vegnì ditg pon ins respunder las dumondas da l'interpellaziun en in'emprima externaziun sco suonda:
Dumondas 1 e 2, projects da refurma necessaris u che vegnan planisads u realisads èn p. ex.:
a) Instrucziun d'ina segunda lingua en scola primara: L'introducziun succeda en il Grischun tudestg a moda graduada dapi l'onn da scola 1999/2000 (guarda program da la regenza 2001-2004, finamira 11; rapport annual 1999, p. 114/116);
b) Concept da linguas dal stgalim superiur: A las persunas d'instrucziun dal stgalim superiur vegni pussibilità da dar l'instrucziun necessaria da linguas estras al stgalim superiur a moda graduada a partir da l'onn da scola 2002/03, e quai grazia ad in concept chantunal da furmaziun supplementara (guarda program da la regenza 2001-2004, finamira 11; program annual 2000, finamira 18);
c) Refurma dal stgalim superiur: Las vischnancas pon eleger tranter differents models per manar ils tips da scola dal stgalim superiur (guarda lescha da scola);
d) Promover e giuditgar a moda cumplessiva las scolaras ed ils scolars: Furmas da giudicat che cumpiglian ultra da la spira cumpetenza dals roms er il depurtament d'emprender e la cumpetenza sociala servan a promover sistematicamain las scolaras ed ils scolars (guarda lescha da scola; rapport annual 1999, p. 116);
e) Promover uffants cun talents spezials: Uffants pertutgads vegnan promovids sistematicamain en il rom da la legislaziun da scola (guarda program da la regenza 2001-2004, finamira 12).
Quests projects vegnan elavurads u realisads a moda graduada. Els èn concepids uschia ch'ina terminaziun vegn a succeder durant ils proxims 3 fin 10 onns.
Dumonda 3: A las persunas d'instrucziun stattan a disposiziun purschidas specificas da furmaziun supplementara. La furmaziun da las magistras e dals magisters a la futura scol'auta professiunala da pedagogia (SAP) vegn concepida tras ina gruppa da project manada dal directur dal seminari. Novaziuns sin il plaun chantunal ed interchantunal vegnan resguardadas en la planisaziun ed elavuraziun progressiva. La SAP vegn ad entschaiver l'onn 2003 (guarda program da la regenza 2001-2004, finamira 17).

Cuira, ils 4 d'october 2000