Navigaziun principala

Cuntegn da la pagina

Interpellaziun concernent la reducziun individuala da las premias

sessiun: 05.10.2000
La finamira da la reducziun individuala da las premias è da sustegnair persunas en situaziuns economicas modestas. Apparentamain sa differenzieschan las opiniuns davart la dumonda, tge persunas che tutgan insumma tar quest circul. Ultra da quai datti en il cussegl grond differentas opiniuns concernent l'exauriziun totala da las contribuziuns federalas. Per ch'il cussegl grond possia sa far in maletg objectiv dals avantatgs e dischavantatgs, pretendan ils interpellants da la regenza ina preschentaziun detagliada da questa tematica.
Quella duai mussar tge effects ch'ina exauriziun totala ha per ils singuls assicurads, per l'economia publica en il chantun e per las finanzas chantunalas e communalas.
Nus spetgain oravant tut ina resposta a las suandantas dumondas:
1. Co sa midan la resalva persunala e la limita d'entradas en cas d'ina exauriziun totala en relaziun cun in'exauriziun da 55%?
2. Tge impuls fissan da spetgar per l'economia publica grischuna en cas d'ina exauriziun totala?
3. Èsi pussaivel da cumpensar la chargia finanziala supplementara cun mesiras giustifitgablas? Sche gea, tge mesiras vegnissan en dumonda?
4. Fissan da spetgar er consequenzas finanzialas per las vischnancas?

Cuira, ils 5 d'october 2000

Namen: Hardegger, Valsecchi, Tscholl, Battaglia, Beck, Butzerin, Christoffel, Dalbert, Giovannini, Göpfert, Heinz, Hübscher, Lemm, Märchy, Möhr, Montalta, Nigg, Parolini, Patt, Ratti, Stiffler, Thöny, Vetsch, Zinsli

Session: 05.10.2000
Vorstoss: rg Interpellation

Resposta da la regenza

Ils interpellants pretendan da la regenza ina preschentaziun detagliada concernent il sectur da la reducziun individuala da las premias. A maun da quella duai il cussegl grond pudair sa far in maletg dals avantatgs e dischavantatgs e decider davart ina eventuala exauriziun totala da las contribuziuns federalas. En il rom da la resposta a l'interpellaziun n'è betg pussaivla ina preschentaziun detagliada en il senn giavischà. La regenza vegn a far questa preschentaziun en il rom da la missiva tar la midada da la lescha davart l'assicuranza da malsauns e la reducziun da las premias (LARP); quella è necessaria sin fundament da la revisiun parziala da la lescha federala davart l'assicuranza da malsauns (LAM).
La regenza respunda las dumondas sco suonda:
1. L'autezza da las resalvas persunalas e da las limitas d'entradas en cas d'ina exauriziun totala da las contribuziuns federalas dependan da las decisiuns ch'èn da prender en la politica sociala. Igl è da metter pais oravant tut sin l'effect da la repartiziun resp. sin las limitas da grevezza cumportablas per las chasadas. La regulaziun na dastga perquai betg succeder cun determinar simplamain in tschert grad d'exauriziun. En spezial èsi da decider, sch'il circul da persunas da fin ussa duai survegnir contribuziuns pli autas u sch'ins duai augmentar il circul dals retschaviders. L'onn current correspundan las limitas d'entradas bunamain exact a las presumziuns en la missiva tar il decret da la LARP. Ina famiglia cun 3 uffants survegn per exempel anc contribuziuns per la reducziun da las premias fin ad entradas imputablas (entradas taxablas e 10% da la facultad suttamessa a la taglia) da 60'000 francs. Questa limita minimala correspunda senza resguardar la facultad ad entradas da paja nettas da radund fr. 80'000.-. En cas d'ina exauriziun totala da las contribuziuns federalas s'augmentassan las limitas d'entradas, e da quai profitassan probablamain il pli fitg oravant tut las chasadas cun entradas nettas da tranter ferm 40'000 francs ed 80'000 francs.
2. Cunquai che la contribuziun chantunala sto vegnir finanziada cun entradas chantunalas, sa resulta la finala sulettamain in effect da redistribuziun entaifer il chantun. Perquai èsi necessari d'examinar las consequenzas che quai ha per l'economia publica, surtut en vista a la capacitad supplementara d'acquist da la populaziun dal chantun tras ils meds federals augmentads da radund 28 milliuns francs l'onn. Partind d'in volumen da consum final da 5,3 milliardas francs da las chasadas privatas en il chantun, importan las contribuziuns federalas be 0,5%. Ina exauriziun dals daners federals da 100% per la reducziun da las premias è damai d'impurtanza plitost modesta per l'economia publica. Tut tenor il cumportament d'expensas dals retschaviders da contribuziuns vegnan generadas ulter-iuras entradas. Quant enavant che s'augmentan qua tras ils gudogns taxabels da las interpresas e las entradas taxablas d'interpresas privatas, pon ins be stimar a moda approximativa. Las entradas da taglia supplementaras pudessan importar tranter 100'000 francs e 300'000 francs. Ord vista regiunal-politica pudess in'exauriziun totala dals daners per la reducziun da las premias esser d'ina tschert'impurtanza.
3. Sch'igl è pussaivel da cumpensar la grevezza finanziala dal budget chantunal che sa resulta tras l'exauriziun totala da la reducziun da las premias cun mesiras giustifitgablas e co che quai è pussaivel, è ina dumonda da l'optica politica e perquai na po quella betg vegnir respundida da la regenza a moda impegnativa. Da preschent è ina gruppa da lavur entaifer l'administraziun vidlonder d'elavurar ina glista cun mesiras pussaivlas ed ils avantatgs e dischavantatgs da quellas.
4. Senza mesiras da correctura accumpagnantas fissan da spetgar distgargias finanzialas per las vischnancas; quai surtut en il sectur dal sustegn public sco er da las premias irrecuperablas da las cassas da malsauns. En cas d'ina exauri-ziun totala da las contribuziuns federalas avess il chantun da purtar ina considerabla grevezza supplementara. Ina tala spustaziun da las grevezzas da las vischnancas sin il chantun na fiss betg supportabla e stuess vegnir curregida il pli tgunsch sur ina revisiun da la gulivaziun da las grevezzas per tschertas prestaziuns socialas. Sch'il chantun avess d'adattar la lescha da taglia, pudessan er las vischnancas far quint cun entradas da taglia pli autas.

Cuira, 5 d'october 2000