Navigaziun principala

Cuntegn da la pagina

Dumonda en scrit concernent la "Via d'Engiadina"

sessiun: 27.11.2000
Dapi l'avertura dal sviament La Punt-Chamues-ch - S-chanf l'onn 1984 hai dà differents grevs accidents da traffic surtut tar l'access resp. la sortida da Zuoz. Suenter la creaziun d'ina zona industriala en il territori da Sur En succedan adina puspè collisiuns sin la cruschada ch'è per part nunsurvesaivla e tar l'access al vitg da Zuoz.
Ultra d'insaquants manaschis industrials sa chattan en quest territori in restaurant, il center da passlung e d'inline, ina plazza da sport, e da preschent vegn construida er ina plazza da golf. Directamain sper la via chantunala han ins creà quatter parcadis pli gronds.
Per motivs da segirezza èsi inditgà ed uras da tschertgar soluziuns adattadas per ina megliuraziun da la situaziun dal traffic. Ins ha da far quint ch'il traffic sin questa via vegnia anc a crescher.
In giratori, sco ch'el è vegnì realisà tar la colliaziun cun il vitg a Silvaplauna, resp. tar l'access a Surlej, pudess megliurar considerablamain la situaziun.
Il sutsegnà dumonda perquai ils responsabels tar il departament da construcziun, traffic e selvicultura sch'els sajan pronts da s'occupar da questa problematica e da tschertgar soluziuns adattadas per augmentar la segirezza dal traffic.

Cuira, ils 27 da november 2000

Namen: Lemm

Session: 27.11.2000
Vorstoss: rg SchriftlicheAnfrage


Resposta da la regenza

L'access en dumonda sa chatta ordaifer il lieu sper in sviament che duess primarmain servir al traffic da transit e na duess perquai betg cuntegnair elements artifizials ch'impedeschan quel sur mesira. L'access Resgia è vegnì construì cun ils elements da projectaziun ch'eran valaivels quella giada e ch'èn er suffizients per las pretensiuns d'oz. Tenor las cifras evaluadas da la statistica dals accidents na sa tracti betg d'in punct nua ch'i dat blers accidents. Per prender en consideraziun la soluziun proponida dal giratori sto ina cruschada ademplir tschertas pretaisas.
Uschia stuess ella colliar vias orientadas al traffic cun geners da via che sa chattan sche pussaivel sin il medem nivel e cun sumegliantas grevezzas. Occasiunalmain determineschan er autras cundiziuns da basa topograficas u geometricas l'elecziun da la furma da l'access.
Resguardond ils aspects ed ils criteris surmenziunads è la regenza da l'avis che las premissas per la restructuraziun da la cruschada existenta en in giratori na sajan betg dadas.
Sco resposta ad ina dumonda cun il medem cuntegn han ins da curt proponì a la vischnanca da Zuoz da redimensiunar la cruschada existenta, perquai ch'ils motivs dals accidents èn ch'ils manischunzs da vehichels sa cumportan a moda sbagliada ed èn surdumandads.
La regenza è pronta da persequitar quest'emprova d'ina soluziun en enclegientscha cun la vischnanca.

Cuira, ils 27 da november 2000