Navigaziun principala

Cuntegn da la pagina

Postulat concernent l'augment da plazzas tar l'uffizi chantunal da veterinari

sessiun: 27.11.2000
Las incumbensas federalas e chantunalas pertutgant la protecziun dals animals èn s'augmentadas fermamain dapi l'onn 1994 ed engrevgieschan oz pli e pli la lavur da l'uffizi chantunal da veterinari. Uschia sto l'uffizi da veterinari controllar las tratgas agriculas d'animals da niz (bio, ÖLN e manaschis convenziunals) er pertutgant la protecziun dals animals. Questa controlla vegn organisada en collavuraziun cun l'uffizi d'agricultura (controlladers ÖLN) e dal servetsch da cussegliaziun agricula (assistent agricul). Medemamain èsi da garantir ina scolaziun e furmaziun supplementara permanenta dals controlladers da la protecziun dals animals. L'evaluaziun da tut ils rapports da controlla che derivan da las controllas da la protecziun dals animals e da las eventualas controllas e mesiras posteriuras èn ulteriuras incumbensas impurtantas che resultan entaifer l'uffizi da veterinari. Er en connex cun las tratgas d'animals selvadis, per las qualas igl è da dumandar ina permissiun, sto l'uffizi da veterinari surpigliar pli e pli responsabladad. Qua sa tracti da la controlla da las planisaziuns e da la controlla regulara da las tratgas permessas d'animals selvadis.
Pli e pli han lieu er scleriments davart cas da protecziun dals animals che ston vegnir organisads sin fundament d'annunzias entradas tras la societad per la protecziun dals animals u tras persunas privatas. Ultra da quai vegnan fatgas controllas davart la protecziun dals animals en cas da controllas da traffic e d'arrivs al martgà. Er ils plans da construcziun d'uigls ston vegnir examinads e giuditgads areguard lur confurmitad cun la legislaziun davart la protecziun dals animals e l'adempliment da las prescripziuns da quella.
Il basegn d'infurmaziun da la publicitad davart la protecziun dals animals (vatgas-mamma e tratga d'animals dumestis) daventa pli e pli impurtant e dumonda dapli lavur. L'uffizi da veterinari è qua in post da contact per infurmaziuns.
Quest entir champ d'incumbensas (protecziun dals animals) ston ins dumagnar oz cun ina plazza da 120%. L'execuziun da l'entir champ d'incumbensas en questa dimensiun na po dentant strusch pli satisfar u na po insumma betg pli vegnir garantì en il futur. Er en il cas ch'i vegn prestada ina lavur efficazia e che singulas activitads vegnan surdadas a terzas persunas, sco che quai succeda gia oz per part, na tanscha la pertschientuala da plazzas permessa strusch betg pli.
Sin fundament da las controllas pli intensivas sin il sectur da la protecziun dals animals e da la lavur administrativa stringentamain pli gronda (correspundenza cun possessurs d'animals, veterinaris, ulteriurs uffizis, elavuraziun electronica da datas cun actualisaziun permanenta), envidain nus la regenza da prender en consideraziun in augment da plazzas tar l'uffizi chantunal da veterinari.

Cuira, ils 27 da november 2000

Namen: Bucher, Pfiffner, Trepp, Arquint, Caviezel (Cuira), Frigg, Jäger, Looser, Meyer, Noi, Pfenninger, Schmutz, Schütz, Zindel

Session: 27.11.2000
Vorstoss: rg Postulat

Resposta da la regenza

1. L'execuziun da la legislaziun davart la protecziun dals animals sa concentrescha en emprima lingia sin la tratga d'animals da niz en l'agricultura. Las controllas per garantir ina tratga d'animals da niz che satisfa a la protecziun dals animals vegnan fatgas en stretga collavuraziun cun l'uffizi d'agricultura, spezialmain cun ils controlladers ÖLN e cun ils collavuraturs dal servetsch da cussegliaziun agricula. Annualmain vegnan controllads uschia en il chantun Grischun var 1'200 manaschis cun tratga d'animals da niz, e quai surtut pertutgant l'adempliment da las directivas davart la protecziun dals animals. Las incumbensas administrativas successivas a las controllas davart la protecziun dals animals, sco p.ex. la fixaziun da las mesiras necessarias, la registraziun e la tgira da las datas sco er las controllas posteriuras, vegnan ademplidas dal tuttafatg da l'uffizi da veterinari.
2. Annunzias da la protecziun dals animals concernent las tratgas d'animals da niz e dumestis vegnan scleridas directamain da l'uffizi da veterinari u per incumbensa da quel dals veterinaris uffizials e da controlla. Ulteriuras incumbensas sin il sectur da la protecziun dals animals èn il giudicament dals plans per construcziuns novas d'uigls, il sustegn dals organs da polizia en connex cun la controlla dals transports d'animals e cun las controllas da la protecziun dals animals tar tratgas permessas d'animals selvadis. Il basegn d'infurmaziun da la publicitad en fatschentas da la protecziun dals animals ademplescha l'uffizi da veterinari a moda ch'i vegnan organisadas occurrenzas d'infurmaziun e da furmaziun supplementara per controlladers ed a moda che l'uffizi da veterinari stat a disposiziun a la publicitad sco persuna da contact per dumondas da la protecziun d'animals.
3. Per exequir la legislaziun davart la protecziun dals animals, epidemias d'animals e davart victualias sco er davart ils medicaments veterinaris stattan a disposiziun a l'uffizi chantunal da veterinari actualmain tut en tut 470 pertschient da plazzas. L'execuziun da la protecziun d'animals dovra oz ca. 50 pertschient da la plazza d'in collavuratur veterinari e ca. 50 pertschient da la plazza d'ina referendaria per la protecziun d'animals.
Las incumbensas che pertutgan il champ da lavur da l'uffizi chantunal da veterinari èn s'augmentadas cuntinuadamain ils davos onns. En vista a las midadas da la lescha per cumbatter epidemias d'animals che van en vigur l'onn 2001 (nova controlla dal commerzi cun animals) e pertutgant la segirezza da victualias (controlla da l'obligaziun da registrar l'antibiotica e la qualitad dal latg) ed en vista a las novas incumbensas executivas cumbinadas cun quai, ha l'uffizi da veterinari previs 100'000 francs sut la posiziun "prestaziuns da servetsch da terzas persunas" en il preventiv 2001. Uschia vegn l'uffizi da veterinari a pudair surdar l'onn proxim tschertas controllas a terzas persunas. Tras questa pussaivladad d'excorporaziun vegnan puspè libras capacitads per autras incumbensas tar l'uffizi da veterinari, uschia ch'el è bun da realisar dal tuttafatg l'execuziun da la legislaziun a moda qualitativa e quantitativa er en il futur.
Ultra da quai ha il departament da l'intern e da l'economia publica incumbensà ina gruppa interna da lavur d'elavurar in concept da controlla. Quest concept da controlla duai mussar co che las lavurs da controlla sin ils manaschis agriculs duain vegnir coordinadas da nov e realisadas a moda favuraivla. Actualmain na pari betg necessari a la regenza da stuair augmentar las plazzas da l'uffizi da veterinari.
En il senn da questas explicaziuns propona la regenza da refusar il postulat.

Cuira, ils 27 da november 2000