La regenza è er da l'avis che la tgira dals roms artistics, ultra da la musica e dal chant pia era dal dissegnar e modellar, è da gronda impurtanza per il svilup dals uffants.
La scol'auta professiunala da pedagogia dal Grischun vegn ad entschaiver sia lavur durant l'onn da scola 2003/2004. Ella ha tranter auter l'incumbensa da scolar las persunas d'instrucziun per il stgalim da scola primara. Actualmain s'occupa la "gruppa da project SAP" da l'elavuraziun da la basa per ils plans da studi dals singuls curs d'instrucziun. En questa lavur pretensiusa ha ella da resguardar ils svilups ils pli variads:
D'ina vart ha ella da resguardar che ils davos onns èn creschidas fermamain, ultra da las incumbensas educativas da la persuna d'instrucziun da scola primara, er las incumbensas specificas che vegnan definidas dal plan d'instrucziun da la scola populara. En vista als svilups sin il sectur da las furmas d'instruir e d'emprender ston ellas posseder ina gronda cumpetenza professiunala sin il sectur da l'informatica; l'englais è vidlonder da s'etablir sco ulteriura lingua estra, sper la segunda lingua ch'è vegnida introducida dacurt en la part tudestga da noss chantun. L'integraziun linguistica e culturala en l'instrucziun pretendan in grond dumber da capacitads e d'abilitads. Il medem mument sa fa valair er sin il stgalim da scola primara ina partiziun da la lavur pli intensiva. Per exempel reduceschan persunas d'instrucziun lur pensum d'instrucziun per pudair surprender incumbensas da direcziun en scola; medemamain na sa ferma la tendenza d'engaschar persunal a temp parzial er betg davant la scola.
Da l'autra vart sa mussi sin il sectur da la scolaziun da las persunas d'instrucziun en plirs chantuns ch'i vegnan planisadas scolaziuns ch'intermedieschan bain ina vasta qualificaziun d'instruir a las persunas d'instrucziun da scola primara, ma che desistan d'accentuar il generalissem ("decatlonist"). La scolaziun duai s'orientar tenor las incumbensas centralas da la scola ed era vegnir guidada da las fermezzas da las futuras persunas d'instrucziun. En questa varianta da scolaziun èsi da concepir l'emprim onn da studi uschia ch'ina vasta scolaziun da basa en tut ils roms - pia era en ils roms artistics - pussibilitescha l'elecziun dals elements da scolaziun, en ils quals igl è da sa perfecziunar enconuschend il champ professiunal futur.
La regenza vegn a s'occupar, en il rom da l'execuziun da la lescha davart la scol'auta professiunala da pedagogia e suenter avair terminà las lavurs da basa necessarias, dals plans da studi e pia er da la concepziun dals curs d'instrucziun. En la procedura da decisiun vegn ella a resguardar ils svilups decisivs e l'enconuschenta situaziun da noss chantun cun scolas da pliras classas e scolas primaras, nua che lavura mo ina suletta persuna d'instrucziun.
Actualmain na vul la regenza betg fixar tge roms che vegnan instruids tenor tge sistem e cun qualas prioritads a la scol'auta professiunala da pedagogia. Ina restricziun tempriva da la libertad da decider, senz'enconuscher gia las lavurs da basa, na vegn betg retegnida per cunvegnenta. Plitost duai la libertad da decider areguard la concepziun dals plans da studi vegnir mantegnida en l'interess d'ina scolaziun d'auta qualitad e d'ina consideraziun cumplessiva dals basegns.
Per quests motivs propona la regenza da refusar il postulat.


Cuira, ils 27 da november 2000