Dumonda en scrit concernent l'exclusiun da la scola
Sessiun: 28.11.2000
Cun l'entrada en vigur da la nova lescha da scola vegn pussibilitada sco ultima ratio l'exclusiun da scolaras e scolars ch'engrevgieschan permanentamain l'instrucziun u il clima d'instrucziun. En vischnancas pli grondas cun parts da la populaziun pauc integradas e frequentas difficultads socialas e famigliaras èsi da quintar cun exclusiuns annualas da giuvenils or da la scola populara, e quai malgrà las segirezzas integradas en l'art. 14 che vegnan bain a chaschunar ina pratica d'exclusiun restrictiva. Chaschunads vegnan quests disturbis dal cumportament ch'ha per consequenza l'exclusiun per gronda part da grevs stadis d'urgenza sin il champ da l'educaziun a chasa.
Igl è d'evitar che giuvenils che vegnan exclus da la scola vegnian relaschads senza structura fixa dal di en il "territori neutral senza educaziun e senza cunfins". Ins vul cuntanscher che tals giuvenils che n'han anc betg terminà lur temp da scola "obligatori" obtegnian ina davosa schanza per ina integraziun ed in'entrada en la vita professiunala tras mesiras adattadas.
Il sutsegnà ha perquai las sequentas dumondas:
1. È colliada cun l'obligaziun d'annunziar a la cumissiun tutelara, fixada en l'art. 14, automaticamain la cundiziun da far ina examinaziun che oblighescha las autoritads d'agir?
2. Tge instituziuns en il chantun stattan a disposiziun als giuvenils ch'èn exclus da la scola, ma che suttastattan anc a l'obligaziun d'ir a scola?
3. Datti en il futur entaifer il chantun "be" l'opziun d'ina partiziun psichiatrica serrada u plazzament ordaifer il chantun, schi daventa necessaria la retenziun da giuvenils?
4. Ha la regenza l'intenziun da dar ina resposta da tempra pedagogica u da tempra medicinica-terapeutica-psicologica als disturbis dal cumportament surmenziunadas, u dumandà autramain: tge departament è finalmain cumpetent per quest cumplex da dumondas?
Cuira, ils 28 da november 2000
Namen: Zindel
Session: 28.11.2000
Vorstoss: rg SchriftlicheAnfrage
Resposta da la regenza
Cun las "Intimaziuns per il contact cun disturbis dal cumportament en scola e scolina" dal october 1999 sco er cun il "Manual per la collavuraziun tranter persunas d'instrucziun, geniturs, servetschs professiunals ed autoritads en cas da disturbis dal cumportament d'uffants e giuvenils en scola" mussa il departament d'educaziun, cultura e protecziun da l'ambient, co che dumondas concernent disturbis dal cumportament en il senn da la prevenziun duain e pudain vegnir cumbattids ad in termin uschè prest sco pussaivel. L'art. 14 da la lescha da scola, revedida parzialmain, duai vegnir applitgà sco "ultima ratio", sche grevs disturbis dal cumportament d'in scolar resp. d'ina scolara na sa laschan betg reducir cun mesiras preventivas ad ina dimensiun supportabla per l'ambient da scola (classa, persunas d'instrucziun e.u.v.). Concernent las dumondas concretas prenda la regenza posiziun sco suonda:
1. Tenor l'art. 41 da la lescha introductiva al cudesch civil svizzer dals 12 da zercladur 1994 exista da princip in'obligaziun d'annunzia, sch'insatgi sa d'in cas che po chaschunar mesiras da protecziun per uffants. La cumissiun tutelara, ils servetschs socials, las suprastanzas communalas e la polizia chantunala èn obligads da prender encunter talas annunzias e da las consegnar a l'autoritad cumpetenta. Tenor l'art. 52 da la lescha è la cumissiun tutelara obligada ex officio d'agir, sch'ella sa d'in motiv che pretenda sia intervenziun. Per la cumissiun tutelara vala pia da princip la maxima uffiziala. Sch'ella ha conuschientscha d'ina situaziun d'urgenza e sch'i dat in motiv per ina mesira, è ella obligada da far in'examinaziun.
2. En il Grischun na datti da preschent naginas instituziuns cun purschidas da scola che pudessan recepir uffants resp. giuvenils che vegnan excludids da la scola.
3. Per ina "retenziun" en il senn dals art. 314a e 397 a al. 1 CCS datti en il chantun Grischun da preschent be las partiziuns psichiatricas serradas. Igl è dentant conuschent che la fundaziun "Gott hilft" e la fundaziun per psichiatria d'uffants e giuvenils en il Grischun planiseschan da fundar ina chasa per giuvenils resp. ina staziun per giuvenils. Plazzaments alternativs a las instituziuns menziunadas èn pussaivels be ordaifer il chantun.
4. L'assistenza e la promoziun da giuvenils cun disturbis expressivs dal cumportament dovra per regla ina collavuraziun interdisciplinara intensiva. Mesiras da la scolaziun speziala che cumpiglian eventualmain in'assistenza da psichiatria per uffants e giuvenils tutgan tar il sectur d'incumbensas dal departament d'educaziun, cultura e protecziun da l'ambient. Instituziuns che na porschan nagina scolaziun speziala en il senn da l'assicuranza federala d'invaliditad tutgan en la cumpetenza dal departament da giustia, polizia e sanitad.
Cuira, ils 28 da november 2000