Navigation

Inhaltsbereich

Interpellaziun concernent las antennas da telefonia mobila

Sessiun: 28.11.2000
Tuts vulan in handy, ma nagin ina antenna.

Dumondas da construcziun per antennas da telefonia mobila fan gronds problems a bleras vischnancas. "L'electrosmog e las radiaziuns privlusas" fan tema a la populaziun. È nossa sanadad en privel? Ultra da las dumondas da sanadad resultan resalvas giustifitgadas areguard la sfiguraziun da la cuntrada.
Las limitas da radiaziun èn bain enconuschentas tras "l'ordinaziun RNI", pon dentant puspè vegnir midadas ed adattadas.
La nova tecnologia da telefonia mobila UMTS pretenda ina rait d'antennas bler pli spessa. Tut las firmas da telefonia mobila vulan construir in'atgna rait che cuvra l'entira surfatscha. Quai provochescha x-milli ulteriuras antennas en l'entir chantun. La fusiun na sa ferma er betg tar las firmas da telefonia mobila.
Las autoritads da construcziun e la populaziun han grondas bregias da chapir la mancanza da coordinaziun sin il martgà da telefonia mobila. Igl è pussaivel ch'ils offerents sa servan d'intginas vischnancas cunter autras. Ina procedura coordinada è urgentamain inditgada ed il chantun vegn dumandà da tegnair en maun las mastrinas. Ils lieus da staziunament duain vegnir zavrads e fixads tenor criteris reals, plinavant èn da fixar cundiziuns generalas valaivlas per tuts e.u.v.
In urgent basegn d'agir è bain cumprovà. En quest connex fan ils interpellants las suandantas dumondas a la regenza:
1. È er la regenza da l'avis che la dumonda da l'esser lià al lieu na sto betg mo vegnir considerada da la vischnanca pertutgada, mabain en in rom pli vast?
2. È la regenza pronta da pretender, en il rom da la procedura EOZ, in concept dals retschaviders da licenzas UMTS per ils lieus da las antennas?
3. Tge quinta la regenza da far per proteger la populaziun cunter las radiaziuns en connex cun las antennas da telefonia mobila?
4. È er la regenza da l'avis ch'ils possessurs da las interpresas da telefonia mobila stoppian vegnir intimads da duvrar communablamain ils lieus da las antennnas ch'èn vegnids designads ina giada?
5. N'èsi betg da far cundiziuns concernent la demoliziun d'antennas che na vegnan betg pli duvradas pervia da fusiuns da possessurs d'antennas da telefonia mobila?

Cuira, ils 28 da november 2000

Namen: Demarmels, Hanimann, Märchy, Bisculm, Büsser, Capaul, Carisch, Casanova (Vignogn), Cavegn, Crapp, Dermont, Farrér, Federspiel, Feltscher, Geisseler, Giovannini, Giuliani, Koch, Lardi, Loepfe, Luzio, Maissen, Noi, Parolini, Parpan, Portner, Quinter, Sax, Schmid (Sedrun), Tremp, Tuor (Mustér), Tuor (Trun), Zanolari

Session: 28.11.2000
Vorstoss: rg Interpellation

Resposta da la regenza

Dumonda 1
En connex cun la constituziun actuala da las raits d'antennas da telefonia mobila sco er en connex cun la proxima construcziun da las raits da telefonia mobila GSM èn centrals, or da vista da la legislaziun da construcziun, planisaziun e protecziun da l'ambient, ils suandants aspects:
En il territori ordaifer las zonas da construcziun sco er en l'intschess d'abitadis ed objects degns da protecziun sa tracti en emprima lingia dal fatg da restrenscher il dumber d'antennas novas sin in minimum absolut e d'optimar sche pussaivel even-
tuals novs lieus d'antennas.
Entaifer u en la vischinanza d'abitadis èsi da tegnair quint dal basegn da protecziun da l'uman cunter eventualas periclitaziuns nuschaivlas u mulestusas tras radiaziuns electomagneticas.
La regenza è da la medema opiniun sco ils interpellants, tenor la quala in resguard efficazi dals interess menziunads è pussaivel be, sche las autoritads cumpetentas per conceder la permissiun da construcziun pon sa basar sin plans d'antennas e concepts d'engrondiment surregiunals e vastamain coordinads per examinar dumondas da construcziun d'antennas. En quest reguard ha il chantun prendì las mesiras necessarias ch'èn colliadas cun gronda lavur gia a l'entschatta da la fasa iniziala, e quai sur l'uffizi da planisaziun (UP) responsabel.
Dumonda 2
Las stentas per cuntanscher ina coordinaziun e direcziun intercommunala da la constituziun da la rait cuntinuan en il rom da las capacitads disponiblas er per la proxima construcziun da las raits da telefonia mobila UMTS. Per quest intent vegn il chantun a dumandar tranter auter ils plans d'engrondiment dals concessiunaris UMTS.
Dumonda 3
En il rom da proceduras per conceder permissiuns da construcziun examinescha l'uffizi per l'ambient gia dapi l'entschatta da la constituziun da la rait GSM, sche las antennas da telefonia mobila correspundan a las prescripziuns da l'ordinaziun federala davart la protecziun cunter radiaziuns nunionisantas (ORNI), q.v.d. sche las limitas d'immissiun sco er las limitas preventivas d'installaziuns vegnan observadas. Per antennas entaifer las zonas da construcziun vegn quest'examinaziun purschida a las vischnancas sco prestaziun da servetsch. Ina restricziun da las limitas tras la regenza, sco quai ch'ils interpellants prevesan evidentamain, n'è betg admissibla per motivs giuridics, perquai ch'i sa tracta tar la ORNI d'in decret federal da caracter definitiv.
Dumonda 4
Las interpresas da telefonia mobila èn gia vegnidas obligadas en las concessiuns respectivas da duvrar tenor pussaivladad communablamain ils lieus d'antennas. Per ils territoris ordaifer las zonas da construcziun vegnan las autoritads da permissiun dal Grischun ad empruvar d'ademplir quest'obligaziun. Entaifer las zonas da construc-ziun s'impona ina tscherta retegnientscha en quest grà, perquai ch'in diever communabel d'antennas tras pliras interpresas da telefonia mobila chaschuna ina concentraziun d'irradiaziun, insatge che n'è betg giavischà en il territori d'abitadi.
Dumonda 5
Gia oz vegn mintga permissiun da construcziun per installar in'antenna da telefonia mobila munida cun la cundiziun che l'installaziun saja d'allontanar sin donn e cust da l'interpresa da telefonia mobila, uschespert ch'ella na vegn betg pli duvrada. Questa pratica vegn mantegnida er en il futur.

Cuira, ils 28 da november 2000