Navigation

Inhaltsbereich

Interpellaziun concernent las plazzas da lavur dals emploiads dal Moesano occupads oz tar las ufficinas VFF (Viafiers federalas svizras) a Bellinzona e Biasca

Sessiun: 28.11.2000
Gia dapi blers onns occupan las ufficinas da las Viafiers federalas svizras lavurants che derivan da la regiun dal Moesano. L'ufficina da Bellinzona, situada en la proxima vischinanza da la Val Mesauc, è stada schizunt gia da l'entschatta ennà in patrun privilegià per la glieud da nossa regiun. Quai conferma il fatg che l'onn 1980 eran engaschadas bunamain 130 persunas dal Moesano en l'ufficina da Bellinzona. Quest dumber è tuttina sa reducì durant ils onns e cumpigliava 96 lavurants l'onn 1993. La fin da settember 2000 quintava l'ufficina da Bellinzona anc 67 impiegads che derivan dal Moesano.
Dacurt ha in project da restructuraziun per il sectur dal mantegniment dals vaguns ch'è vegnì proponì da la direcziun da las Viafiers federalas svizras sveglià gronds quitads en nossa regiun ed en il chantun Tessin limitrof. La consequenza da questa restructuraziun fiss propi la serrada da l'ufficina da Biasca ed il redimensiunament da quella da Bellinzona cun la perdita d'almain 70 plazzas da lavur.
Per defender questas plazzas da lavur èn sa mobilisadas gia pliras associaziuns sindicalas e politicas. Ellas han lantschà ils 22 da november, tranter diversas autras acziuns, ina petiziun ch'ha l'intent da far surviver las interpresas da las VFF a Biasca e Bellinzona.
Conscients da la muntada che questas plazzas da lavur han per il Moesano, ina zona che nus pudain caracterisar gia dapi adina sco dischavantagiada economicamain, faschain nus las suandantas dumondas a la preziada regenza:
- Enconuscha la regenza las propostas da la direcziun da las Viafiers federalas svizras areguard las ufficinas da Biasca e Bellinzona?
- Enconuscha la regenza las consequenzas ch'ina eventuala serrada da las ufficinas da Biasca e Bellinzona avess per il Moesano?
- Pari opportun a la regenza d'intervegnir e da collavurar cun il chantun Tessin per salvar las plazzas da lavur periclitadas?

Cuira, ils 28 da november 2000

Namen: Noi, Pedrini, Righetti, Arquint, Bucher, Caviezel (Cuira), Frigg, Giovannini, Giuliani, Jäger, Koch, Lardi, Looser, Meyer, Pfenninger, Pfiffner, Schmutz, Schütz, Trepp, Zanolari, Zindel

Session: 28.11.2000
Vorstoss: rg Interpellation

Resposta da la regenza

1. Las Viafiers federalas svizras han infurmà ils 4 da fanadur 2000 ils sindicats, ils collavuraturs, las medias ed ils chantuns a moda cumplessiva davart las mesiras da restructuraziun e davart il futur concept da manaschi da las ufficinas a Biasca e Bellinzona. Tenor quel concept vegn l'effectiv da persunal reducì l'onn 2005dad actualmain var 500 collavuraturs sin 430. Questa reducziun succeda tras partenzas natiralas. Entaifer il manaschi vegni a dar rescolaziuns per ch'ins possia ademplir las novas pretaisas da la tecnica da manaschi en il rom dal program "Redesign dals vaguns".
2. Sin fundament da questas infurmaziuns na stat la serrada da las ufficinas betg en discussiun. Per la reducziun dal dumber da las plazzas da lavur n'èn betg previsas visadas. Correspundentamain na resultan naginas consequenzas directas per il martgà da lavur en il Moesano.
Ultra da quai èsi da resguardar ch'actualmain vegnan fundadas differentas novas interpresas che vegnan a dar dapli muntada quantitativa e qualitativa a la purschida da plazzas en la regiun.
3. La communicaziun cun las autoritads tessinaisas è garantida. Actualmain n'exista nagin basegn d'agir en questa dumonda.

Cuira, ils 28 da november 2000