Navigaziun principala

Cuntegn da la pagina

Postulat concernent la visita obligatoria dal dentist da scola

sessiun: 28.11.2000
L'ordinaziun 421.850 davart la tgira da dents per scolars prescriva en l'artitgel 8 ina visita annuala da tut ils scolars. Ils custs porta la vischnanca. Blers uffants dal stgalim intermediar e superiur sa chattan en in program da "correctura dals dents" cun visitas regularas tar il dentist. Auters uffants da tut ils stgalims da scola sa laschan visitar periodicamain da lur dentist da famiglia. Tenor l'ordinaziun ston quests uffants tuttina sa laschar examinar dal dentist da scola.
L'ordinaziun citada davart la tgira da dents per scolars prescriva plinavant che mintga uffant possedia in carnet per la tgira da dents per scolars. Cun l'inscripziun da la visita d'intgin dentist renconuschì en quest carnet uffizial per la tgira da dents per scolars sa laschan evitar bleras milli visitas inutilas e pia spargnar custs da sanadad. Cun in sistem da bonus pon las vischnancas intimar sezzas ils geniturs d'obtegnair l'inscripziun dal dentist da famiglia en il carnet per la tgira da dents per scolars. La garanzia da la visita annuala na duai uschia insumma betg vegnir tangada. Ins vul mo evitar visitas dublas ineffizientas.
Ils postulants supplitgeschan la regenza d'examinar la basa legala davart la tgira da dents per scolars e d'adattar quella als basegns effectivs per pudair spargnar custs uschia.

Cuira, ils 28 da november 2000

Namen: Feltscher, Demarmels, Möhr, Augustin, Bachmann, Bär, Barandun, Battaglia, Berther (Sedrun), Biancotti, Bischoff, Bisculm, Bühler, Büsser, Cahannes, Capaul, Carisch, Casanova (Cuira), Casanova (Vignogn), Cattaneo, Cathomas, Catrina, Cavegn, Caviezel, Christ, Claus, Crapp, Dalbert, Farrér, Federspiel, Geisseler, Giuliani, Hanimann, Hardegger, Hess, Hübscher, Jenny, Joos, Juon, Kehl, Kessler, Koch, Lardi, Lemm, Loepfe, Looser, Luzi, Luzio, Maissen, Märchy, Marti, Nigg, Noi, Parolini, Parpan, Patt, Ratti, Pedrini, Robustelli, Sax, Scharplatz, Schmid (Sedrun), Schmid (Spleia), Stiffler, Suenderhauf, Suter, Telli, Thöny, Tramèr, Tremp, Tuor (Mustér), Tuor (Trun), Walther, Wettstein, Zanolari, Zegg

Session: 28.11.2000
Vorstoss: rg Postulat

Resposta da la regenza

La lescha da scola fixescha en l'artitgel 5 tranter auter che visitas da controlla dal dentist da scola èn obligatorias e ch'ils purtaders da scola elegian in dentist da scola. Questa disposiziun è vegnida examinada en il rom dal project "Essenzialisaziun e flexibilisaziun la legislaziun e da l'applicaziun dal dretg (EFLAD)" e vegn mantegnida en emprima lingia pervia da ponderaziuns da la politica da sanadad.
Il postulat na metta betg en dumonda la visita da controlla obligatoria dal dentist fixada en l'artitgel 5 da la lescha da scola. El duai dentant pussibilitar che la visita obligatoria possia vegnir fatga, ultra dal dentist da scola, er dal dentist privat respectiv, e quai per evitar visitas dublas ineffizientas.
La lescha da scola na fixa betg a tge moda che las visitas da controlla dal dentist èn da far, mabain surdat l'autorisaziun da reglar lur realisaziun a la regenza. La regenza ha relaschà l'ordinaziun valaivla davart la tgira da dents per scolars suenter ina vasta procedura da consultaziun ils 5 da settember 1995 (protocol nr. 2339/1995). Considerond e ponderond ils arguments pro e contra cuntegnids en las posiziuns davart la dumonda pertutgant l'obligatori è vegnì formulà l'artitgel 8 da l'ordinaziun uschia ch'il dentist da scola controlla ils dents dals scolars ina giada per onn e che questa visita dal dentist da scola è obligatoria. Decisiv per questa regulaziun èsi stà spezialmain:
- che las visitas da controlla prescrittas per tut las scolaras ed ils scolars sa laschan garantir cun custs raschunaivels,
- che per ils purtaders da scola fiss la lavur administrativa considerabla per separar ils scolars che vegnan visitads d'in dentist privat,
- che la visita dal dentist da scola da tut ils uffants è garantida tenor il medem model.
Ins chapescha senz'auter che l'eventuala duplicitad cumbinada cun la visita obligatoria en scola respectivamain cun la visita precedenta u successiva tar il dentist privat vegn resentida sco nuncunvegnenta dals geniturs e dals purtaders.
La pussaivladad da laschar far la visita da controlla obligatoria al dentist privat dastgess esser colliada cun lavur administrativa supplementara per ils purtaders da scola. L'amplificaziun pretendida da la libertad da decider dals purtaders da scola na dastga betg pregiuditgar - er tenor las explicaziuns en il postulat - ni la qualitad da la visita annuala, ni l'adempliment da las incumbensas profilacticas dal dentist da scola. Igl è da garantir che quels uffants che na vegnan betg visitads dal dentist privat, vegnian assegnads al dentist da scola e che quels uffants che vulan laschar far la controlla obligatoria a lur dentist privat, la laschian er propi far. Per mantegnair sut controlla ils custs e la lavur per ils purtaders da scola èsi da prevair ch'il dretg chantunal na statueschia betg in'obligaziun d'indemnisaziun sin donn e cust dals purtaders, sch'in dentist privat fa la visita da controlla obligatoria enstagl dal dentist da scola.
Per evitar visitas nunnecessarias è la regenza pronta d'acceptar il postulat. La qualitad da la visita da controlla e l'adempliment da las incumbensas profilacticas dal dentist da scola ston dentant restar garantidas. Plinavant na duai il dretg chantunal betg statuir in'obligaziun d'indemnisaziun tras ils purtaders da scola, per il cas che la visita da controlla vegn fatga d'in dentist privat.


Cuira, ils 28 da november 2000