Navigaziun principala

Cuntegn da la pagina

Postulat concernent las incumbensas ed il support dals uffizis tras l'uffizi d'informatica (UI)

sessiun: 28.11.2000
En l'examinaziun preliminara dal preventiv 2001 constatescha la CdG ch'igl n'è betg cler, tge incumbensas che l'UI ha d'ademplir. Sias incumbensas na vegnan betg descrittas en ina lescha ed ina incarica politica correspundenta manca. L'intenziun da GRiforma è quella ch'il cussegl grond concedia, cun il preventiv global, ina "incarica da prestaziuns" als uffizis e mettia a disposiziun ils meds necessaris per quella. Sin fundament da l'intschertezza davart il cuntegn e la dimensiun da las incumbensas da l'UI n'è quai dentant strusch pussaivel.
La CdG è partida dal fatg ch'ina incumbensa centrala da l'UI saja il sustegn EED dals uffizis. Sa basond sin il rapport OPTIN, dal qual il cussegl grond ha prendì enconuschientscha, èn er vegnidas creadas plazzas correspundentas. En la cussegliaziun preliminara dal preventiv 2001 ha la CdG dentant constatà che las plazzas creadas da nov vegnian duvradas per gronda part en in'autra moda e che l'UI na sustegnia strusch ils uffizis en il sectur dals CP e LAN. Las installaziuns ed ils programs dals uffizis vegnan tgirads per part tras ils collavuraturs dals uffizis respectivs e per part tras firmas privatas. Questa circumstanza vegn menziunada er en il preventiv 2001 sut la finamira surordinada tar la "gruppa da products 3: cussegliaziun/sustegn". Tenor quella finamira na vegn il support dals CP e LAN per ils uffizis da princip betg furnì dals collavuraturs da l'UI. La CdG n'è betg cuntenta cun questa situaziun.
Tenor l'avis da la CdG èsi da sclerir tge incumbensas che l'UI sto furnir e qualas ch'el po furnir. La dumonda è qua spezialmain qualas prestaziuns ch'ils uffizis ston retrair da l'UI (consum obligatori) e per qualas ch'igl exista ina libertad d'elecziun. Plinavant fissi da fixar en tge dimensiun che l'UI duai sustegnair ils uffizis sin il sectur da la EED. La CdG po s'imaginar differentas variantas per quest intent. Ina pussaivladad fiss quella da cuntinuar cun il stadi actual. In'autra varianta fiss quella che l'UI purschass in support cumplain als uffizis. Imaginablas fissan er furmas intermediaras, en las qualas ils uffizis gronds ademplissan sez il support e l'UI sustegness be ils uffizis mesauns e pitschens. La finamira stuess esser, tenor l'avis da la CdG, in support efficazi e favuraivel.
- Nus supplitgain la regenza da preschentar al cussegl grond in rapport cun las differentas variantas per las incumbensas da l'UI e dal support EED dals uffizis;
- en il rapport fissan da menziunar las consequenzas persunalas e finanzialas da las differentas variantas;
- la finamira stuess esser quella che, sa basond sin la cussegliaziun dal rapport respectiv en il cussegl grond, succedia la budgetaziun per l'onn 2002 e ch'il cussegl grond possia fixar l'incarica politica da prestaziuns per l'UI cun il preventiv 2002.

Cuira, ils 28 da november 2000

Namen: Möhr (CdG)

Session: 28.11.2000
Vorstoss: rg Postulat

Resposta da la regenza

Sco che la CdG constatescha cun raschun, na vegnan las incumbensas dal l'uffizi d'informatica (UI) betg descrittas en ina lescha. En il conclus dal cussegl grond dals 18 da november 1969, cun il qual è vegnì creà il post d'organisaziun per l'elavuraziun da datas (oz: UI), vegni constatà sut cifra 4: "Il cussegl pitschen designa l'organisaziun dal post e fixescha ses dretgs e duairs". Da quai resulta che la regenza designa las incumbensas da l'UI e regla sia organisaziun.
Quai n'è nagut extraordinari. L'organisaziun per propi dals uffizis e l'attribuziun da las incumbensas è per regla explicitamain u implicitamain chaussa da la regenza. L'exempel da l'administraziun da taglia illustrescha quai. L'art. 164 da la lescha chantunala da taglia designa la regenza explicitamain sco organ cumpetent per l'organisaziun da l'administraziun chantunala da taglia.
La strategia d'informatica che datescha da l'onn 1995 cumpiglia las parts "model directiv", "directivas organisatorias" e "directivas tecnicas". Il "model directiv" è vegnì approvà da la regenza cun il CR 1680 dals 4 da fanadur 1995, las "directivas organisatorias e tecnicas per l'informatica e la telecommunicaziun" èn vegnidas approvadas cun il CR 2103 dals 15 d'avust 1995. Las "directivas organisatorias" cuntegnan indicaziuns detagliadas davart las incumbensas, responsabladads e cumpetenzas da las differentas instituziuns. Questa strategia d'informatica è d'elavurar. Las incumbensas, cumpetenzas e responsabladads èn d'examinar ed eventualmain d'adattar a las realitads e pretaisas actualas.
A questa chaschun èsi er da tegnair quint da las propostas da la CdG e da sclerir las dumondas areguard las pussaivlas prestaziuns obligatorias/d'elecziun da l'UI. L'elavuraziun da la strategia d'informatica pertutga il champ d'incumbensas da la cumissiun d'informatica.
La CdG supplitgescha la regenza da preschentar al cussegl grond in rapport cun differentas variantas per las incumbensas da l'UI e per il support EED dals uffizis.
Tenor l'opiniun da la regenza èsi d'entschaiver l'examinaziun da princip da las incumbensas da l'UI en il rom da l'elavuraziun menziunada da la strategia d'informatica. Differentas variantas per in support da EED duain perencunter vegnir preschentadas en in rapport spezial.
Il rapport en furma d'ina missiva vegn preschentà al cussegl grond durant la sessiun d'october 2001. Per la concepziun dal preventiv per l'onn 2002 na pon ins pia anc betg resguardar la construcziun d'in support EED per uffizis, pervia da motivs da termin. Dentant duain ins profitar dal temp tranter la sessiun d'october e quella da november 2001 per evaluar las tractativas dal cussegl grond durant la sessiun d'october e per preschentar eventualas consequenzas da la varianta concludida dal cussegl grond en in supplement al preventiv stampà.
La regenza è pronta d'acceptar il postulat en il senn da questas explicaziuns.


Cuira, ils 28 da november 2000