Postulat concernent excluder las contribuziuns dal preventiv global GRiforma
Sessiun: 28.11.2000
Tenor il concept GRiforma concluda il cussegl grond separadamain davart las singulas contribuziuns. Cun quai vulan ins tegnair quint da la spezialitad da las contribuziuns. La gronda part da las contribuziuns sa basan sin ina lescha speziala, ed en blers cas exista in dretg legal. Las contribuziuns èn perquai strusch suttamessas a la taglia a curta vista e lur svilup dependa savens da differentas circumstanzas exteriuras che na pon betg influenzar directamain ils uffizis da pilot GRiforma. Per in'adattaziun fundamentala da las prestaziuns da contribuziun vuli perquai per ordinari ina revisiun da la lescha.
Sin fundament da la basa legala existenta po la prestaziun da contribuziun depender en la pli pitschna part dals cas dal fatg ch'ils retschaviders da contribuziuns sa laschian diriger a moda efficazia da l'administraziun p.ex. sur prescripziuns da finamiras ed incaricas da prestaziun. L'administraziun na po er betg prescriver ad els lur furma d'organisaziun e lur sistems directivs. Ina schanza da GRiforma è segiramain quella ch'er il sectur da contribuziuns vegn dirigì a moda efficazia. La pussaivladad d'ina direcziun ed influenza efficazia dependa dentant da la legislaziun speziala che na prevesa oz il pli savens anc betg quella pussaivladad. Quai è er in motiv pertge che la CdG considerescha l'integraziun en il preventiv global da contribuziuns dirigidas tenor cundiziuns plitost sco in corp ester.
Oz è la situaziun quella ch'il cussegl grond decida tant per il singul cas sco er en il rom dals saldos e dals totals per gruppas da products davart las contribuziuns chantunalas ch'èn da conderscher. Il reschim dals saldos pussibilitescha als uffizis d'impunder per auters intents - quai vul dir per atgnas expensas administrativas - ils credits concedids a moda impegnativa dal cussegl grond per singuls intents da contribuziun specifics. Il fatg ch'i na vegnan betg duvrads tut ils meds na dependa per regla betg da las stentas da spargn dals uffizis, mabain da las circumstanzas exteriuras. Sch'in singul credit na tanscha betg, alura vegn fatga mintgamai ina dumonda per in credit posteriur, sch'i n'exista betg ina deliberaziun da dumandar credits.
Tenor l'avis da la CdG n'èn las contribuziuns betg d'attribuir en general a l'activitad administrativa pli stretga che po vegnir dirigida sur il preventiv global. Per quests motivs considerescha la CdG la multipla conclusiun davart las contribuziuns e l'integraziun da quellas en ils preventivs globals sco betg cunvegnenta.
Nus envidain la regenza:
- d'excluder ils credits da contribuziun a partir dal preventiv 2002 dals preventivs globals e da suttametter quels al cussegl grond be anc sco singuls cas per l'approvaziun;
- da cumprovar las contribuziuns, per infurmaziun, en il quint da la gruppa da products respectiva.
Cuira, ils 28 da november 2000
Namen: Möhr (CdG)
Session: 28.11.2000
Vorstoss: rg Postulat
Resposta da la regenza
1. En emprima lingia prenda la regenza il postulat sco chaschun per render attent a l'impurtanza da las contribuziuns en general e surtut sut GRiforma:
- Contribuziuns èn ina furma speziala da l'agir statal. Autras furmas èn per exempel il decret e la surveglianza da scumonds e cumonds u la purschida da prestaziuns statalas.
- Contribuziuns pon esser agids finanzials cun la finamira da sustegnair ed eventualmain da promover l'agir privat sin fundament da l'interess public. Exempels èn contribuziuns da provediment u stipendis.
- Contribuziuns pon dentant er esser indemnisaziuns per prestaziuns che vischnancas, instituziuns e persunas privatas furneschan al stadi. Exempels èn contribuziuns a servetschs socials communals u contribuziuns a vischnancas per projects forestals.
- Contribuziuns èn adina orientadas anoravers ed han perquai en scadin cas caracter da product or da vista da GRiforma. Per regla n'èn contribuziuns dentant betg products independents, mabain part d'in product. Ellas èn be ina furma da l'agir statal e pon vegnir cumbinadas cun autras furmas.
- La regenza è da la medema opiniun sco la CdG da diriger en il futur il sectur da las contribuziuns tenor la nova gestiun publica. Per quest intent vegn preparà in project spezial tar il departament da finanzas e militar. Ultra da quai vegnan fatgs scleriments preliminars co ch'ils interess da la nova gestiun publica pon vegnir integrads en la futura legislaziun.
2. La regenza vuless mantegnair la transparenza da tut las furmas da l'agir statal entaifer in product u ina gruppa da products. Quai concerna tant las infurmaziuns davart il cuntegn sco er las finanzas. Il medem mument va la regenza d'accord cun la CdG ch'ils singuls credits da contribuziun dastgian vegnir duvrads mo per l'intent specific ed (en cas d'ina eventuala libertad da credits) betg per autras incumbensas administrativas. Perquai ha ella la suandanta intenziun:
- Sco fin uss èn tut las contribuziuns areguard il cuntegn part d'in product/d'ina gruppa da products e vegnan preschentadas correspundentamain. Uschia è in product/ina gruppa da products cumplet areguard il cuntegn.
- Sco fin uss èn las contribuziuns cuntegnidas finanzialmain en ils custs e retgavs d'in product/d'ina gruppa da products. Uschia è in product/ina gruppa da products cumplet areguard las finanzas.
- Sco fin uss èn las contribuziuns da concluder individualmain sin fundament da la muntada politica.
- Da nov (a partir dal preventiv 2002) èn da tractar las contribuziuns en il quint current, en il quint d'investiziuns ed en ils quints da gruppas da products uschia ch'in transferiment tranter ils credits da contribuziun ed autras incumbensas administrativas n'è betg pli pussaivel. La finamira è pia la medema sco quella da la CdG, la via per arrivar là vuless la regenza anc laschar averta. Las instanzas specificas èn, en il rom da GRiforma, gia vidlonder d'elavurar la schliaziun adattada (resguardond las consequenzas, sco per exempel adattaziuns dal sistem tar l'administraziun da finanzas).
3. La regenza è pronta d'acceptar il postulat en il senn da questas explicaziuns.
Cuira, ils 28 da november 2000