Navigaziun principala

Cuntegn da la pagina

Postulat concernent la segirezza sin la rait da vias dal Grischun en connex cun l'admissiun da vehichels da 34/40 tonnas

sessiun: 29.11.2000
Enconuschentamain vegnan augmentadas las paisas maximalas admessas per camiuns cun l'introducziun da la taxa sin il traffic da camiuns pesants tenor prestaziun TCPTP per il 1.-1-2001. Pass per pass duain questas paisas dad actualmain max. 28 tonnas vegnir augmentadas sin 34 tonnas l'onn 2001 e finalmain sin 40 tonnas l'onn 2005. Plinavant ha il cussegl federal concludì l'entschatta da november da conceder in contingent da viadis per camiuns da 40 tonnas gia davent da l'entschatta da l'onn 2001. Uschia pon exequir transportaders dals pajais da la UE 150'000 viadis per onn cun camiuns da 40 tonnas, plinavant obtegnan transportaders svizzers 50'000 cartas dal di per camiuns da 40 tonnas per il traffic intern.
Per il Grischun signifitga quai in augment inevitabel dal traffic pesant sin l'axa nord/sid (San Bernardin) d'ina vart e da l'autra vart in ferm augment da camiuns da 40 tonnas sin l'ulteriura rait da vias dal Grischun sin fundament dals contingents per viadis interns. La regenza grischuna ha adina empermess da limitar quest traffic sin in minimum. La davosa giada en la resposta al postulat Keller conc. la segirezza sin la A13.
Limitaziuns dal traffic pesant enconuschain nus oz sin las sequentas rutas: Pass dal Güglia, Malögia, Bernina, Alpsu e Pass dal Fuorn. Qua sa tracti da restricziuns per camiuns-tractors e chars annexs surtut durant ils mais d'enviern, schebain ch'ins po charrar mo cun camiuns da 28 tonnas paisa totala.
L'augment da la paisa sin 34 resp. 40 tonnas po vegnir realisada be dals camiuns-tractors e chars annexs. Il surpli da traffic vegn pia dumagnà cun tals vehichels. Las consequenzas èn ina segirezza da traffic limitada ed in impediment dal traffic sin talas vias.
Ils sutsegnads expriman lur quità areguard quest svilup sin la rait da vias dal Grischun, en il cas ch'in tal augment dal traffic cun camiuns pesants da passa 28 tonnas stuess succeder.
Perquai vegn envidada la regenza d'elavurar in catalog da mesiras concernent las adattaziuns architectonicas da la rait da vias e da far propostas per realisar quellas.

Cuira, ils 29 da november 2000

Namen: Claus, Conrad, Berther (Mustér), Carisch, Cathomas, Catrina, Cattaneo, Donatsch, Feltscher, Geisseler, Giacometti, Giuliani, Gross, Kehl, Kessler, Lardi, Luzi, Luzio, Montalta, Nick, Parpan, Plozza, Robustelli, Scharplatz, Tramér, Tuor (Mustér), Walther, Zarro

Session: 29.11.2000
Vorstoss: rg Postulat

Resposta da la regenza

Sa basond sin in'analisa detagliada da la rait da vias dal Grischun pon ins charrar cun vehichels da 34 resp. 40 tonnas a partir dal 1. da schaner 2001, betg sulettamain sin la via naziunala A13, er sin ina gronda part da las vias principalas chantunalas. Sco restricziun essenziala vegnan dentant mantegnids ils scumonds generals e temporals da fin uss per chars annexs e camiuns-tractors. La regenza ha tratg questa decisiun resguardond las cundiziuns generalas tecnicas, las ponderaziuns da segirezza ed ils aspects ecologics, dentant era essend conscienta dals custs futurs pli auts per il mantegniment da las vias existentas che vegnan a subir donns pli spert ed en pli gronda dimensiun. Sapientivamain han ins perquai tractà a moda restrictiva l'avertura da las vias da colliaziun chantunalas.
Fin ch'il spustament dal traffic da rauba da la via sin ils binaris, spetgà dal cussegl federal sin fundament da las taxas sin vias, porta fritgs, èsi da far quint cun in tschert augment dal traffic pesant sin l'axa nord-sid dal San Bernardin. Sin fundament da las pendenzas, las stortas relativamain stretgas, las paucas pussaivladads da surpassar e da la sutmotorisaziun dals camiuns esters pudess quai avair in effect negativ sin la segirezza dal traffic. Sin las vias principalas chantunalas na spetga la regenza perencunter nagin augment relevant dal traffic e, mo sin fundament da la paisa totala augmentada, er nagin augment dal privel tras il traffic pesant. Sco che la statistica dals accidents mussa, na succedan oz strusch gronds accidents da traffic cun u pervia da camiuns. Senza traffic supplementar na dastgass er betg succeder il pegiurament temì da la circulaziun dal traffic, perquai che las dimensiuns geometricas dals vehichels na sa midan betg pervia da la pussaivla paisa pli gronda dal transport. Il schlargiament da las vias sco er la creaziun da vials plauns e da guntgidas spezialas n'èn pia betg necessaris sut quest punct da vista.
La regenza sa fa dentant il medem quità sco ils postulants: cun la paisa totala pli gronda dals vehichels admess s'augmenta il diever da la substanza da las vias. En cumparegliaziun cun las adattaziuns architectonicas giavischadas ch'avessan l'intent da meglierar la circulaziun dal traffic ha l'emprima priorità il mantegniment dal corpus da la via e da las construcziuns artifizialas. Ultra da las investiziuns urgentamain necessarias en il mantegniment architectonic e la reparatura èsi plinavant da far progredir l'amplificaziun da nossas vias, a moda che l'augment da la segirezza stat en emprima lingia. Uschia ston vegnir retardads gia oz blers projects da construcziuns da vias che servissan a proteger ils participants dal traffic da lavinas, crudada da crappa e bovas, dentant er projects da sviaments da vitgs che distgargiassan ils abitants, e quai pervia da la finanziaziun difficila.
Sa chapescha observan ins il svilup futur en connex cun il traffic pesant. Sch'i resultan problems gravants en connex cun la circulaziun dal traffic resp. da la segirezza, alura èsi da far frunt a quels problems cun metter prioritads per l'entira construcziun da vias. Ad interim èn pussaivels scumonds generals u temporars per il traffic pesant, nua che la segirezza pretenda quai.
En la glisch da questas explicaziuns na vesa la regenza nagina chaschun da laschar elavurar preventivmain in catalog spezial da mesiras en vista a l'augment da las limitas da paisa. Ella fa perquai la proposta da refusar il postulat.


Cuira, ils 29 da november 2000