Navigation

Inhaltsbereich

Interpellaziun concernent il svilup futur da la protecziun civila dal Grischun

Sessiun: 28.01.2001
La protecziun civila stat - ina giada dapli - avant ina refurma. Cun la refurma da la protecziun civila 2000 ed X duain vegnir redimensionadas las circa 40 organisaziuns localas da la protecziun civila dad oz sin circa 8 - 15 organisaziuns regiunalas.
Da princip è quest'intenziun da sustegnair. Dentant èsi da resguardar las cundiziuns da basa midadas. La confederaziun vegn a delegar adina dapli responsabladad als chantuns. Cun la refurma numnada èsi previs da sbassar ils onns da servetsch sin 40 onns. Cun quai vegn cuntanschida ina regiuvinaziun dals prestaders dal servetsch da protecziun civila. Percunter vegn il cader da la protecziun civila cun gronda experientscha e cun las conuschientschas localas a mancar a las organisaziuns.
Per pudair etablir in'organisaziun efficazia da la protecziun civila en noss chantun stuain nus integrar las structuras organisa-torias localas che funcziunan bain en il nov concept. Nus na pudain betg prestar da realisar refurmas senza avair gì invista da las experientschas elavuradas là. Tar la protecziun civila èn vegnids elavurads gia plirs concepts nunnecessaris e chars. Jau regordel qua p. ex. ad entiras "generaziuns da civis" che han en lur furmaziun chantunala fatg letgeras nunnecessarias. Da l'autra vart èn da menziunar plirs engaschaments fitg efficazis da la protecziun civila: per exempel l'assistenza dals fugitivs ch'è vegnida prestada en la citad da Cuira. Là è sa mussà ch'igl è fitg impurtant d'avair en ina vaira situaziun da crisa las conuschientschas localas approfundadas. Da princip è da constatar che las organisaziuns professiunalas e localas da la pro-tecziun civila han prestà ils ultims onns fitg buna lavur.
Ord questas ponderaziuns sa dattan las suandantas dumondas:
1. È la regenza da l'opiniun ch'i saja necessari d'avair dasper l'administraziun chantunala ina structura d'organisaziun professiunala en las organisaziuns localas redimensiunadas?
2. È la regenza pronta, a chaschun da la redimensiun, d'integrar pli fermamain las organisaziuns localas/regiunalas e professiunalas existentas en las novas structuras?

Cuira, ils 28 da november 2001
Name: Claus, Casanova (Cuira), Tremp, Ambühl, Arquint, Barandun, Battaglia, Berther (Sedrun), Cahannes, Casanova (Vignogn), Catrina, Caviezel, Cavigelli, Christ, Conrad, Dalbert, Davaz, Demarmels, Dermont, Feltscher, Giacometti, Giulia-ni, Gubelmann, Gunzinger, Hardegger, Hess, Jäger, Joos, Kessler, Lardi, Luzio, Marti, Montalta, Parolini, Pfenninger, Robu-stelli, Roffler, Schmid (Val S. Pieder), Schütz, Telli, Tuor (Mustér), Tuor (Trun), Wettstein, Zanolari

Session: 28.1.2001
Vorstoss: rg Interpellaziun

Resposta da la regenza

Il svilup politic e strategic en l'Europa dapi la fin da la guerra fraida ha midà il spectrum da las periclitaziuns. Conflicts tranter stadis da fin uss, motivads tras ina politica da pussanza, han pers lur muntada. Conflicts interns dals stadis, criminalitad organisada ed extremissem violent èn percunter s'augmentads. Svilups socials, economics ed ecologics èn daventads pli impurtants per la segirtad dals stadis e lur populaziun. Quai vala er per periclitaziuns tras catastrofas chaschunadas da la natira u da la civilisaziun. Quests facturs pretendan in nov concept da la politica da segirtad e da ses instruments.
Il project protecziun da la populaziun da la confederaziun è il svilup consequent da las refurmas dals onns 90, uschia surtut concernent l'orientaziun vers catastrofas e crisas sco er pertutgant la collavuraziun pli stretga tranter las organisaziuns partenarias. Las tschintg organisaziuns partenarias polizia, pumpiers, fatgs da sanadad, manaschis tecnics (ovras electricas, aua, gas, gruppas da lavur, telematica etc.) e protecziun civila portan la responsabladad per lur champs da lavur respectivs e sustegnan ina l'autra tar l'adempliment da lur incumbensas.
Sabasond sin l'artitgel 61 alineas 1,2 e 4 da la constituziun federala ha il cussegl federal deliberà ils 17 d'october 2001 il sboz da la nova lescha federala davart la protecziun da la populaziun e la protecziun civila (LPPCi) ed il concept directiv per la protecziun da la populaziun per mauns dal parlament federal. Las tractativas en il cussegl naziunal ed en il cussegl dals chantuns èn planisadas per la primavaira 2002. La LPPCi duai passar en vigur il 1. da schaner 2003.
Il nov dretg prevesa ina reducziun da 10 onns da l'obligaziun da prestar servetsch da protecziun. Quest servetsch duai vegnir prestà da nov dal 20avel fin al 40avel onn da vegliadetgna. Ils effectivs dal persunal vegnan reducids grondamain. En il Grischun duai il dumber dals members da la protecziun civila vegnir reducì dad 8000 persunas sin radund 3000 persunas. Per l'avegnir succeda la recrutaziun communablamain cun l'armada. La nov'orientaziun dals pensums chaschuna ina optimaziun da las structuras. Uschia croda per exempel il stab da fin uss davent e l'organisaziun vegn furmada tenor il model simpel d'ina "cumpagnia". La furmaziun pertutgant la protecziun civila vegn en emprima lingia concepida per dumagnar catastrofas e crisas. Per garantir in engaschament polivalent dals members da la protecziun civila prevesa la confederaziun be anc trais funcziuns fundamentalas : l'assistent dal stab per susteg nair la direcziun; il responsabel per ils divers pensums da tgira ed il pionier per il sustegniment. Correspundent al vast champ da lavur da las singulas funcziuns fundamentalas vegn la furmaziun fundamentala prolungada moderadamain en cumparaziun cun oz. La confederaziun instruescha il persunal d'instrucziun en uffizi cumplain dals chantuns e garantescha uschia ina "unité de doctrine".
La revisiun da la lescha da la confederaziun intimescha il chantun Grischun da reducir fermamain il dumber da las organisaziuns da protecziun civila (OPC). Igl è planisà a partir da 2003 da furmar per district ina suletta, per il district Partenz/Tavau duas OPC. Las 43 OPC dad oz vegnan uschia reducidas sin 12 OPC. A la regenza cumpeta la direcziun politica da las furmaziuns da protecziun civila. Las suprastanzas communalas resp. las suprastanzas da las corporaziuns vegnan distgargiadas dals pensums directivs da las OPC da fin uss. La controlla dubla da fin uss, exequida da las vischnancas e dal chantun, vegn uss fatga be tras il chantun. La furmaziun fundamentala e dal cader, la furmaziun ulteriura sco era manar curs da repetiziun succeda tras persunal d'instrucziun dal chantun en uffizi cumplain. La direcziun da las OPC en cas da catastrofas cumpeta al cader da milissa, che vegn sustegnì en l'avegnir dal persunal d'instrucziun. Il mantegniment dals stabiliments da la protecziun civila succeda tras obligads al servetsch da protecziun civila. Ils meds da las OPC stattan sco fin uss a disposiziun a la confederaziun, als chantuns ed a las vischnancas. La coordinaziun dals engaschaments succeda tras l'uffizi chantunal cumpetent.
La regenza beneventa la revisiun iniziada da la lescha sin il plaun federal e po respunder las dumondas a basa da las enconuschientschas odiernas sco suonda:

1. Las organisaziuns da la protecziun civila restan organisaziuns da milissa. Collavuraturs a temp cumplain n'èn, pervia da la reducziun massiva dals effectivs, betg previs per manar ina OPC.
2. Ils schefs a temp parzial e temps cumplain da las odiernas organisaziuns da la protecziun civila vegnan sche pussaivel integrads en las structuras novas. Il temp da lavur impundì vegn calculà sin 1020 pertschient d'ina plazza a temp cumplain.