Navigation

Inhaltsbereich

Interpellaziun concernent l'extrada da la regenza grischuna da la cumissiun federala dal Parc naziunal (CFPN)

Sessiun: 29.01.2001
A la fin da l'onn 2000, suenter ch'il cussegl federal n'ha gia per la segunda giada betg resguardà la proposta electorala uffiziala da la regenza grischuna per occupar il presidi da la cumissiun federala dal Parc naziunal, è sortì da la CFPN il represchentant dal chantun, signur cusseglier guvernativ Engler.

Actualmain vegni discutà en Engiadina ed en la Val Müstair davart l'engrondiment dal Parc naziunal svizzer, ed er en il chantun Grischun duai vegnir examinada, tenor l'opiniun da la Pro Natura e d'auters circuls interessads, la fundaziun d'in ulteriur Parc naziunal en il territori Alvra/Surses u en il territori Val Mesauc/Lumnezia/Val S. Pieder.

Per tractar questas dumondas impurtantas e per influenzar la futura dal Parc naziunal èsi ordvart impurtant ch'ils interess da la selvicultura e l'agricultura, dal turissem sco er da la chatscha e pestga sajan represchentads tras il chantun en la cumissiun federala dal Parc naziunal.

Ils interpellants supplitgeschan la regenza da respunder las sequentas dumondas:

1. Ha il cussegl federal motivà l'elecziun dal president da la CFPN resp. la refusa da la proposta electorala da la regenza grischuna?
2. Co vul la regenza influenzar en il futur la politica dal Parc naziunal svizzer?
3. Co e tras tgi duain vegnir represchentads en la CFPN ils interess da la selvicultura, da l'agricultura, dal turissem sco er da la chatscha e la pestga?
4. È la regenza, al mument da sia extrada da la CFPN, er sa distanziada dal project per l'engrondiment dal Parc naziunal svizzer?
5. Tge tenuta ha la regenza envers las intenziuns da crear in segund Parc naziunal en il chantun Grischun?

Cuira, ils 29 da schaner 2001

Namen: Lemm, Schmid (Val S. Pieder), Barandun, Augustin, Biancotti, Capaul, Conrad, Gross, Gunzinger, Hartmann, Janett, Parolini, Ratti, Robustelli, Suenderhauf, Thomann, Toschini

Session: 29.01.2001
Vorstoss: rg Interpellation

Resposta da la regenza


Avant che tractar las singulas dumondas ston ins accentuar ch'il chantun n'ha betg desistì da ses sez en la CFPN, dal qual el ha il dretg. Sco represchentant dal chantun ha il cussegl federal elegì deputà Robert Giacometti. Uschia pon per l'emprima giada dus commembers da las vischnancas dal Parc far part da la CFPN.

Dumonda 1
Decisiv per il fatg che la proposta electorala da la regenza per occupar il presidi da la CFPN n'è betg vegnida resguardada èsi stà, tenor la charta dal departament federal cumpetent, d'evitar conflicts d'interess tranter il chantun e la fundaziun "Parc naziunal svizzer" (fundaziun PNS), surtut er en vista al project d'engrondiment ch'è politicamain contestà. Ultra da quai èsi stà in giavisch dal cussegl federal ch'il Parc naziunal restia er en il futur in project naziunal che vegn purtà da l'entir pajais.

Dumondas 2 e 3
Il chantun è - sco gia menziunà a l'entschatta - represchentà er en il futur cun in commember en la CFPN. Uschia èsi garantì ch'el po er en avegnir influenzar dumondas specificas e dumondas che pertutgan la fundaziun PNS. En vista a las relaziuns exteriuras tranter il chantun e la fundaziun PNS ston ins far la differenza tranter il PNS actual ed il project d'engrondiment. Concernent il PNS actual e ses conturns pli stretgs èn ils interess dal chantun garantids tras contracts (utilisaziun dal Spöl, indemnisaziun da donns da selvaschina, coordinaziun da la polizia da chatscha e.u.v.) sco er tras l'ordinaziun chantunala davart il Parc naziunal. Concernent il project d'engrondiment èsi d'accentuar che quest po vegnir realisà sulettamain cun il consentiment dal chantun. Il project d'engrondiment tanghescha numnadamain en plirs secturs er la sfera da cumpetenza dal chantun (chatscha, pestga, selvicultura, agricultura e.u.v.)

Dumonda 4
La regenza renconuscha l'engrondiment dal PNS anc adina sco ina schanza per in svilup persistent che vala la paina. En sia favur na discurran betg sulettamain ponderaziuns ecologicas, mabain surtut er economicas. Sch'il Parc naziunal duai crear er en il futur avantatgs da cumpetitivitad sco factur credibel dal marketing dal lieu, è la renovaziun da l'idea dal Parc naziunal ina premissa. La regenza è dentant da l'avis ch'ins stoppia far in'examinaziun cumplessiva da la situaziun suenter il conclus negativ da la vischnanca da Zernez. Pir a basa da questa valitaziun e cun resguardar tut ils circuls interessads (organisaziuns regiunalas, vischnancas politicas e burgaisas, consorzis e.u.v.) vegnan ins a pudair giuditgar co ch'ins vul proceder en il futur.

Dumonda 5
La zavrada d'ulteriurs vasts territoris da protecziun sco territori cumplementar per territoris pli engrevgiads po avair senz'auter perspectivas per il futur da las regiuns. Projects correspundents empermettan dentant success be sch'els sa basan sin concepts fundads, partan da propostas cumplessivas che resguardan tant ils interess da la protecziun sco er da l'utilisaziun e vegnan sviluppads e purtads da la popula-ziun directamain pertutgada. Sche questas cundiziuns da basa èn ademplidas, vesa la regenza senz'auter pussaivladas per zavrar ulteriurs vasts territoris da protecziun en il chantun ed è en quest senn er pronta da promover activamain projects correspundents da las regiuns.

27 da favrer 2001