Navigation

Inhaltsbereich

Interpellaziun concernent la reducziun dals uffizis postals

Sessiun: 29.01.2001
La Posta svizra reorganisescha sia rait d'uffizis postals en gronda dimensiun. Durant ils proxims tschintg onns reducescha l'interpresa la rait annualmain per 140 fin 180 uffizis sin in dumber da circa 2500 - 2700 uffizis postals.

Tenor il plan da la posta vegnan eliminads er en il chantun Grischun fitg blers uffizis postals. La perdita da l'uffizi postal influenzescha la finala il caracter d'ina vischnanca. Quella daventa tras quai main attractiva. La populaziun pli attempada vegn a patir da quai, essend ch'ella è main mobila ed è perquai dependenta dals servetschs da la posta. Malgrà ch'ins ha previs differents tips tenor l'infurmaziun da la posta, uschia p. ex. servetsch da chasa, agenturas, uffizis postals mobils, na pon quels betg substituir las emploiadas ed ils emploiads da posta en las vischnancas. Savens n'è il postin en il discurs cun ils abitants en vischnancas pli pitschnas betg sulettamain la persuna che porta la posta, mabain ina persuna d'agid. I sa preschentan dentant er dumondas da la politica d'abitadi e problems concernent las schanzas da svilup da regiuns periferas.

Tenor la posta ed il sindicat communicaziun duai l'entira reorganisaziun esser socialmain cumportabla, quai vul dir che la posta interprenda tut per evitar desditgas, surtut tar las persunas cun engaschament stabel. La posta sto dentant er garantir en il futur in provediment fundamental da posta, e quai er en noss chantun.

Perquai preschentain nus a la regenza las sequentas dumondas:

1. Co vesa la regenza ils effects sin il sectur da la politica d'abitadi e da las schanzas da svilup per las regiuns periferas en noss chantun?
2. Tge pussaivladads vesa la regenza per cuntanscher las correcturas necessarias dal preschent concept da la posta tant tar la posta e tar ils posts cumpetents da la confederaziun sco er tras il parlament federal?
3. En connex cun la reducziun dals uffizis postals vegnan introducidas autras tipisaziuns sco p. ex. il servetsch da chasa u las agenturas. Po tenor l'avis da la regenza tuttina vegnir mantegnì il provediment fundamental en il Grischun?
4. Sa la regenza, quantas plazzas da lavur da la posta che van a perder tras quai en il Grischun? Tge vegn la regenza a far per cumbatter quest svilup?

Cuira, ils 29 da schaner 2001

Namen: Locher, Pfenninger, Schütz, Arquint, Bucher, Frigg, Jäger, Looser, Meyer, Noi, Pfiffner, Schmutz, Trepp, Zindel

Session: 29.01.2001
Vorstoss: rg Interpellation

Resposta da la regenza

1. La structura decentralisada cun numerus abitadis pitschens è caracteristica per il Grischun. La regenza s'engascha da princip per mantegnair questa structura, uschenavant che quai è raschunaivel e finanzialmain supportabel. Tenor questa finamira sa drizzan las stentas per ina buna infrastructura e prestaziuns da servetsch publicas cunvegnentas.

En connex cun la reducziun d'uffizis postals ston ins differenziar dus pro-
blems. D'ina vart sa tracti en l'entir chantun, er en las regiuns periferas, dal provediment fundamental da posta. Da l'autra vart ha la singula plazza da lavur colliada cun la posta ina muntada particulara en las vischnancas pitschnas. La regenza vegn a s'engaschar per che la definiziun dal provediment fundamental na pregiuditgeschia betg las schanzas da svilup da las regiuns periferas. Las plazzas da lavur na vegnan ins betg a pudair mantegnair dapertut en la furma actuala. En quels cas sa tracti da chattar cumbinaziuns adattadas cun autras incumbensas ed er da cumpensar las perditas tras novas plazzas da lavur en auters secturs, ordavant tut privats. Per profitar da schanzas da svilup economic dovri en emprima lingia plazzas da lavur privatas; las plazzas publicas èn sulettamain ina cumplettaziun.

2. L'emprim ston ins accentuar che la posta è in manaschi da la confederaziun e ch'ins po cuntanscher correcturas vi dal concept da la posta be sur ils uffizis federals cumpetents. Sch'igl è necessari da curreger il concept, vesa la regenza la pussaivladad da contactar directamain las autoritads federalas, d'inoltrar intervenziuns ensemen cun ils ulteriurs chantuns da muntogna u cun la gruppa svizra per las regiuns da muntogna (SAB) u via ils parlamentaris federals per far valair ils interess dal chantun.

3. Tenor la lescha da posta sto la Posta svizra garantir il provediment fundamental da posta (servetsch universal) en l'entira Svizra. Sche quest servetsch universal u servetsch public vegn furnì cun uffizis postals u en in'autra furma na vegn betg prescrit da la lescha. Perquai n'è betg il dumber d'uffizis postals u la tipisaziun da quels ina mesira per il servetsch public, mabain be il provediment effectiv da la populaziun cun las prestaziuns fundamentalas da la posta.
Uschenavant che la posta ademplescha sia incumbensa legala, è garantì il servetsch public.

4. Da preschent na po la posta anc far naginas indicaziuns, tge effects che la reorganisaziun da la rait dals uffizis postals ha sin il dumber da las plazzas da lavur. Per quest intent sto la posta l'emprim analisar mintga singula situaziun ed elavurar soluziuns ensemen cun ils pertutgads e cun las vischnancas. Igl è sulettamain conuschent che 182 uffizis postals P dal Grischun vegnan restructurads. Il chantun ha gia fatg ils emprims discurs cun ils posts cumpetents da la Posta svizra e vegn a restar en contact cun quels, er durant e suenter la fasa da l'analisa.

Da princip ston ins constatar ch'i va segir e franc d'ina vart per mantegnair las plazzas da lavur existentas, ma che las stentas ston da l'autra vart ir en direcziun da crear novas plazzas da lavur orientadas vers il futur en las regiuns. Qua èn dumandadas las regiuns. Il chantun è pront da sustegnair las stentas da las regiuns.

27 da favrer 2001