Navigation

Inhaltsbereich

Postulat concernent il rapport davart l'avegnir dal „WEF“ a Tavau

Sessiun: 29.01.2001
Dal World Economic Forum (WEF) a Tavau èsi vegnì fatg pli e pli stim ed attenziun en las medias ed en la publicitad ils davos onns. Quest onn han procurà per discussiuns spezialmain la dimensiun da las mesiras da segirezza sco er ils eveniments avant e durant questa occurrenza.

Il dispositiv da segirezza che la polizia e la regenza han tschernì quest onn per realisar il WEF ha gì consequenzas cun in grond resun lunsch sur la regiun da Tavau ora. La regiun dal Grischun dal nord e central è stada spezialmain ferm pertutgada.

I sa preschentan differentas dumondas pertutgant ina realisaziun raschunaivla ed acceptabla da quest'occurrenza sa ponan. Nus cartain ch'i saja inditgà da discutar, en ina spezia d'inventari, il proxim avegnir dal WEF en in rom pli vast.

Nus envidain perquai la regenza da suttametter in rapport al cussegl grond davart il svilup e la realisaziun futura dal WEF. Quel rapport duai cuntegnair explicaziuns spezialmain davart ils suandants secturs:

- la libertad da sa mover e da viagiar da giasts ed indigens durant il WEF
- la garanzia ed il respect dals dretgs fundamentals democratics e las adattaziuns correspundentas dal dispositiv da segirezza
- la promoziun dal dialog tranter ils uschenumnads NGOs ed il WEF
- la situaziun giuridica concernent l'incarica da transport da la Viafier retica (violaziuns da las concessiuns da viafier) e concernent las bloccadas da la via
- la proporziunalitad da las controllas da persunas e la registraziun dal servetsch d'investigaziun da burgais integhers
- il cumportament adequat e reservà da las forzas da polizia
- las meglieraziuns da la lavur da publicitad e da medias
- la situaziun giuridica concernent dumondas sco il „diever da puschina“ dals purs u concernent la smanatscha da sancziuns a la scola professiunala
- la grevezza finanziala actuala e futura dal maun public en il senn d'in quint integral dals custs (incl. engaschament da las forzas da polizia durant l'onn e dals custs supplementars resp. da las perditas da gudogn chaschunadas tras quai)
- las consequenzas economicas da las perditas da la Viafier retica e da las interpresas privatas
- la tgira e la perdita da la reputaziun per il Grischun
- la realisaziun senza disturbi d'autras occurrenzas a Tavau durant il WEF

Plinavant sa distanzieschan ils sutsegnads da scadina applicaziun da violenza.

Cuira, ils 29 da schaner 2001

Namen: Pfenninger, Trepp, Arquint, Bucher, Frigg, Jäger, Locher, Looser, Meyer, Noi, Pfiffner, Schmutz, Schütz, Zindel

Session: 29.01.2001
Vorstoss: rg Postulat

Resposta da la regenza

Dapi 30 onns ha lieu a Tavau il World Economic Forum (WEF). Questa occurrenza è d'ina spezia unica. Ella porscha ina plattafurma a persunalitads directivas sin l'entir mund per discutar dumondas actualas politicas, economica e culturala. Betg darar han gì las tractativas ed ils contacts a Tavau in effect persistent. Tavau, il Grischun e la Svizra stattan pia er mintg'onn a la fin da schaner en il center da l'interess mun-
dial.

La regenza ha adina beneventà e sustegnì activamain l'organisaziun dal WEF a
Tavau. Per quest intent ha ella adina gì in stretg contact cun l'organisatur, il circul da Tavau e cun la confederaziun. Tenutas criticas envers il WEF ed ils interess ch'èn da tematisar là han chaschunà surtut ils dus onns passads che, ultra dals cuntegns, ins ha mess en il center da l'interess public pli e pli er dumondas areguard il circul dals participads ed areguard la segirezza. L'onn passà è la situaziun daventada pli critica tras ils acts da violenza da demonstrants a Tavau. Per evitar tals acts da violenza han ins quest onn amplifitgà il dispositiv da segirezza da la polizia e per part isolà Tavau sco lieu da la dieta ils 27 da schaner 2001, e quai pervia da las demonstra-
ziuns violentas temidas. La tactica correspundenta ha pregiuditgà il traffic en il Grischun. La saira dals 27 da schaner 2001 han ultra da quai gì lieu grevs acts da violenza da demonstrants a Turitg. Las dumondas da la segirezza publica, dal respect dals dretgs fundamentals, da la realisabilitad da l'occurrenza a Tavau e da l'eventuala integraziun da las forzas criticas han dominà silsuenter la discussiun.

En ina communicaziun publica dals 29 da schaner 2001 è la regenza s'exprimida en favur dal dispositiv da segirezza. Tenor l'avis da la regenza adempleschan las forzas da segirezza lur incarica da garantir la segirezza dals participants dal WEF, da la populaziun e dals giasts a Tavau. Da pregiudicaziuns e donns ch'èn resultads en auters lieus, spezialmain a Turitg, ha la regenza prendì enconuschientscha cun displaschair. Il medem mument ha ella empermess d'analisar detagliadamain la situaziun dal WEF e l'ambient da questa occurrenza e d'elavurar spert las dumondas centralas. Per quest intent ha ella previs d'integrar tut las forzas decisivas per concepir l'avegnir dal WEF. Per concluder è la regenza stada da l'opiniun che la realisaziun dal WEF duaia esser pussaivla anc adina a Tavau.

Ils 6 da favrer 2001 ha la regenza numnà ina giunta ch'è cumpetenta d'elavurar tut las dumondas che stattan en connex cun il World Economic Forum. Questa giunta analisescha la situaziun dal WEF e fa propostas a la regenza per garantir la realisaziun da quel er en l'avegnir. Tut ils contacts cun ils organisaturs dal WEF, las autoritads communalas e federalas, las autoritads d'auters chantuns e circuls ch'han ina tenuta negativa envers il forum vegnan coordinads da la giunta. La regenza è pronta d'elavurar, en il rom da l'analisa gia iniziada dal WEF 2001, in rapport davart il svilup e la realisaziun futura dal WEF. Il rapport duai esser avant maun probablamain fin la fin da la stad 2001.

En il senn da questas explicaziuns è la regenza pronta d'acceptar il postulat.

27 da favrer 2001