Navigation

Inhaltsbereich

Sessiun: 29.01.2001
Sonda, ils 27 da schaner 2001 eran nus en viadi (cun mai 1 incumbensà da la confederaziun, 1 persuna cun activitad da gudogn independenta, 2 purs biologics) a Tavau a l'occurrenza da la „Decleraziun da Berna“ (the public eye). A Claustra avain nus stuì bandunar il tren. A questa chaschun è in da noss collegas vegnì arrestà senza motiv da 2 polizists mascrads. Ils 2 polizists l'han stratg davent e manà a la controlla da persunas. Sin nossa protesta avain er nus stuì ans suttametter ad ina controlla da persunas. A questa chaschun èn vegnidas copiadas nossas cartas d'identitad. Il viadi a Tavau ans vulevan ils polizists grischuns scumandar, perquai ch'els na savevan nagut d'ina apparenta occurrenza da la „Decleraziun da Berna“. Suenter ulteriuras discussiuns ans han els per finir permess da cuntinuar il viadi cun l'auto da posta.

Mias dumondas a la regenza en quest connex:

1. Han ins instruì ils polizists chantunals dal Grischun be co ch'els ston controllar las abitantas ed ils abitants grischuns e betg er davart tut las occurrenzas ch'han lieu a Tavau?
2. Pertge vegnan fatgas copias da cartas d'identitad a chaschun d'in normal scleriment d'identitad?
3. Tge capita cun las copias da nossas cartas d'identitad? Vegnin nus registrads e fischads be perquai che nus avain fatg valair noss dretg d'ir a Tavau?
4. Enconuschentamain vegnan copiadas er adressas or da cudeschins privats d'adressas. Tge capita cun quellas copias?
5. Vegnan destruidas las copias da nossas cartas d'identitad e las adressas?

Cuira, ils 29 da schaner 2001

Namen: Looser

Session: 29.01.2001
Vorstoss: rg SchriftlicheAnfrage

Resposta da la regenza

Malgrà il scumond da demonstrar èsi vegnì appellà ad ina demonstraziun encunter il World Economic Forum (WEF) 2001 per ils 27 da schaner 2001 a Tavau. Sin fundament da questa infurmaziun eri da quintar cun massivs acts da violenza. Per garantir la segirezza da la populaziun da Tavau, dals participants dal WEF e spezialmain per proteger ils represchentants dals stadis esters ha la polizia chantunala stuì prender in dispositiv da segirezza cumplessiv. Engaschadas èn vegnidas forzas da la confederaziun e da tut ils chantuns. Schebain che las differentas unitads stevan sut la direcziun generala dal cumandant da polizia grischun, n'èn strusch sa laschadas evitar tschertas „atgnadads e modas da procedura chantunalas“. Ultra da quai mancavan per part tschertas enconuschientschas davart cundiziuns e persunalitads localas. Ma quai han ins stuì prender en cumpra en vista ad in'acziun uschè cumplexa ed a l'organisaziun federalistica da la polizia en Svizra.

1. Ils organs da segirezza avevan l'incarica da controllar e manar enavos tut las persunas che vulevan ir a la demonstraziun nunlubida a Tavau. Els savevan ch'a Tavau vegniva salvà il World Economic Forum ed in uschenumnà cuntra-
congress. Ademplind l'incarica politica èsi malavita er capità che persunas ch'eran sin viadi per la cuntraoccurrenza a Tavau èn vegnidas identifitgadas sco demonstrants potenzials ed han perquai stuì returnar.

2. La controlla da persunas per constatar l'identitad succeda savens sut in grond squitsch da temp. Las persunalias vegnan examinadas regularmain en il sistem d'investigaziun ed i vegn sclerì, sch'ellas sa cunfan cun publicaziuns correspundentas. Per evitar sbagls nunecessaris cun endatar las infurmaziuns per retschertgar publicaziuns u per controllar exactamain las persunalias existentas, vegnan fatgas mintgatant copias da las cartas d'identitad.

3. Las copias da las cartas d'indentitad vegnan destruidas adina suenter las re-
tschertgas correspundentas, sche la controlla na mussa nagins indizis concrets d'investigaziun, connexs cun eventuals acts chastiabels u naginas ristgas per la polizia da segirezza. Sche la retschertga è negativa en quest senn, alura na vegn fatga nagina registraziun. Ma sch'ina retschertga dat tschertas indicaziuns sin acts chastiabels, connexs cun tals u ristgas per la polizia da segirezza e sch'il suspect na sa lascha betg sclerir subit, alura vegn fatga ina registraziun che vegn stizzada suenter maximalmain trais onns, sch'i na resultan betg ulteriuras enconuschientschas.

4. Actualmain enconuschan ins be in cas, nua ch'ins ha copià adressas. Suenter l'examinaziun poliziala successivamain a la controlla da persunas han ins constatà che quella persuna n'a betg stuì vegnir messa en connex cun inqualas acziuns illegalas. Tut las registraziuns e tut ils documents èn gia vegnids destruids, tuttina sco las adressas en dumonda.

5. Gea, guarda la resposta a la dumonda 3.

Perquai ch'ils nums da l'incumbensà da la confederaziun, la persuna cun activitad da gudogn independenta e dals dus purs biologics n'èn betg vegnids numnads en la dumonda, n'è ina deposiziun davart questas persunas betg pussaivla.
27 da favrer 2001