Navigation

Inhaltsbereich

Interpellaziun concernent las controllas dal traffic pesant en il Grischun

Sessiun: 30.01.2001
Cun la lescha federala per transferir sin la viafier il traffic da rauba pesant tras las Alps (lescha davart il transferiment dal traffic) dals 8 d'october 1999 han ins cumplettà la lescha davart il traffic sin via cun in artitgel 53a, dal qual l'alinea 2 ha il suandant cuntegn:

„Ils chantuns fan las controllas dal traffic pesant sin las vias. Quellas controllas èn adattadas a la finamira da la lescha davart il transferiment dal traffic ed a la periclitaziun pli intensiva“.

En quest connex vegni er constatà che la confederaziun paja contribuziuns als chantuns per las controllas dal traffic pesant. La confederaziun ha l'intenziun da subvenziunar en il senn da la lescha be controllas dal traffic pesant che surpassan la mesira prestada fin uss. Per quest intent na duain betg vegnir stipuladas cunvegnas da prestaziun cun ils chantuns.

Er noss chantun sa chatta per lung da rutas tangadas dal traffic da transit tras las Alps, nua ch'igl è da far quint, pervia da la cunvegna davart il traffic terrester, cun in traffic pesant supplementar.

Nus supplitgain perquai la regenza da dar infurmaziuns davart las sequentas dumondas:

1. Quantas controllas dal traffic pesant èn vegnidas fatgas ils davos onns en noss chantun? Quantas da quellas sin l'axa da transit tras las Alps al San Bernardin ed al Güglia? Quants vehichels èn vegnids registrads là?
2. Èsi vegnì controllà, qualas prescripziuns (spertadad, notg, scumond da charrar la dumengia, volumen, paisa, stadi tecnic, temps da guida e da paus, abilitad da conducir dal manischunz, rauba privlusa, equipament per rauba privlusa, e.u.v.) ch'èn vegnidas ademplidas?
3. Ha il chantun gia stipulà ina cunvegna da prestaziuns cun la confederaziun?
4. Quantas controllas supplementaras quinta la regenza da far l'onn current?
5. Tge custs chaschunan las controllas supplementaras? Quant vegn pajà da la confederaziun?
6. Vuli ulteriur persunal per las controllas supplementaras? Cura vegn quel engaschà? Sche na, cun tgeninas autras incumbensas vegni spargnà custs?

Cuira, ils 30 da schaner 2001

Namen: Looser, Pfenninger, Arquint, Bucher, Frigg, Jäger, Locher, Meyer, Noi, Pfiffner, Schmutz, Schütz, Trepp, Zindel

Session: 30.01.2001
Vorstoss: rg Interpellation

Resposta da la regenza

1. La polizia chantunala distingua differentas spezias da controllas dal traffic pesant: d'ina vart controllas che succedan a moda situativa en il rom da las patruglias da rutina, e da l'autra vart er talas che vegnan ubain coordinadas interchantunalmain ubain organisadas internaziunalmain. Indicaziuns statisticas datti be per las duas spezias da controlla davosmenziunadas. Ils davos trais onns han gì lieu en media ca. 75 da questas controllas en l'entir chantun Grischun, da quellas bunamain la mesadad sin la A13 e var 15% sin il traject dal Güglia. Il dumber dals vehichels registrads totalmain en tut las controllas sa chatta en media tranter 4'700 e 5'300 camiuns, camiuns cun chars annexs e camiuns-tractors.

2. En connex cun las controllas dal traffic pesant coordinadas vegnan controlladas tenor pussaivladad tut las prescripziuns decisivas, spezialmain l'autorisaziun e l'abilitad da guidar dals manischunzs, l'observaziun dals temps da guida e da paus sco er la segirezza dals vehichels, l'observaziun da las reglas da traffic areguard la paisa, il volumen, la spertadad, il scumond da charrar la notg e la dumengia, la segirada da la chargia sco er il transport da rauba privlusa ed il pajament da la taxa sin il traffic da camiuns pesants tenor prestaziun. Per questas controllas vegnan consultads savens er funcziunaris da l'uffizi per il traffic sin via, dal servetsch per la repressiun d'engions da duana, da l'uffizi federal da communicaziun, dal laboratori chemic chantunal e.u.v.

3. Ils 19 da december 2000 (nr. da prot. 2116) ha la regenza approvà la cunvegna da prestaziuns davart intensivar las controllas dal traffic pesant tranter la confederaziun ed il chantun Grischun. Ils 19 da december 2000 resp. ils 19 da schaner 2001 han il president da la regenza dal Grischun ed il cussegl federal sutsegnà questa cunvegna da prestaziuns valaivla per l'onn 2001.

4. En la cunvegna da prestaziuns s'oblighescha il chantun Grischun da prestar l'onn 2001 supplementarmain almain 1000 uras contollas dal traffic pesant. Las controllas duain succeder en emprima lingia sin las axas principalas.

5. Las controllas supplementaras succedan cun l'infrastructura existenta e senza augmentar il dumber da persunal, uschia ch'i na resultan nagins custs supplementars directs. Per las ulteriuras 1000 uras controllas stipuladas en il contract sco er per ina restituziun d'ina suletta giada dals custs da scolaziun necessaris paja la confederaziun al chantun Grischun l'onn 2001 totalmain francs 103'500.

6. Per la lavur da controlla previsa tenor la cunvegna da prestaziuns na vegn anc betg duvrà persunal supplementar. In ulteriur augment da las controllas en il chantun Grischun n'è dentant betg pussaivel cun il dumber existent dal persunal da la polizia chantunala. Decisiv per la futura intensitad da las controllas vegn ad esser il svilup da la quantitad dal traffic resp. l'augment dal traffic pesant. I vegn ad esser pussaivel d'intensivar considerablamain las controllas dal traffic pesant, resguardond spezialmain la A13, dentant be cun in rinforz correspundent dal persunal da la polizia da traffic.

Malgrà l'obligaziun da la polizia chantunala da furnir prestaziuns supplementaras en connex cun las controllas dal traffic pesant, emprovan ins da desister per entant da reducziuns pli grondas d'autras acziuns ed incumbensas da la polizia. Ma ins na po betg excluder che l'engaschament da las patruglias da traffic e tschertas controllas da traffic pli intensivas stoppian per part vegnir reducidas in pau en il rom da la surveglianza dal traffic.

14 da favrer 2001