Navigation

Inhaltsbereich

Dumonda en scrit concernent il cumportament da las autoritads en cas da lavinas / privel en nossas muntognas

Sessiun: 30.01.2001
Dumengia, ils 7 da schaner 2001 han lavinas al Pass dal Güglia periclità la vita da pliras persunas. Per fortuna n'è betg vegnì blessà insatgi e n'hai dà naginas victimas mortalas. Tenor ils rapports en las medias ha l'institut federal per la perscrutaziun da naiv e da lavinas infurmà gia a las 12.00 (4 uras avant la distatga da la lavina) davart il privel ed ha recumandà da serrar ils pass d'ina tscherta autezza, tranter quels er il Güglia.

Essend conscienta ch'ins na po betg evitar scadin privel en nossas muntognas, dentant er ch'igl è l'incumbensa da la politica da crear cundiziuns generalas che mitigeschan quests privels, fatsch jau las suandantas dumondas a la regenza:

1. Tge valur han las infurmaziuns e recumandaziuns da l'institut federal per la perscrutaziun da naiv e da lavinas?2. Datti disposiziuns exactas en quest connex?
3. Sche gea, quant obligantas èn questas disposiziuns?
4. Tgi porta la davosa responsabladad en cas d'ina sventira?

Cuira, ils 30 da schaner 2001

Namen: Noi

Session: 30.01.2001
Vorstoss: rg SchriftlicheAnfrage

Resposta da la regenza

Dumonda 1
Il bulletin da lavinas che vegn actualisà l'enviern per regla mintga di tras l'institut per la perscrutaziun da naiv e da lavinas a Tavau (PNL) è in impurtant agid da valitaziun e decisiun per ils responsabels dals servetschs chantunals e communals da lavinas. Ils bulletins scrits dal PNL prognostitgeschan il privel da lavinas (sin fundament dal probabel svilup da l'aura e da la cuverta da naiv) per las differentas regiuns. Perquai ch'il bulletin na fa naginas decleraziuns davart ils privels locals e vegn tegnì en in tun general, ston las persunas responsablas per la segirezza sa basar sin ulteriuras metodas da valitaziun (p.ex. observaziuns localas da l'aura, analisas da la cuverta da naiv sco er resultats da distatgas artifizialas da lavinas) e surtut er sin lur experien-tscha, per prender las decisiuns difficilas davart la serrada u l'avertura d'ina via da traffic. La realisaziun da las recumandaziuns generalas dal PNL (p.ex. „grond privel da lavinas; vias da traffic exponidas pon esser periclitadas da lavinas spontanas; mesiras da segirezza vegnan recumandadas“) avessan numnadamain per consequenza, che bleras colliaziuns da traffic impurtantas stuessan mintgatant vegnir serradas durant plirs dis.

Dumondas 2 e 3
I na dat naginas prescripziuns giuridicas concernent l'obligaziun dal bulletin dal PNL.

Dumonda 4
La decisiun davart la serrada e l'avertura da las vias chantunalas sto succeder sin il lieu. La responsabladad giascha perquai tar ils uffizis districtuals da construcziun bassa. Per la valitaziun dal privel da lavinas existan per il pli organisaziuns regiunalas da lavinas, a las qualas appartegnan per part spezialists externs. En cas da basegn als stat a disposiziun ultra da quai il PNL cun vusch consultativa. Las incumbensas e cumpetenzas dals differents participads èn fixadas en las regulaziuns dal servetsch d'enviern dals uffizis districtuals da construcziun bassa. Qua sa tracti d'ina incumbensa fitg pretensiusa che fa grondas pretaisas als collavuraturs responsabels. Els adempleschan quella conscienziusamain e meritan engraziament e renconuschientscha. En cas d'in donn decida per finir in derschader, sch'en la decisiun
prendida èn vegnidas observadas las basas e cundiziuns generalas che stattan a disposiziun.

14 da favrer 2001